Read Yupik John 4 Bible Online

John 4 - Yupik bible

John 4

¹Tua-i-llu Atanrem nallunrilami Pharisee-aat niiyuciatnek ellminun anglluuciat ilauyuciat-llu John-aami amllenruluteng.

²(Tua-i-wa Jesus-aaq ellii tungaunani angllurcecinricaaquq, elitnaurai tau͡gaam.)

³Elliin Judea unitaa Galilee-amun ataam ayagluni.

⁵Tua-i-llu Samaria-m nunain iliitnun tekituq Sychar-aamek at'legmun, taum nunarraq yaaqsinritaa Jacob-aam Joseph-aamun cikiutekellra.

⁶Jacob-aam-llu 'laakiara tuantuq. Tua-i Jesus-aaq, mernuami pektellerminek 'laakam canianun aqumuq. Maa-i erenrem qukallran nalliini.

⁷Tua-i-llu arnaq Samaria-rmiu mertalria tekituq. Jesus-aam qanrutaa, “Merr'isnga.”

⁸Tuani elitnaurai cataitut, nunanun tuavet kipussaagata neqkameggnek.

⁹Tua-i-llu arnam Samaria-rmium qanrutaa, “Qaillun pisit, Jews-aarung'e'rpet ciin merr'itesqessit wangnun, wii arnaulua, Samaria-rmiungulua-llu?” (Tua-i Jews-aat Samaria-rmiut-llu ilakutenrilata.)

¹⁰Jesus-aam kiugaa, “Elpet-wa Agayutem cikiutii nallunrilkuvgu, tauna-llu elpenun qanlleq waten, ‘Merr'isnga,’ tua-i elpet piicagviksaran, elliin-llu mer'mek unguvanarqelriamek cikiryaraaten.”

¹¹Arnam qanrutaa, “Usuuq, qaluuritaituten, 'laakaq-llu et'uluni, naken-mi tauna meq unguvanarqelria piciqsiu?

¹²Elpet-qaa piunruuten ciuliamten̄i Jacob-aami, taum 'laakamek uumek paicitellruakut, ellii-llu, qetunrai-llu, ungungssii-llu waken mel'allruluteng?”

¹³Jesus-aam kiugaa, “Kina imna mer'mek uumek meq'uni meqsunqigciiquq.

¹⁴Tau͡gaam kina imna mermek cikiutekamnek meq'uni meqsunqiggngaituq, meq-llu wiinga cikiutekaqa elliini ulevlaugarkauguq uryurluni unguvamun nangyuilngurmun.”

¹⁵Arnam qanrutaa, “Kitaki mermek tamatumek merr'isnga, meqsunqiggviirlua, mertanqiggviirlua-llu wavet.”

¹⁶Jesus-aam cali qanrutaa, “Kitaki uin kel'ggu, tailutek-llu.”

¹⁷Arnam kiugaa, “Uingitua.” Jesus-aam qanrutaa, “Qanluaqertuten uingitniluten,

¹⁸uingqellruyaaquten tallimanek, tauna-llu watua elpenelnguq uikenritan, mat'umek qanluaqertuten.”

¹⁹Arnam qanrutaa, “Ataneq, elpekamken prophet-aarucirpenek.

²⁰Ciuliaput ingrimi mat'umi agayulallruut, ilaten tau͡gken qanlartut Jerusalem-aami tau͡gaam yuut agayuarkauniluki.”

²¹Jesus-aam qanrutaa, “Arnaaq, ukveqia, waten ellirciquq maaniunrilengraan ingrimi mat'umi, Jerusalem-aunrilengraan-llu Aata piicagvikciqaat.

²²Elpeci nallukevcen̄un piicalartuci, wangkuta-llu nallunrilkemten̄un piicalartukut, tua-i anirtuun Jews-aanek kingunengqerrami.

²³Tau͡gaam pillerkaq agiirtuq, maa-i-llu ayagnirluni, piicalriit piciulriit Aata piicagvikciqaat Anernerkun piciulriakun-llu. Tamakut Aatam pisqumakai ellminun piicalaasqelluki.

²⁴Agayun Anerneruuq, elliinun-llu piicalriit Anernerkun piciulriakun-llu piicagarkaugut.”

²⁵Arnam qanrutaa, “Christ-am tekitarkaucianek niitelartua, tekiskuni-llu elliin canek tamaitnek nalqiguciiqaakut.”

²⁶Jesus-aam qanrutaa, “Tua-i qalarutesten taunguuq.”

²⁷Maa-i-llu elitnaurai tekitut, alangaarutkaat-llu arnamun qallacan. Tau͡gaam iliit atauciunger'mi qanenrituq, “Camek pisit?” wall'u, “Ciin qalaruciu?”

²⁸Tua-i-llu arnaq, mertarcuutni unilluku, nunanun ayagtuq yuut-llu qanrulluki,

²⁹“Kitaki tailuci, yuk tangerrsarturciu, taum atullrenka tamalkuita qanrutkai wangnun, Christ-aulliuq?”

³⁰Taukut nunanek an'ut ullaulluteng-llu.

³¹Tuani elitnaurain qaruquryaaqaat waten, “Ayuqucirturtaa, neri.”

³²Tau͡gaam elliin qanrutai, “Neqkangqertua nallukevcen̄ek.”

³³Tua-i-llu elitnaurai qanruyutaagutut, “Yuum-qaa neqkainek payugtellrua?”

³⁴Jesus-aam kiugai, “Ayagcestem̄a pisqutai aturluki, caliari-llu qaqilluki, maa-i tuarpiaq wangni neqkautngulartuq.

³⁵Qanenrituci-qaa, ‘Iralut cetaman kinguatni quyurciyarauciquq?’ Tangerrluku qanrutamci, iici nalugciki, naucetaarvigpiit kiarciki tangerrluki kangrit qat'rilliniut quyurrnariluteng-llu.

³⁶Quyurcilalria akiliutengqelartuq, unakelarai-llu unguvam nangyuilnguum atsai. Tua-i nauceciilria quyurcilria-llu nunaniryullguteknaurtuk.

³⁷Maa-i imna niitelallerput piciurtuq, ‘Yuum ilii nauceciilartuq, alla-llu quyurciluni.’

³⁸Ayagcetamci caliaqenrilkevcen̄ek quyurcisqelluci, allat calillruut, elpeci-llu caliaritnun ekluci.”

³⁹Amlleret Samaria-rmiut taukuni nunani elliinun ukvertut arnam qanellra ayagneqluku, qanellruan, “Atullrenka tamalkuita elliin qanrutkellrui.”

⁴⁰Tua-i-llu Samaria-rmiut tekicamegteggu, unayaqaat ilaksugluku; ellii-llu tuani malrugnek erniluni.

⁴¹Nutaan-llu amlleriluteng qaneryaraa pitekluku ukvekaat.

⁴²Arnamun-llu qanertut, “Maa-i ukvertukut qanellren kiingan pitkevkenaku, tungaunata niicamteggu, nalluvkenaku-llu ilumun ellamiunek Anirturilriarucia.”

⁴³Erenrek kinguagni tuaken Galilee-amun ayagtuq.

⁴⁴Tua-i Jesus-aaq nallunairiuq prophet-aaq qigcikumaksaitniluku nakmiin nunamini.

⁴⁵Tua-i-llu Galilee-amun tekican, Galilee-armiut ciuniuraat tangellruamegteki pillri tamalkuita Jerusalem-aami agayunerpallratni atullri, ellait-llu agayunerpaliyallruameng.

⁴⁶Cana-mun Galilee-am iliinun tekitenqigtuq, mer'mek wine-aurcecillerminun. Yugtangqellruuq-llu anguyagten̄ek atanirturilriit iliitnek, qetunraa-llu naulluuluni Capernaum-aami.

⁴⁷Tauna Jesus-aam tekiyucianek Judea-mek Galilee-amun, niicami ullagaa, unayaqeqapiggluku-llu atraasqelluku qetunrani anirturyartuusqelluku, tua-i tauna tuquqataan.

⁴⁸Jesus-aam taumek qanrutaa, “Naucaqutnek irr'inarqelrianek-llu tangrraarpek'naci ukveqsaitelartuci.”

⁴⁹Atanirturilriim qanrutaa, “Usuuq, atraa irniaqa tuquvailgan.”

⁵⁰Jesus-aam qanrutaa, “Uterten, qetunraan unguvauq.” Angutem taum Jesus-aam qanellra ellminun ukvekaa uterrluni-llu.

⁵¹Atrainanrani-llu, pistain pairrsaagaat qanerluteng, “Qetunraan unguvauq.”

⁵²Tua-i-llu apqaurai cam nalliini assiriqarraarucianek; ellaita-llu qanrutaat, “Akwauvaq-wa erenrem qukallran kinguariini puqlairutuq.”

⁵³Tua-i atiin nallunritaa taum nalliini Jesus-aam waten qanrucia, “Qetunraan unguvauq.” Ellii-llu ukvertuq, yui-llu tamalkurmeng.

⁵⁴Wani-wa irr'inarqelrialillerminek aipiriuq Jesus-aaq Judea-mek Galilee-amun tairraanerminek.