Read Yupik John 5 Bible Online

John 5 - Yupik bible

John 5

¹Mat'um kinguani agayunerpaullruuq Jews-aani, Jesus-aaq-llu Jerusalem-aamun mayurtuq.

²Jerusalem-aami-llu nanvarra'artangqellruuq qusngit meqsarturviatnek. Tamana Jews-aat aterpagtelaraat Bethesda. Taum-llu avatii qilakutartangqellruuq tallimanek.

³Makuni-llu apqucilget ayuqenrilngurnek amllellriit uitallruut cikmiumalriit, tussitellriit, pektesciigalnguut-llu, mer'em eleryirtellra utaqaluku.

⁴Tua-i an'gilaq caaqami atralallruuq nanvarra'armun meq-llu pekcelluku. Mer'em-llu pektellran kinguakun tuavet ekqerraalria apquciirut'lallruuq, apqucini qaillun ayuqengraan.

⁵Yugtangqellruuq-llu tuani, apqucilriamek allrakuni yuinaq akimiarmek cipluku pingayun-wa.

⁶Jesus-aam tangrramiu nalluvkenaku-llu ak'a ayagnillrucia, qanrutaa, “Canriryugtuten-qaa?”

⁷Apqucilgem kiugaa, “Usuuq, meq pektaqan nanvarra'armun ellistaitelartua, atrarqama-llu allam ciullelaraanga.”

⁸Jesus-aam qanrutaa, “Nangerten, inartessuuteten-llu teguluki, piyuagi.”

⁹Egmianun-llu canrirtuq angun tauna, inartessuutni-llu teguluki piyualuni-llu. Mat'um-llu Sabbath-aaq nall'aringaa.

¹⁰Tua-i-llu Jews-aat canrilleq qanrutaat, “Maa-i Sabbath-aaruuq, inartessuutevnek ang'aquagiyunaituten.”

¹¹Tau͡gaam elliin kiugai, “Canrircestem̄a qanrutellruanga, ‘Inartessuuteten teguluki piyuagi.’”

¹²Aptaat-llu, “Kia qanrutaten, inartessuuteten tegusqelluki piyuasqelluten-llu?”

¹³Canrirtesten̄i taunguciitaa, Jesus-aaq tuanteqanrilan yugyiin-llu tamana.

¹⁴Taum kinguani, Jesus-aam agayuvigpagmi nall'artaa, qanrulluku-llu, “Tangerrluku, canrircecimauten! Assiilnginqigcaqunak, arcaqanran tucuaraaten.”

¹⁵Angun ayagtuq Jews-aat qanrucarturluki waten, “Canrircesteka Jesus-aarulliniuq.”

¹⁶Man'a pitekluku Jews-aat Jesus-aaq nangtaat, tuquiturluku-llu, Sabbath-aami makunek calian.

¹⁷Tau͡gaam Jesus-aam kiugai, “Man'a engelkarrluku Aata cali caliuq, wiinga-llu caliunga.”

¹⁸Nutaan man'a pitekluku Jews-aat pikanirluteng tuquituraat Sabbath-aaq catkenrilaku, Agayun-llu atakniaku, Agayucetun pitarrluni.

¹⁹Tua-i-llu Jesus-aam kiugai, “Ilumun, ilumun, qanrutamci, Qetunraq ellminek camek pisciigatuq, Atani tau͡gaam naspequtekluku pilartuq, tua-i canek ellii pikan, tuaten-llu Qetunraq piciquq.

²⁰Tua-i Aatam Qetunraq kenekngamiu, nasvitaa tamaitnek atullerminek, makuni-llu angenrulrianek calianek nasviciiqaa irr'ivkarluci.

²¹Tua-i Aatam tuqumalrianek makcecillratun, unguvamek-llu cikiqengellratun, tuaten cali Qetunram piyukni unguvamek cikirciqaa.

²²Tua-i Aatam yuk qanercetaarngaitaa, qanercetaarun tamalkuan Qetunramun tunellruamiu,

²³tamiini yugnun Qetunraq ucuqesqelluku, Aatamek ucuqilauciicetun. Qetunramek ucuqinrilnguq, Aatamek cali ayagcestiinek ucuqinrituq.

²⁴Ilumun, ilumun, qanrutamci: Qaneryaramnek niitellria ayagcestemnun-llu ukvelria, unguvamek nangyuilngurmek pinguq, qanercetaarun negurluku, tuqukun-llu unguvamun iterluni.

²⁵Ilumun, ilumun, qanrutamci: pillerkaq tekiciiquq, maa-i-llu ayagnirluni, tuqullret Agayutem Qetunraan erinii niiciiqaat, niitellriit-llu unguvaciqut.

²⁶Aata ellminek unguvamek avalingqerrami, tuaten-llu Qetunraq piyunarivkaraa elliinek unguvamek avalingqerresqelluku.

²⁷Piyunarivkaraa-llu qanercetaarinermek, tua-i Yuum Qetunraqngaku.

²⁸Irr'ivkenaci mat'umek, tua-i waten ellirciqngan qungunetellriit erinii niiciiqaat,

²⁹anluteng-llu; imkut elluarrluteng pillret, makciiqut unguvamun, tau͡gken imkut elluarrluteng pillrunrilnguut, makciiqut qanercetaarutmun.

³⁰“Wangnek camek pisciigatua, niitelqa aturluku qanercetaarilartua, qanercetaarilqa-llu elluartuq, tua-i piciliaqa atunrilamku, tau͡gaam ayagcestem̄a pisqutii atuamku.

³¹Wangnek nallunairikuma, nallunairilqa asguranaqsartuq.

³²Tau͡gaam wani-wa allam nallunairutkaanga, nallunritaqa-llu nallunairutkestem̄a nallunairutiin piciucia.

³³Nauwa elpeci John-aaq paqcetellruarci, ellii-llu nallunairillruuq picimek.

³⁴Nallunairutkumalqa yugnek pinrituq, tau͡gaam makunek qallatua anirtuumasqelluci.

³⁵Ellii kumaluni tanqigluni kenurraullruuq, elpeci-llu quyateksuumiryaaqluku kumaqallrani.

³⁶Tau͡gaam nallunairutkumaciqa John-aam piani tukninruuq. Atama caliaqesqellri wangnun qaqicesqelluki, tamakut calianka wangnek nallunairilartut, Aatamek-llu ayagcecimallrucimnek.

³⁷Aata-llu ayagcesteka wangnek nallunairillruuq. Imumirpak eriniinek niiteksaituci, wall'u tungaunaku tangeqsaunaku.

³⁸Qaneryaraa-llu elpecen̄i uitanrituq, tua-i ayagcecilria ukveqenrilavciu.

³⁹Qaneryarat yuvrilaraci, umyuarteqngavci nangyuilngurmek unguvakauteksukluki. Tamakut-llu ilumun wangnek nallunairilartut.

⁴⁰Wiinga tau͡gken ullagyunrit'lararpecia unguvakangengnaqluci.

⁴¹Yugmek ucurnarqutmek ciuniurinritua.

⁴²Tau͡gaam nallunritamci, Agayutem kenkutii elpecen̄etenrituq.

⁴³Atama atrakun tekiteng'e'rma, ciuniunritarpecia, tau͡gken alla umyuani aturluku tekiskan nutaan ciuniurciqaci.

⁴⁴Qaillun-mi ukverciqseci, atunem ucuqutaagulluci, Agayutem kiimi ucurnarkiutii cucukevkenaku?

⁴⁵Umyuarteqenrici wangnun picetaarutnayukluci Atamun, picetaarutkangqertuci, tua-i Moses-aamek cacetuqutek'ngarpecen̄ek.

⁴⁶Moses-aaq ukveqellrukuvciu, ukverviksararpecia, tua-i wiinga igautekellruanga.

⁴⁷Tau͡gken igai ukveqenrilkuvciki qaillun-mi qaneryaranka ukverciqseciki?”