Read Yupik John 8 Bible Online

John 8 - Yupik bible

John 8

¹[Tau͡gaam Jesus-aaq Olive-aam ingrianun mayurtuq.

²Unuayaarmi-llu Agayuvigpagmun itenqigtuq, yuut-llu tamarmeng ullagaat, elliin-llu aqumluni elicungcarai.

³Tua-i-llu igatulit Pharisee-aat-llu arnaq akusrarutekevkalleq itrutaat akunlemeggnun-llu nangerrluku,

⁴qanertut elliinun, “Elitnauristaa, una arnaq anguarput akusrarutekevkartelluku.

⁵Moses-aam picirkillruakut waten pilriit teggalqutgun tuqucesqelluki; tua-llu elpeni qaillun ayuqa?”

⁶Waten qanertut naspaaluku picetaarutkameggnek nataqutengnaqluteng. Tau͡gaam Jesus-aaq pull'uni tekermikun nunamun igartuq.

⁷Tua-i-llu aptenqigtaaratni nangertuq qanrulluki-llu, “Ilavci assiilngiqsailnguum ciumek teggalqumek milqerliu.”

⁸Ataam-llu pull'uni tekermikun nunamun igartuq.

⁹Ellaita-llu niicamegteggu, anuraut atauciuqaqluteng, ciulirnermeggnek ayagnirluteng nangluteng. Kiituani Jesus-aaq imna-llu arnaq tuani nangengqalria kiimek ellirtuk.

¹⁰Jesus-aaq-llu nangertuq qanrulluku, “Arnaaq, nauwa imkut? Iliita-qaa picirkinritaaten?”

¹¹Kiugaa, “Kia pinritaanga, Ataneq.” Nutaan Jesus-aam qanrutaa, “Wiinga-llu picirkirngaitamken, tua-i ayii, wak'nirnek assiilnginqigcaqunak.”]

¹²Tuamta-llu Jesus-aam qalarutai waten, “Wiinga nunamun tanqiugua, maligcesteka-llu tan'germi piyuangaituq, tau͡gaam unguvam tanqianek pingciquq.”

¹³Taumek Pharisee-aat qanrutaat, “Elpenek nallunailartuten, nallunairiteten piciuksaitut.”

¹⁴Jesus-aam kiugai, “Wangnek nallunainge'rma nallunairitka piciuguq, tua-i kingunengqerruciqa nallunrilamku, natmun-llu ayallerkaqa, tau͡gaam elpeci kingunengqerruciqa nalluarci, natmun-llu ayallerkaqa nalluluku.

¹⁵Elpeci yugtun cuqcilartuci, wiinga yuk cuqteksaitaqa.

¹⁶Cuqcikuma cuqcicirkaqa piciuciquq kiimetenrilama, tau͡gaam wii Aata-llu, tauna ayagcesteka.

¹⁷Tuamta-llu qaneryararpecen̄i igausngauq nallunairistek malruukagnek, qanellrak piciuniluku.

¹⁸Wani-wa wiinga wangnek nallunairilartua, Aatam-llu ayagcestem̄a nallunairaanga.”

¹⁹Taumek qanrutaat, “Nauwa Aatan?” Jesus-aam kiugai, “Elpeci wii Ataka-llu nalluarpecikuk; nallunrilkuvcia Ataka-llu nallunricararci.”

²⁰Makunek qallatellruuq akivigmi, elicungcarillermini Agayuvigpagmi, kia-llu imum yaggvikenritaa pillerkaa tekiteksailan.

²¹Elliin-llu qalarutenqigtai, “Ayagciqua, yuarciqerpecia-llu, elpeci-llu assiilngurpeciuggun tuquciquci. Ayallemnun tekisngaituci.”

²²Jews-aat taumek qanertut, “Ellminek-qaa tuquciiquq, qanran ayallemnun tekisngaituci?”

²³Qanrutai-llu, “Elpeci camaken piuci, wiinga pakmaken piunga, maaken elpeci piuci, wiinga maaken pinritua.

²⁴Taumek qanrutellruamci assiilngurpeciuggun tuquarkauniluci; waniwa ukveqenrilkuvcia taungucimnek assiilngurpeciuggun tuquciquci.”

²⁵Taumek aptaat, “Causit?” Jesus-aam qanrutai, “Tua-i allaunritua tau͡gaam apertullrucimtun piqarraallemnek.

²⁶Wiinga-wa amllermek qaneryararkangqertua cuqcitkangqerrlua-llu elpeci pitekluci, ilangcivkenaci, ayagcesteka piciuguq, elliinek-llu niitellrenka nunamiunun qanrutkanka.”

²⁷Ellait taringenritut Aatamek qalarucianek.

²⁸Jesus-aam-llu qanrutai, “Yuum Qetunraa naluumarikuvciu, tuani taringeciquci taungucimnek, cali-llu wangnek caliksailucimnek, tau͡gaam Aatam elitnauruciatun qalarucimnek.

²⁹Ayagcesteka-llu wangnetuq, kiimeceteksaitaanga, tua-i ilukegcitkaanek calilaama.”

³⁰Makunek qallacan amlleret ukvervikaat.

³¹Taumek Jesus-aam imkut Jews-aat ukveqesten̄i qanrutai, “Qaneryaramni uitaurquvci, ilumun elitnauraqciqamci.

³²Piciuneq-llu nallunriciiqerci, piciunrem-llu angiciiqaaci.”

³³Tua-i-llu kiugaat, “Abraham-aam kinguveqaakut, teguaruksaunata-llu, qaillun qanercit, ‘Angicimaciquci?’”

³⁴Jesus-aam kiugai, “Ilumun, ilumun, qanrutamci, kina imna assiilngiquni assiilnguum teguaqaa.

³⁵Teguaq-llu enemeterrlainarngaunani, Qetunraq tau͡gaam uitarrlainarciquq.

³⁶Taumek Qetunram angiskaci, ilumun teguarunrirciquci.

³⁷Nallunricaaqamci Abraham-aamun kinguvrucirpecen̄ek, tau͡gken cali tuquiturarpecia, tua-i qaneryaraqa elpecen̄ek ciuniurtailan.

³⁸Atamni tangllemnek qanlartua, elpeci-llu atavcen̄i niitelallerpecen̄ek pilartuci.”

³⁹Kiugaat, “Abraham-aaq atakarput.” Tua-i-llu Jesus-aam qanrutai, “Abraham-aam irniaqekaci, Abraham-aatun pilaryartuci.

⁴⁰Tau͡gaam maa-i tuquiturarpecia, wani-wa yuulriami elpecen̄un piciulriamek qanllermi, niitellrucimtun Agayutmek. Tuaten Abraham-aaq pillrunrituq.

⁴¹Elpeci atavcetun pilartuci.” Nutaan kiugaat, “Wangkuta ataunata yuurtellrunritukut, ataucimek atangqertukut Agayutmek.”

⁴²Tua-i-llu Jesus-aam qanrutai, “Agayutmek Atangqerquvci keneksararpecia, Agayutmek kingunirlua tekicama, wangnek tekitenritua, elliin tau͡gaam ayagcetaanga.

⁴³Ciin taringesciigaceciu qanelqa? Tua-i qaneryaraqa ciuniurciigalavciu.

⁴⁴Elpeci kingunengqertuci atavcen̄ek tuunrangayagmek, atavci-llu caarrluutainek aturyulartuci. Ellii-wa nutem tuqucilriaruuq, piciunermi-llu uitavkenani, tua-i piciuneq ilakenrilamiu. Iqluaqami elliin piminek qanlartuq, iqlungalriaruami iqluyaram-llu atakluku.

⁴⁵Wii, tau͡gken, piciulriamek qanrama ukveqenritarpecia.

⁴⁶Nalirci assiilngillemnek aperturiyugngaa? Piciulriamek qallaskuma, ciin ukveqenricecia?

⁴⁷Agayutmek kingunelgem qaneryarai niisngalarai. Taumek elpeci niisnganrit'lartuci Agayutmek kingunrilavci.”

⁴⁸Jews-aat kiugaat, “Qanluaqanritukut-qaa Samaria-rtauniluten, anernerrlungqerrniluten-llu?”

⁴⁹Jesus-aaq kiuguq, “Anernerrlungqenritua, tau͡gaam Ataka qigcikaqa, elpeci tau͡gken qigcikenritarpecia.

⁵⁰Nanrautekarcunritua, tau͡gaam ataucimek nanrautekamek yualriartangqertuq, cuqcisten͞guluni-llu.

⁵¹Ilumun, ilumun, qanrutamci, yuum qaneryaranka atuquniki, tuqu tangerrngaitqapigtaa.”

⁵²Tua-i-llu Jews-aat qanrutaat, “Nutaan anernerrlungqerrucin elpekarput. Abraham-aaq tuqullruuq, prophet-aat-llu, elpet tau͡gaam qanertuten, ‘Yuum qaneryaranka atuquniki, tuqu uigngaitqapigtaa.’

⁵³Elpet-qaa piunruuten Abraham-aami tuqullermi? Prophet-aani-llu tuqullerni! Elpet cauyuksit?”

⁵⁴Jesus-aaq kiuguq, “Wangnek nanraquma, nanrauteka caunrituq, tau͡gaam wani-wa Atama nanraraanga, qanruteklerpeci Agayutekniluku.

⁵⁵Amta-llu nalluluku. Tau͡gaam wii nallunritaqa, qanquma-llu nalluniluku, elpecicetun iqlungalriaruyartua, tau͡gaam wii nallunritaqa, qaneryarai-llu aturluki.

⁵⁶Atavci Abraham-aam erneqa quyatekellrua, tangrramiu-llu quyallruuq.”

⁵⁷Tua-i-llu Jews-aat piat, “Elpet allrakungeksaituten yuinak malruk qulnek ciplukek, tau͡gken-qaa Abraham-aaq tangellruan?”

⁵⁸Jesus-aam qanrutai, “Ilumun, ilumun, qanrutamken, Abraham-aaq yuurpailgan, piullruunga.”

⁵⁹Nutaan teggalqunek tegutut milqernaluku, tau͡gaam Jesus-aaq tangvagcetevkenani Agayuvigpagmek an'uq.