Read Yupik John 9 Bible Online

John 9 - Yupik bible

John 9

¹Pektellermini, tangertuq nutem cikmiumalriamek.

²Tua-i-llu elitnaurain aptaat, “Ataneq, naliak assiilngirta, una wall'u-qaa angayuqak, waten cikmiumarmi yuurcan?”

³Jesus-aaq kiuguq, “Uum assiilngui pitkevkenaki, angayuqaagken-llu assiilngukek, tau͡gaam Agayutem caliari alaitesqelluki elliikun.

⁴Ayagcestem̄a caliari caliaqarkaugaput erenrullrani, unukan yuk calingailan.

⁵Nunametlemni tanqiulartua nunamiunun.”

⁶Tuaten-llu qanrami nunamun qecirtuq, qecillni-llu nunamun uruutekluku, tuaken-llu iik minguglukek,

⁷qanrulluku-llu, “Ayagluten nanvamun Siloam-amek at'legmun eruryarturkek.” Tua-i ayagtuq, erurlukek-llu, uterrluni-llu tangerrsaurrluni.

⁸Tua-i-llu nunalgutain cikircetaatulleq tauna tangrramegteggu qanertut, “Una-qaa imuunrituq aqumgaluni cikircetaatuli?”

⁹Ilait qanertut, “Wani-wa-wa,” allat tau͡gken, “Qang'a, tau͡gaam ayuqaa.” Ellii qanertuq “Taunguunga.”

¹⁰Taumek aptaat, “Qaillun-mi tangerrsaurcit?”

¹¹Kiugai, “Taum yuum Jesus-aamek atelgem nuna urrluku mingullruak iigka, qanrullua-llu, ‘Siloam-aamun ayagluten eruryartua.’ Ayaglua-llu erurlukek, tangerrsaurrlua-llu.”

¹²Tua-i-llu aptaat, “Nanta?” Kiugai, “Nalluaqa.”

¹³Nutaan Pharisee-aanun cikmiumalleq ullautaat.

¹⁴Taum nalliini erneq Sabbath-aarullruuq, Jesus-aam nunamek urciluni iigkenek uicecillra.

¹⁵Taumek pulenglluku Pharisee-aat aptaat qaillun tangerrsaurucianek. Elliin-llu qanrutai, “Taum nunamek urciluni iigka mingullruak, wiinga-llu erurlukek, tangerrsaurrlua-llu.”

¹⁶Taumek Pharisee-aat ilait qanertut, “Tauna yuk Agayutmek kingunengqenrituq, erneq Sabbath-aaq qigcikenrilaku.” Allat-llu qanertut, “Assiilngurtuliukuni qaillun nallunailkutnek makunek piarta?” Ayuqenriqertut-llu.

¹⁷Taumek aptenqigtaat cikmiumalleq, “Tua-llu elpet qaillun umyuangqercit taumek tangerrsaurcetevnek?” Ellii qanertuq, “Prophet-aaruuq.”

¹⁸Tau͡gaam Jews-aat cikmiumallrucianek tangerrsaurtellrucianek-llu ukveryunritut, tau͡gaam cikmiumallrem angayuqak kel'ggaarlukek

¹⁹aptagket, “Wani-wa-qaa imna qetunrartek cikmiumaniluku qanrutek'lallertek, qaillun-mi wani-wa tangerrsaurta?”

²⁰Kiuguk, “Nallunritapuk una qetunraqerpuk, nutem-llu cikmiumarmi yuurtellrucia,

²¹tau͡gaam qaillun tangerrsaurucia nalluarput, kitumun-llu tangerrsaurcecucianek nallulunuk; wani-wa usvituriuq ellminek qallalli.”

²²Waten angayuqaak qallatuk Jews-aat alikngamegneki, tua-i Jews-aat ak'a picirkillruata kina imna qanqan Christ-auniluku, agayuvigmek au͡gaumaarkauniluku.

²³Taumek angayuqaak qanertuk, “Usvituriuq, apciu.”

²⁴Taumek cikmiumalleq kelenqigtaat qanrulluku-llu, “Agayun tau͡gaam nanrarru. Tauna yuk nallunritarput assiilngilriaruuq.”

²⁵Tua-i-llu kiuguq, “Assiilnguucia nalluaqa, mat'umek tau͡gaam nallunritqapigtua, cikmiumallruyaaqua, waniwa-llu tangerrsaurtua.”

²⁶Nutaan aptaat, “Qaillun-mi pillruaten? Qaillun iigken uicetakek?”

²⁷Kiugai, “Watua-ggem qanrutellruamci niitevkenaci-llu. Ciin pulenglluku niicugceciu? Elpeci-llu-qaa elitnauraurcugtuci?”

²⁸Nutaan qumlikaat qanerluteng, “Elpet tau͡gaam elitnauraqaaten, wangkuta tau͡gken Moses-aamun elitnauraugukut.

²⁹Agayutem Moses-aamun qalarucia nallunritarput, tau͡gken uum naken picia nalluarput.”

³⁰Taum kiugai, “Man'a irr'inarquq! Naken picianek nalluavci, amta-llu tangerrsaurcetevkarlua.

³¹Assiilngilriit Agayutmun niisngailuciat nallunritarput, tau͡gaam yuum Agayun qigcikekuniu, pisqutii-llu aturluku, tauna niiciiqaa.

³²Nunam piurteqarraallranek yuk niicimaksaituq yugmun tangerrsaurcetellruniluku.

³³Una yuk Agayutmek pinrilkuni camek piyunaicartuq.”

³⁴Kiugaat, “Elpeni-lli yuurtellrullinivaa assiilngurtuumarpet, amta-llu ayuqucirturyugluta.” Nutaan-llu anevkaraat.

³⁵Jesus-aaq anevkaumacianek niicami, nall'arcamiu-llu qanertuq, “Agayutem-qaa Qetunraanun ukvertuten?”

³⁶Kiuguq, “Kina tauna, Ataneq, ukvervikniarqa?”

³⁷Jesus-aam kiugaa, “Tangrrumarian ak'a, waniwa-llu elliin qalarutaaten.”

³⁸Qanertuq-llu, “Ataneq, ukvertua,” ciktaarvikaa-llu.

³⁹Jesus-aaq-llu qanertuq, “Tua-i qanercetaarun pitekluku tekitua nunamun, cikmiumalriit tangerrsaurcetnaluki, uisngayukellriit-llu cikmircetnaluki.”

⁴⁰Pharisee-aat ilaita elliin nayurtain mat'umek niicameng aptaat, “Wangkuta-llu-qaa cikmiumaukut?”

⁴¹Jesus-aam qanrutai, “Cikmiumakuvci assiilnguicartuci, tau͡gaam maa-i qanravci, ‘Uisngaukut’ taumek assiilnguci cali uitauq.