Read Yupik Acts 14 Bible Online

Acts 14 - Yupik bible

Acts 14

¹Iconium-aami apostle-aak ilaklutek Jews-aat agayuviatnun itertuk, qalarucilutek-llu. Yugugaat-llu ukvengluteng, Jews-aat Greek-aat-llu.

²Tau͡gaam ukvenrilnguut Jews-aat agayumanrilnguut eguaqurait uumikesqellukek apostle-aak.

³Tau͡gaam akaarnun tuantuk, cumigglutek qalaruciaqlutek Atanerkun. Elliin-llu qalarutkellrak naklekutni nallunaircetaa nallunailkutanek irr'inarqelrianek-llu unatekegnegun.

⁴Tau͡gaam nunarpiit yuit avegtut, ingluit Jews-aanun ilaulluteng, ingluit-llu apostle-aagnun.

⁵Agayumanrilnguut Jews-aat-llu curukaryaaqagket atanermeng pisquciicetun, nangetnalukek teggalqunek-llu miluqunalukek.

⁶Elkek tau͡gaam taringarcamek qimagtuk Lycaonian-aam nunatainun Lystra-mun Derbe-mun-llu, avaqliitnun-llu,

⁷tamakuni-llu qaneryaraqegtaar qalarutkaak.

⁸Tuani-llu Lystra-mi angun aqumgalartuq pekcuilnguq, yuurqaanerminek tussitellriaruluni, piyuaksaunani.

⁹Taum Paul-aaq niicugnia. Elliin-llu Paul-aam tangvagaa elpekluku-llu ukvengucia anirturyuucia-llu,

¹⁰qanrutaa-llu qayagpagluku, “Nangerten.” Tauna-llu nangertuq piyualuni-llu.

¹¹Yuut-llu Paul-aam calillranek tangrrameng, eriniagut qanerluteng, “Agayutet atralliniut wangkutnun yugtun ayuqluteng!”

¹²Barnabas-aaq aterpagtaat Jupiter-aamek, Paul-aaq-llu Mercurius-aamek, qalartesten͞guan.

¹³Jupiter-aam-llu agayulirtii, nunat elatiitni uitalria, kuluvagnek tangnircarluki taiciuq nunat iteryaraatnun, yuut ilakluki taukugnun agayunaluteng.

¹⁴Apostle-aak-llu Barnabas Paul-aaq-llu elpengamek, aturatek ullirqakek pulaarlutek-llu yugnun qanpaglutek,

¹⁵“Ukuut, ciin waten piceci? Wangkuk yuugukuk elpecicetun ayuqlunuk, tau͡gaam qaneryaramek taitamegceci makunek caunrilngurnek causqelluci unguvapialriamun Agayutmun, qiliim nunam-llu, imarpiim-llu imartuumarmi piliaqestiinun.

¹⁶Imumirpak nunam yui uitacaaqai umyuangutaciicetun pisqelluki.

¹⁷Tau͡gken nallunaicaaquq aulukicia, ellallircet'laaku pakmaken, cat nauvkarluki neqkarpecen̄ek ilukegcivkarluci.”

¹⁸Makunek qanerlutek cayaqlirluki taqevkarakek agayuyulriit ellmegnun.

¹⁹Tau͡gaam Jews-aat tekitut Antioch-amek Iconium-aamek-llu, yugugaat-llu unakngamegteki, Paul-aaq teggalqunek miluquat, nunat-llu elatiitnun qamurluku tuqumayukluku.

²⁰Tau͡gaam ukverumalriit uivarucatni maktuq, nunanun-llu iterluni. Unuaquan-llu Barnabas-aaq-llu Derbe-mun ayagtuk.

²¹Tuani-llu qaneryaraqegtaar qalarutkumariamegnegu, amlleret-llu ukvengata, utertuk Lystra-mun Iconium-aamun-llu Antioch-amun-llu,

²²ukverumalriit-llu asvaircarakek, eguaqurluki-llu ukverat pegtesqevkenaku, nalqigulluki-llu caknernarqelriakun Agayutem Angayuqauvianun itrarkauniluta.

²³Agayuvigni-llu tamaitni aperturilartuk ciuliqagtekaitnek; yagluteng-llu piicaulluki, Atanermun ukvekek'ngaatnun nayumiqasqelluki.

²⁴Pisidia-llu tumekluku Pamphylia-mun tekituk.

²⁵Perga-mi-llu qaneryariurraarlutek atrartuk Attalia-mun.

²⁶Tuaken-llu tengalrakun Antioch-amun ayagtuk, tuavet kingunermegnun, man'a caliartek yaguteqatallragni piicautellruicetek Agayutem naklekutiinun pekyutesqellukek.

²⁷Tekicamek-llu agayuviim yui quyurcetakek, qanemcilluki-llu cat tamalkuitnek Agayutem caliaranek ellmegnegun, agayumanrilnguut-llu ukverem amiiganek ikirutniluki.

²⁸Tuantuk-llu akaarnun ukverumalriani.