Read Yupik Acts 18 Bible Online

Acts 18 - Yupik bible

Acts 18

¹Makut-llu kinguatni Paul-aaq Athen-aamek ayagtuq Corinthia-mun-llu tekilluni.

²Nall'arkengluni-llu Jews-aamek atengqerrluni Aquila, Pontus-aami yuurtellruluni, tekitnerra'arluni Italy-mek, nuliani-llu Priscilla; Claudius-aam picirkilliniateng Jews-aat tamalkuita Rome-amek ayaasqelluki; elkegnun-llu ullautuq.

³Caliatek ayuqngata uitallgutkaak calillguteklukek-llu, pelatekisten͞guamek.

⁴Sabbath-aat-llu tamaita qallataqluni agayuvigmi Jews-aat Greek-aat-llu ukvengevkarluki.

⁵Silas-aankuk-llu Timothy-llu tekicagnek Macedonia-mek, Paul-aam qaneryaraq tamalkirrluku qalarutkaa Jews-aanun Jesus-aaq Christ-auniluku.

⁶Inglulicata-llu caarrlugnek-llu qallalluteng, aturani evcugluki qanertuq ellaitnun, “Elpeci augci qamiqurpecen̄un pikili wangnun tusnganrituq! Wak'nirnek Jews-aarunrilngurnun ayagciqua.”

⁷Tuaken-llu ayiimi taukumiut iliita eniinun itertuq, atengqellriim Titius-Justus-aamek, Agayutem qigcikestiin, ilani-llu tamarmeng agayuvigmun ilausngaluteng.

⁸Crispus-aaq-llu, agayuvigmun atanrulria, ukvertuq Atanermun, ilai-llu tamarmeng, Corinthia-naat-llu amlleret niicameng ukvertut angllurcetevkarluteng-llu.

⁹Atanrem-llu Paul-aaq qavangurtullrakun qanrutaa, “Alingevkenak, tau͡gaam egmian qallaskina nepaicaqunak-llu;

¹⁰tua-i nayuamken wii, yuum-llu aknirrngaitaaten, tua-i amllernek yungqerrama wani nunarpagni.”

¹¹Tuani-llu uitaluni allrakumi ataucimi iraluni-llu arvinlegni, elitnaurutekluku Agayutem qaneryaraa taukumiunun.

¹²Gallio-llu atanrullrani Achaia-mi, Jews-aat inglulitut Paul-aamun, qanercetaarviim-llu aqumllertaanun ullaulluku,

¹³qanerluteng, “Uum angutem ayuqucirturai yuut Agayun ciktaarvikesqelluku alerquutet aturpek'naki.”

¹⁴Paul-aaq-llu qanerciqiaqanrakun, Gallio qanertuq Jews-aanun, “Man'a assiilnguukan picurlagpautngukan-llu, niicugningnaqsaramci.

¹⁵Tau͡gaam apyutngukata wall'u atrukata wall'u elpeci inerquutekekuvciki, elpecen̄ek aulukiciu, qanercetaarutngungaitua waten ayuqelriamun.”

¹⁶Qanercetaarviim-llu aqumllertaanek ayagcetai.

¹⁷Tamarmeng-llu Greek-aat Sosthenes, agayuviim atanra teguat, piqertuarluku-llu qanercetaarviim aqumllertaan ciuqerrani, tau͡gaam Gallio-m catkenritai makut.

¹⁸Mat'um-llu kinguani Paul-aaq uitauq cali akaarnun, nutaan-llu ilani unilluki ayagtuq Syria-mun, Priscilla Aquila-llu maliklukek, asmeggluki-llu nuyani Cenchrea-mi akqillruami.

¹⁹Tekilluni-llu Ephesus-aamun, unillukek-llu tuavet, tau͡gaam ellii agayuvigmun itertuq qallatellgutekluki-llu Jews-aat.

²⁰Tuanteqaasqessaaqengraatni-llu, piyunrituq.

²¹Tau͡gaam tua-ingunrituurai, qanerluni, “Agayunerpaliyanricunaitua Jerusalem-aamun, tau͡gaam tekitenqigciiqua elpecen̄un Agayutem pisqumakanga.” Ayagluni-llu tuaken Ephesus-aamek angyakun.

²²Tekicami-llu Caesarea-mun, agayuviim yui tangerrsarturai, nutaan-llu atrarluni Antioch-amun.

²³Tuantaraqerraarluni-llu ayagtuq, Galatia-m nunii tamalkuan tumekluku Phrygia-llu tungliquciicetun, pinirivkarluki elitnaurat tamalkuita.

²⁴Jews-aat-llu iliit Apollos, Alexandria-mi yuurtelleq, puqilria, qaneryaranek-llu elisngaluni, tekituq Ephesus-aamun.

²⁵Una angun ayuqucirtuumallruuq Atanrem qaneryaraakun; ellii ilungluni anernerkun qallatelartuq, elitnauriluni-llu cumiggluni Atanrem piinek, John-aam angllurceciyaraa nalliikun nallunrilngermiu.

²⁶Civuuravkenani-llu qallatuq agayuvigmi, tau͡gaam Priscilla-m Aquila-m-llu qanellri niilluki, ellmegnun taivkarluku elitnauvsiaraak Agayutem piinek.

²⁷Ayagyuan-llu Achaia-mun, ilateng igarait elitnaurat, ciuniuresqelluku. Ellii-llu tekicami, ikayuaqapigtai naklekutekun ukvelriit.

²⁸Tua-i elliin ukvengevkaamiki Jews-aat quyurrluki, qallatellermikun qaneryaratgun nasvagluku Jesus-aaq Christ-aucianek.