Read Yupik Acts 2 Bible Online

Acts 2 - Yupik bible

Acts 2

¹Pentecost-am erenra tekican, tamarmeng quyungqallruut ataucimi.

²Alqunaq-llu culugiuq, tuarpiaq anuqerpiim culugia, ena-llu uitavikellrat imirluku.

³Tangertut-llu alungutngalngurnek kenernek, avvluteng ellaitnun-llu tull'uteng.

⁴Tamarmeng-llu Anernermek Tanqilriamek imangut, qaneryarallgutkenrilnguut-llu qanlauciicetun qalarrluteng, cikiumatacimegcetun Anernerkun.

⁵Jerusalem-aami-llu Jews-aat ellualriit uitaut, nunanek qaneryarallgutkenrilngurnek tamaitnek tekitellriit.

⁶Tamana-llu nepii niicamegteggu yugugaat quyurtut, ayuquciitaat-llu; tamalkurmeng ellaita qanlaucimegcetun qalarcata.

⁷Tamalkurmeng-llu alangaartut irr'iluteng, qanruyulluteng-llu, “Tangerrluku, ukut-qaa qalartellriit Galilee-armiunguyaaqut?

⁸Qaillun wani-wa niiceta nakmiin qaneryaramteggun qalartellriit?

⁹Wangkuta Parthian-aarmiuni, Medes-aarmiuni, Elamites-aarmiuni-llu, ilaput-llu Mesopotamia-rmiunguut, Judea-rmiut-wa. Cappadocia-rmiut, Pontus-aarmiut-llu, taukut Asia-melnguut.

¹⁰Phrygia-rmiut-wa, Pamphylia-melnguut-llu, Egypt-aarmiut, Libya-rmiut-llu, Cyrene-am yaaqsinrilkai. Ilait-llu Rome-amek kingunengqertut, Jews-aaruluteng ilait, ilait-llu caullruluteng agayumanrilngurnek.

¹¹Ilaput-llu Cretan-aarmiunguut, Arabia-rmiut-llu; tau͡gaam niitaput qaneryaramteggun qalartellriit Agayutem irr'inarqelrialiarinek.”

¹²Tamalkurmeng-llu irriut, nalirruggluteng apqaurulluteng-llu, “Camek man'a kangingqerta?”

¹³Ilaita tau͡gaam piciliutekluki qanertut, “Ukut taangiqelriaruut!”

¹⁴Tau͡gaam Peter, nangerrluni ilakluki qula ataucimek cipnelget, yuut qalarutai qastuluni, “Judea-melngurni, Jerusalem-aamelngurni-llu, nalirrugtevkenaci mat'umek, tau͡gaam murilkiciki qaneryaranka.

¹⁵Ukut umyuarteqlerpecetun taangiqelriarunritut sass'aq pingayunun tau͡gaam tekican.

¹⁶Tau͡gaam man'a waniwauguq qanrutkumalria, Prophet-aakun Joel-aakun,

¹⁷‘Agayun waten qanertuq: Nangneqlirni ernerni Anerneqa tuc'eciiqaqa yugnun tamalkuitnun. Qetunraci panici-llu nallunairiarkaugut, ayagyualriit-llu tangrruarciqut, angukarnat-llu qavangurturciqut.

¹⁸Pisten̄un-llu tamaitnun angutnun arnanun-llu Anerneqa tucetarkaugaqa taum nalliini, taukut-llu nallunairiciqut.

¹⁹Irr'inarqelrianek-llu qilagmi tangerceciiqamci, nunam-llu qaingani nallunailkutanek, wani-wa augmek kenermek-llu arugpalriamek-llu.

²⁰Akerta tan'geriarkauguq, iraluq-llu augurrluni, imna Atanrem erenra irranarqelria pivailgan.

²¹Tua-i-llu, kina-llu imna Agayutem atranun qayagaulria anirtuumaarkauguq.’

²²“Israel-aarmiuni, qaneryaranka niiciki: Jesus-aaq Nazareth-aarmiu, Agayutem nallunaiqii irr'inarqelrialiarikun iillanarqelriatgun-llu nallunailkutetgun-llu, Agayutem akunlevcen̄i piliarikun elliikun. Elpeci tua-i nallunrilkeci.

²³Tauna Agayutem picirkiuciatun pisquciatun-llu teguarci, assiilngiumalriit-llu unataitgun ussukcautarci tuqulluku-llu.

²⁴Agayutem tau͡gaam unguircetaa, tuqum pinia cirlakluku, tuqumi uitangailan.

²⁵Wani-wa David-aam qanrutkaa waten, ‘Agayun caumarrlainalaraqa, tallirpima tunglirneranelan pektayiitesqellua.

²⁶Taumek ircaquqa angnirtuq, alungutka-llu quyaluni; cali-llu kemka neryuniurutmi uitaciquq;

²⁷yuuciqa anerneret ayagviatni uitavkarngailavgu, tunngailavgu-llu Qetunraan ellualria arullerkaanun.

²⁸Unguvam ayuqucia aperturan wangnun; quyavkarciqerpenga ilakuyucimegnegun.’

²⁹“Ilamaa, qanrutqataramci nallunrilkevcen̄ek, David-aam ciuliamta tuqullranek tungmagcimallranek-llu; qungua-llu tauna nallunritarput man'a engelkarrluku.

³⁰Tau͡gaam prophet-aaruami, nallunrilamiu-llu Agayutem akqutii, angayuqauvimi aqumllertaani aqumarkaq, kinguvemi iliit.

³¹Tuaten nallunairiluni qanrutkaa Christ-am unguillerkaa, anerneret uitaviatni uitaarkaunritniluku, temii-llu arumaarkaunritniluku.

³²Una Jesus-aaq Agayutem unguircetaa, tamamta-llu nallunairistekaakut.

³³Taumek Agayutem tallirpianun qulmurcimariami; Aatam-llu akqutiinek, Anernermek Tanqilriamek, pingumariami tauna tucetaa wani-wa tangrrucimcetun niiyucimcetun-llu.

³⁴David qilagmun mayullrunrituq, tau͡gaam qanertuq waten, ‘Ataneq qanertuq Atanemnun, tallirpima tungiinun aqumi,

³⁵inglukesteten it'gavnun tutmarviurrnatkamnun.’

³⁶Taumek Israel-aam yuin tamarmeng ilumun nallunrillitgu, Agayutem Atanrurcetaa Christ-aurtelluku-llu una Jesus-aaq ussukcautellerci.”

³⁷Man'a niicamegteggu ircaqruatnun agtuutuq, qanerluteng-llu Peter-aamun ilainun-llu apostle-aanun, “Ilamtaa ukuut, qaillun piciqseta?”

³⁸Peter-aam qanrutai, “Umyualinqigci, angllurluci-llu tamalkurpeci Jesus Christ-am atranun, assiilnguirumallerkarpecen̄un. Anernermek-llu Tanqilriamek cikiumaciquci.

³⁹Wani-wa elpecen̄un akqutnguuq irniarpecen̄un-llu, tamalkuitnun-llu yaaqsingraata, kinkunun imkunun Atanemta Agayutem kelgarkainun.”

⁴⁰Allanek-llu qaneryaranek amllernek nallunairiuq, eguaqurluki-llu qanerluni, “Elpecen̄ek anirturci ukunek yugyallgutkelrianek piciunrilngurnek.”

⁴¹Qanellranek-llu ciuniurilriit angllurtut; tuani-llu ernermi yuut ilautellriit tiissitsaaruut pingayun.

⁴²Taqeksaunateng-llu apostle-aanun elitnaurcet'lartut, ilakuyucameng-llu nerellgutek'lartut piicallgutekluteng-llu.

⁴³Tamarmeng-llu yuut civuurangut, iillanarqelriit-llu irr'inarqelriit-llu amlleret apostle-aatgun alairtut.

⁴⁴Tamarmeng-llu ukverumalriit ataucimtelartut, aklullgutekluteng-llu.

⁴⁵Cali-llu nunauteteng tunait piuteteng-llu, akinguteteng-llu aruqutekluki tamalkuitnun piilutaciicetun.

⁴⁶Unuaquaqan-llu Agayuvigmun quyurterrlainalartut ataucimek umyuarluteng, enemeggni-llu ilakuyun atularaat. Kelipaq itumlluku neqkarteng tuaten quyatekerrlainarluku, umyugaat-llu segganqeggluni.

⁴⁷Nanrarluku-llu Agayun, yugni tamaitni canganaunateng. Anirtuumalrianek-llu Agayutem unuaquaqan ilangevkalarai.