Read Yupik Acts 20 Bible Online

Acts 20 - Yupik bible

Acts 20

¹Nepairata-llu, Paul-aam elitnaurani taivkarai qaruqaarluki-llu unitai, ayagluni-llu Macedonia-mun.

²Tamakumiut qaqicamiki qarucimariamiki-llu tekituq Greek-aanun,

³uitaluni-llu iraluni pingayuni. Angyakun-llu Syria-mun ayakataullruan Jews-aat ingcuraat. Taumek ellii Macedonia-kun pitngu'rtuq.

⁴Ukut-llu pillguciraat Asia-mun, Sopater Berea-rmiu, Thessalonica-rmiuk-llu Aristarchus, Secundus-aaq-llu, Derbe-rmiu-llu Gaius, Timothy-llu, cali-llu Asia-rmiuk Tychicus Trophimus-llu.

⁵Taukut ciumten̄i ayagluteng utaqaitkut Troas-aami.

⁶Ayagtukut-llu angyakun Philippi-mek, quulciiriyarailngurnek kelipartularviata kinguani; erenret-llu tallimiitni Troas-aamun tekilluta, tuani-llu uitaluta malrunlegni ernerni.

⁷Nitilim-llu erenrin ciuqliatni, elitnaurai quyungqallratni nerellgutekluteng, Paul-aam qalarutai, unuaqu ayakataami, qalarcimaluni-llu unuum qukallranun.

⁸Kenurralirtuq tamana qulliq quyungqaviat.

⁹Yun'errartangqertuq-llu Eutychus-aamek aterluni, egalermi aqumgaluni qavangelliniuq. Paul-aaq-llu qallasngiinaan tauna acivarluni qavanguq, enet-llu qulmun pingayuatnek igtuq. Maaten piat tuqumaluni.

¹⁰Paul-aam-llu atraami akuqeraa, qanerluni, “Tavenrici, unguvii elliincan.”

¹¹Ataam-llu mayuami kelipamek-llu nerngami, akaarnun cali qallatuq errvianun, nutaan-llu ayagluni.

¹²Yun'erraq-llu tauna unguvaan ayautaat, quyaqapiggluteng.

¹³Ciungakun-llu ayagtukut angyakun Assos-aamun, tuani Paul-aaq eknaluku, picirkillratun; ellii nunakun nangrrarmi piyugluni.

¹⁴Assos-aami-llu tekicakut ek'arput Mitylene-amun-llu tekilluta.

¹⁵Tuaken-llu tengalraamta unuaquan tekitukut Chios-aamun; unuaquan-llu Samos-aamun tekilluta, uitaqerluta-llu Trogyllium-aami, unuaquan-llu Miletus-aamun.

¹⁶Ellii Paul-aaq umyuangami Ephesus-aami egmian kiturarkauluni, Asia-mun tagkuni uamn̄ayukluni, patagtungami piyunarqekuni Jerusalem-aamun tekingnaqnaluni, Pentecost-am erenrani.

¹⁷Miletus-aami-llu ayagceciuq Ephesus-aamun, Agayuviim ciuliqagtai taisqelluki.

¹⁸Ulliitni-llu qanrutai, “Nallunritarpecia Asia-mun tekiqaanemnek qaillun ayuquciqa kesianek.

¹⁹Kevgiurluku Ataneq, umyuamkun pivakevkenii, iluteqaqlua naspaamaaqlua-llu, Jews-aat ingcullratni.

²⁰Camek-llu iirutellrunritamci atawakarkarpecen̄ek, tau͡gaam nasvitellruluci ayuqucirturluci-llu quyurrvigni eneni-llu.

²¹Umyualinqigcaraq nallunairutekluku Jews-aanun Greek-aanun-llu Agayutem tungiinun, ukveq-llu Atanemten̄un Jesus-aamun Christ-amun.

²²Tangerrluku-llu, wani-wa Jerusalem-aamun ayakatartua, qillerqumapigainarlua Anernerkun, nalluluki tut'arkat wangnun.

²³Tau͡gaam nunani tumeklemni Anerneq Tanqilria nallunairistek'larqa qillerqumallerkamnek nangteqlerkamnek-llu.

²⁴Tau͡gaam tamakut pekcetenritaatnga unguvaka-llu qunukenritaqa, caliaqa qaqiskumku angnirciqngama, akurtulqa-llu caliaqesqutii Atanrem Jesus-aam Agayutem naklekutii nallunairesqelluku.

²⁵Tangerrluku-llu, watua, nallunritamci qalaruskengamni qiliim angayuqauvianek, wak'nirnek kegginaqa tangenqiggngaitarci.

²⁶Taumek mat'umi ernermi nalqigglua qanrutamci, yuum auga wangnun tusngangaituq.

²⁷Cakaaritenrilamci Agayutem pisqutiinek.

²⁸Taumek murilkici elpecen̄ek, quyungqalrianun-llu, Anernerem Tanqilriim qaunqesten͞guruciatun, nerevkararkauluku Agayutem Agayuvia, aumikun kiputellra.

²⁹Wani-wa nallunaituq uniskumci keglunret alingnarqelriit piciqngaceci, uitasngaunaci katngarrani.

³⁰Tuaten-llu ilavcen̄ek yuut alairarkaugut qannguarluteng, elitnauraungraata ellmeggnun cauvkarluki.

³¹Taumek murilkici, neq'akluku allrakuni pingayuni aarcirtuutekelqa tamaitnun, erenrani unugtuumaan-llu aluvilluaqlua.

³²Wani-wa-llu, anelgutmaa, Agayutmun pisqamci qaneryarartaanun-llu kenkiin. Elliin naucugngiici, paitarkitarkauluci-llu ilakluki carriumalriit.

³³Yuum akiutiinek wall'u suulutaamek akluanek-llu ayarillrunritua.

³⁴Nallunrilkevcia ukut unatma tau͡gaam aulukellruatnga piilutemnek, calillgutenka-llu.

³⁵Picirkiramci tamalkuitni caliurluci cailnguut aulukesqelluki, umyuaqiciu-llu qaneryaraa Atanerpeci Jesus-aam waten, ‘Atawaunruuq cikiqenglleq akurtunermi.’”

³⁶Tuaten-llu qanrumariami ciisqumigtuq piicallgutekluki-llu taukut.

³⁷Tamarmeng-llu iluteqeqapiggluteng akuqaquat uyaqurruikun melugarluku-llu.

³⁸Angniilutkenruat-llu tamalkuitni qanellrini, qanran tangenqiggngaitniluku kegginani, ellaita-llu angyamun maligtaat.