Read Yupik Acts 21 Bible Online

Acts 21 - Yupik bible

Acts 21

¹Piuq-llu unicamteki angyakun-llu ayiimta nalletmun Cos ullagluku, unuaquan-llu cali Rhodes-aamun tekilluta, tuaken-llu Patara-mun.

²Angyamek-llu nall'arkengamta, Phoenicia-mun ayakatalriamek, ek'ukut ayagluta-llu.

³Cyprus-aaq igvaamteggu iqsulirneqluku kiturarput Syria-mun, Tyre-amun-llu arulairluta, tuani uciirarkaullruan angyarput.

⁴Ukverumalrianek nataqucamta, tuani uitaukut ernerni malrunlegni; taukut Anernerkun Paul-aaq inerquraat Jerusalem-aamun ayaasqevkenaku.

⁵Pinarian-llu ayagtukut. Ellaita-llu arnartuumarmeng mikelngurtuumarmeng-llu, maligtaitkut nunat elatiitnun; cen̄ami-llu ciisqumiggluta piicagtukut.

⁶Tua-ingunrituurraarluki angyamun ek'ukut, ellait-llu kingunermeggnun uterrluteng.

⁷Iquklican-llu tumvut Tyre-amek, tekitukut Ptolemais-aamun, angniutaput-llu anelgutput ernermi ataucimi uitaluta.

⁸Unuaquan-llu wangkuta Paul-aam ilaini ayagtukut, tekilluta-llu Caesarea-mun. Philip-aam-llu qaneryariurtem eniinun itertukut, wani-wa imkut malrunelgen iliit; uitaluta-llu elliini.

⁹Tauna yuk paningqertuq cetamanek neviarcarnek, aipangeksailngurnek, tamarmeng qaneryariutuluteng.

¹⁰Akaarnun-llu tuantellemten̄i, tekitellriartangqellruuq Judea-mek prophet-aaruluni atengqerrluni Agabus.

¹¹Tekicamikut-llu Paul-aam naqugutii tegua, ellminek-llu unatni it'gani-llu qillerrluki qanertuq, “Waten qanertuq Anerneq Tanqilria, ‘Tuaten Jerusalem-aami Jews-aat qillerqeciqaat yuk uum naqugutkestii, tunciqaat-llu agayumanrilnguut unataitnun.’”

¹²Makunek niicamta, tamamta wangkuta tamakumiut-llu inerqurarput ayaasqevkenaku Jerusalem-aamun.

¹³Paul-aam kiugaakut, “Caluci qiaceci iluteqevkarlua? Upingariama qillerqumaqainararkauvkenii, tau͡gaam tuquarkaulua-llu Jerusalem-aami Atanrem Jesus-aam atra pitekluku.”

¹⁴Taqngailan-llu uitatarput, qanerluta, “Atanrem pisqutii piuli.”

¹⁵Erenret tamakut pelluata uptukut Jerusalem-aamun-llu mayurluta.

¹⁶Caesarea-mek-llu elitnaurat ilaita maligtaitkut, ilakluku Mnason Cyprus-aarmiu ciuqvanek elitnauraq, ciunirvigkarput.

¹⁷Jerusalem-aamun-llu tekicamta, ilamta ciuniuraitkut quyaluteng.

¹⁸Unuaquan-llu Paul-aaq malikluku James ullagarput, ciulirneret-llu nanelnguunateng tuantut.

¹⁹Angniucamiki-llu nalqigutenqegcarai Agayutem caliaranek elliin kevgiullermikun Agayumanrilngurni.

²⁰Taukut niicamegteggu Agayun ucuqaat, qanrulluku, “Anelgutemtaa, usuuq, tangrraten tiissitsaarugaat Jews-aat ukverumalriit, tamarmeng-llu Alerquutet ciumuruskait.

²¹Niitelaraatgen-llu ayuqucirturilarniluten Jews-aanek Agayumanrilnguut nuniitni cakaarluku Moses-aaq, qanraqluten irniarit nuugirisqevkenaki piciryarait-llu maligtaqusqevkenaki.

²²Taumek qaillun piciqseta? Ullautenrilngailata yugugaat maanlucin niiskunegteggu.

²³Waten tau͡gaam pikina, ilangqertukut angutnek cetamanek Agayutmun akqimalrianek.

²⁴Taukunun ilaulluten menuircallgutkiki, akiliulluki-llu asmeggnaurait qamiquteng. Tuaggun yuut nallunritnauraat niitellermeng piciunriluciat, tau͡gaam-llu elluarrluten egilrucin, alerquutet-llu maligtaquluki.

²⁵Tau͡gaam Jews-aarunrilnguut ukvelriarurtellriit pitekluki, ak'a igallruaput picirkirluki agayutnguanun tunumalrianek nerlaasqevkenaki, augmek-llu, kemegnek-llu augiumanrilngurnek, akusrarutekilaasqevkenaki-llu.”

²⁶Unuaquan taukut ilakluki, menuircallruami agayuvigmun itertuq yuut nallunritesqelluki menuircallmi qaqiyucianek, tuanlluni-llu cikiutait ekuamarillerkaata engeliinun.

²⁷Erenret-llu malrunelgen pellugniaraata, Jews-aat Asia-mek kingunelget, Agayuvigmi tangrramegteggu yugugaat ayuqenriqercetait taukut tungiitnun, teguvkarluku-llu.

²⁸Qayagaut-llu, “Israel-aani ukuut, ikayurcikut! Wani-wa imna nunanun tamaitnun ullautelalleq, ayuqucirturiaqluni Jews-aat inglukluki, Alerquutait-llu, agayuvigput-llu una, Greek-aanek-llu itrutuq agayuvigmun menulirluku.”

²⁹(Tangellruamegteggu tamatum ciungani aipaqevkarluku Trophimus, Ephesus-aarmiu, agayuvigmun-llu itrutellruyukluku.)

³⁰Nunat-llu pek'ngut, yuut-llu quyurcameng, Paul-aaq teguat qamurluku-llu anqerrutaat; amiiget-llu palulluki.

³¹Tuqutessaallratni-llu anguyagtet atanrata niitai nunat nep'ngellratni.

³²Patagmek-llu anguyagten̄ek piluni atanerruaritnek-llu, atrarvikai, taukut-llu tangrramegteki anguyagtet atanrat-llu, Paul-aaq kaugtuanriraat.

³³Anguyagtet-llu atanrata tekicamiu tegua ellimertuulluku-llu qillertesqelluku kalivnernek malruinek; apyutkaa-llu kituucianek picurlautiinek-llu.

³⁴Ellaita-llu yugugaat qanrutkaat ayuqevkenateng, neplillratni-llu taringesciigalamiu ellimertuutaa anguyagtet eniitnun ayautesqelluku.

³⁵Mayuryarat-llu tekicamegteki, anguyagtet Paul-aaq nalugluku mayuutaat, yuut mulngakevkenaku piatgu.

³⁶Yugugaat-llu maligutut, qayagaluteng, “Ayauciu!”

³⁷Itrutqatallratni, Paul-aam aptaa anguyagtet atanrat, “Qanrucugyaaqamken.” Elliin-llu kiugaa, “Waqaa, Greek-aacetun-qaa qantuuten?

³⁸Taungunrituten-qaa Egypt-aarmiu, imumi inglulitelleq, tuqucitulit quyurrluki tiissitsaat cetaman yuilqumun-llu ciuliqaggluki?”

³⁹Paul-aam kiugaa, “Wii Jews-aat ilakaatnga, Tarsus-aarmiungulua. Cilicia-melngurmi, nunat assilriit nunakanka. Qalartessnga yugnun.”

⁴⁰Pisqen͞gani-llu Paul-aaq nangertuq mayuryarat qaingatnun yuut elucira'arluki. Nepairata-llu qalarutai Hebrews-aat qanlauciicetun.