Read Yupik Acts 23 Bible Online

Acts 23 - Yupik bible

Acts 23

¹Paul-aam tangvaurluki Qaillukuartet qanrutai, “Ilamaa, Agayutem tungiinun umyuarniurutaitua erneq man'a engelkarrluku.”

²Agayulirten͞gunrem-llu Ananias-aam ellimertuutaa caniqliinun qanrakun patpaasqelluku.

³Paul-aam-llu qanrutaa, “Elpet, qacarnermi urasqercimalriami, Agayutem piqerturciqaaten! Qanercetaaqataryaaqerpenga Alerquutet aturluki, amta-llu patpaasqellua inerquutmek?”

⁴Caniqliin qanrutaat, “Qacungakan-qaa Agayutem agayulirten͞gunra?”

⁵Paul-aaq kiuguq agayulirten͞gunrucia nalluaqa igausngiin, “Yuut atanirturtiit assiilngurkun qanruteksunaitan.”

⁶Elpekngamiki Paul-aam avgit Pharisee-aaruciat avgit-llu Sadducee-aaruluteng, qayagpagai qaillukuartet, “Ilamaa, wii Pharisee-aat ilakaatnga, Pharisee-aam-llu yuklua, unguillerkamnek neryuniurutka pitekluku qanercetaarumaunga.”

⁷Tuaten qanran, Pharisee-aat Sadducee-aat-llu ayuqenriqertut, avegluteng-llu qaillukuartet.

⁸Sadducee-aat qanlaameng maktellerkartaitniluku an'gilartaitniluku-llu, Pharisee-aat tau͡gaam tamakut ukveqait.

⁹Nep'ngartut-llu. Igatulit-llu Pharisee-aat ilait nangerrluteng inglulitut, qanerluteng, “Wangkutni una yuk canganarqutaituq; tau͡gaam-llu Anernerem wall'u an'gilam qanrutellrukaku Agayun inglukenrillaut.”

¹⁰Ayuqenririinaata, anguyagtet atanrata Paul-aaq qecugnayukluku ellimertuutaa allurtesqelluki, itrutesqelluku-llu anguyagtet eniitnun.

¹¹Unuquan-llu Ataneq nangengqauq caniani, qanrulluku-llu, “Caceturi, Paul-aaq Jerusalem-aami wangnek nallunairillrucirpetun, tuaten cali Rome-ami nallunairutekciqerpenga.”

¹²Unuaquan, Jews-aat ilait picirkiurtut ellmeggnek aniqlaaluteng, qanerluteng, Paul-aaq tuqupailegmegteggu camek nerngaitniluteng, merngaunateng-llu.

¹³Tuaten picirkiulriit amllertaut yuinaak malruk cipingalutek.

¹⁴Ullagait-llu agayulirten͞gunret ciulirneret-llu, qanerluteng, “Picirkiurtukut wangkutnek aniqlaaluta camek nerngaitniluta tuqupailemteggu Paul-aaq.

¹⁵Taumek elpeci Qaillukuarten̄i, ilakluki qanruskiciu anguyagtet atanrat, unuaqu cali atrautesqelluku elpecen̄un apqauvsiarcetnaluku, wangkuta-llu alapen'errluku atrausnginanratni tuquciiqerput.”

¹⁶Paul-aam-llu usruan niicamiu tuaten piqatauciat, anguyagtet eniitnun itertuq Paul-aaq qanrucarturluku.

¹⁷Paul-aam-llu atanerruat iliit taisqaa qanrulluku, “Una yun'erraq anguyagtet atanratnun ullausgu qanerkangqerran elliinun.”

¹⁸Taum-llu ayautaa anguyagtet atanratnun qanrulluku, “Itengqalriim Paul-aam ellminun taisqellruanga una yun'erraq elpenun ullautesqelluku, qanerkangqerran-gguq elpenun.”

¹⁹Tua-i-llu anguyagtet atanrata tass'uqluku allakaqautaa, kiimenaku apqaurluku, “Camek qanerkangqercit wangnun?”

²⁰Qanertuq-llu, “Jews-aat picirkillruut apcugluten Paul-aaq unuaqu atrautesqumaluku qaillukuarten̄un apqauvsiarcetnaluku.

²¹Tau͡gaam niicaqunaki, elavluteng kellucata angutet yuinaak malruk cipingalutek picirkiullermegteggun, ellmeggnek aniqlaaluteng nerngaitniluteng merngaunateng-llu tuqupailegmegteggu, wani-wa upingaut utaqalgirluteng elpenun akeqnayukluteng.”

²²Tua-i anguyagtet atanrata yun'erraq ayagcetaa qanrulluku, “Yugmun qaneryaqunak, makunek nasvallerpenek wangnun.”

²³Atanerruagnek-llu malrugnek pisqiuq qanrullukek, “Uptek anguyagten̄ek yuinarnek qulnek (200) ayagarkanek Caesarea-mun horse-aalegnek-llu yuinarnek qulnek (200) unuku sass'at pingayuatni ayagarkauluteng.

²⁴Paul-aam-llu ugingavigkai horse-aat upluki, cavkenaku Felix-aamun, nunam Atanranun atrautesqelluku.”

²⁵Kalikamek-llu igartuq waten qanerluni,

²⁶“Wii, Claudius Lysias umyuaqutmek tuyuramken elpet, Felix, nunam Atanrani Takarnarqelriami.

²⁷Yuk una Jews-aat tegullruat tuquteqataryaaqluku-llu, tau͡gaam anguyagten̄ek maliglua anirturaqa, elpekngamku Roman-aarucianek.

²⁸Picetaaruciatnek kangiiyuama, atrautellruaqa qaillukuarviatnun.

²⁹Tua-i elpekanka ellaita alerquutmegteggun picetaaruciatnek, camek picurlagmek tuqutnarqutailengraan itengqanarqutaunani-llu.

³⁰Niicamku-llu Jews-aanun tuqucugniluku, elpenun egmian ayagcetaqa, picetaarutestai-llu alerqurluki elpet ciuqerpeni picetaarutesqelluku. Tua-ingunrituq.”

³¹Tua-i anguyagtet alerquumacimegcetun, unugmi Paul-aaq ayautaat Antipatris engelkarrluku.

³²Unuaquan-llu anguyagtet nangrrarmialriit utertut nunameggnun horse-aalget avvluki engelliutestekai.

³³Taukut Caesarea-mun tekicameng kalikaq tunaat nunam atanranun, Paul-aaq-llu tunluku.

³⁴Nunam-llu atanran kalikaq naaqumariamiu, aptaa camiungucianek. Cilicia-rmiungucia-llu nallunriamiu,

³⁵qanrutaa, “Picetaarutesteten tekiskata qanercetaarciqamken.” Ellimertuutaa-llu, Herod-aam qanercetaarviani uitavkaasqelluku, qaunqescirluku.