Read Yupik Acts 26 Bible Online

Acts 26 - Yupik bible

Acts 26

¹Tua-i-llu Agrippa Paul-aamun qanertuq, “Elpenek qallacugngauten.” Paul-aaq-llu yaggluni ellminek anagyaaqutuq,

²“Quyaunga, Ataneq Agrippa, wangnek nallunairisqen͞gavnga mat'umi ernermi ciuqerpeni, Jews-aat picetaarutellratnek;

³elpet elisngiivki piciryarait qanemyuugautekellrit-llu Jews-aat, taumek kaigavikamken niicugninga patagatevkenii.

⁴Yuulqa ayagyuallemnek ayaglua, nakmiin ilamni Jerusalem-aami nallunritaat Jews-aat tamarmeng.

⁵Nallunairiyukuneng, ellaita nallunritaatnga ciuqvaarnek ayagluteng, Pharisee-aanun elluangnaqelrianun ilakellruciqa.

⁶Watua-llu nangengqaunga qanercetaarumalua-llu neryuniurun pitekluku, Agayutem akqutkellra ciuliamten̄un.

⁷Tauna akqutii ilamta ilakelriit qula malrugnek cipluku neryuniurutkaat, cumiggluteng kevgiurluku Agayun erenret tamalkuitni unugtuumaita-llu, neryuniurutem tekitellerkaanek. Tua-i tamana neryuniurun pitekluku, Ataneq Agrippa, picetaarucimaunga Jews-aani.

⁸Ciin elpeni asguranarqa, Agayutem unguircecillerkaa tuqumalrianek?

⁹Ilumun-llu wiinga umyuarteqellruyaaqua Jesus-aam Nazareth-aarmium atra ingluksunaqsukluku.

¹⁰Tuaten-llu pillruunga Jerusalem-aami, ukvelriit-llu amlleret itercetellruanka, piyunarqucimek pivkarlua agayulirtet atanratnek. Tuqucimallratni-llu, wii-llu pisqumallruanka tuaten.

¹¹Pulengtaq-llu anucimirqecetaalaranka agayuvigni, caunrilkivkaraqluki Jesus-aam atranek, qenrutem-llu pitaciatun malirqalaranka nunanun yaaqsingraata.

¹²“Tuaten pilua ayallemni Damascus-aamun piyunarqucingqerrlua ellimerrumalua-llu agayulirtet atanritnek.

¹³Erenrem qukaani, Ataneq, tumemni tangertua pakmaken tanqigmek akertem tanqinranek, avateka ciqinqerluku egilrallgutenka-llu.

¹⁴Nunamun-llu iqumallemten̄i, erinamek niitua qanerluni wangnun Hebrews-aatun waten, ‘Saul, Saul! Ciin nangpakarcia? Elpenek nangtuten kitngiallerpegun cingilget.’

¹⁵Qanertua-llu, ‘Kituusit, Ataneq?’ Qanertuq-llu, ‘Jesus-aaruunga nangeskengan.

¹⁶Tau͡gaam makluten nangerten, man'a pitekluku alairvikamken kevgaurrnaluten nallunairisten͞gurrluten-llu makunun wangnek tangllerpenun, tamakunun-llu nallunairarkamnun.

¹⁷Yugnek aviutarkauluten Jews-aarunrilngurnek-llu. Tamakunun watua ayagcetamken.

¹⁸Iingit uitesqelluki, tan'germek-llu tuigtesqelluki tanqigmun, tuunrangayiim-llu pinianek Agayutmun, assiilnguitnek-llu au͡g'aritesqelluki, pikangqellgutkesqelluki ellualriarurtellriit, wangnun ukvellratgun.’

¹⁹“Taumek, Ataneq Agrippa, narurcillrunritua qilagmek tangllemnun.

²⁰Tau͡gaam nasvilluki Damascus-aarmiut ciumek, Jerusalem-aami, Judea-m-llu cen̄iini, Jews-aarunrilnguut-llu umyualinqigtellerkaatnek, tuigtesqelluki-llu Agayutmun, umyualinqigcaram-llu caliaranek calisqelluki.

²¹Tamana pitekluku Jews-aat agayuvigmi teguatnga tuqutnalua.

²²Tau͡gaam Agayutmek ikayuumiima man'a tekitaqa, nallunairilua-llu yugnun mikengraata angengraata-llu, allamek qaneqsaunii, prophet-aat Moses-aam-llu qanrutkellratnek tekitarkanek tau͡gaam.

²³Christ-aq nangteqerkaullruniluku, maktarkauluni-llu tuqumalrianek ciuqliugarkauluni, tanqigmek apertuucesqelluki yuut Jews-aarunrilengraata-llu.”

²⁴Makunek-llu ellminek qanran, Festus qanertuq qastuluni, “Paul, ellangqenrituten, elisngarillerpet usviirucetaaten.”

²⁵Tau͡gaam ellii qanertuq, “Usviirutenritua, Festus, tau͡gaam piciulriamek qanertua umyugaitevkenii.

²⁶Ataneq, nallunritaten makut. Taumek wii ancurturpek'nii qanrutamken, nallunrilamku makut iirumanriluciat elpeni, aassaqutekumanrilan man'a.

²⁷Ataneq Agrippa, prophet-aat-qaa ukveqaten? Nallunritamken ukveqaten.”

²⁸Nutaan Agrippa qanertuq Paul-aamun, “Christian-aarurcecarpiararpenga.”

²⁹Paul-aaq-llu qanertuq, “Piyuumiuteka wani-wa Agayutmun, kiivet pivkenak tau͡gaam niicetenka-llu tamalkuita mat'umi ernermi wangtun ayuqlirisqumayaaqluki, kalivnertanka tau͡gaam pivkenaki.”

³⁰Qanrumarian-llu Ataneq nangertuq, atanerruaq-llu Bernice-aq-llu aqumgallgutai-llu.

³¹Ayaumariata-llu, qallatellgutkut qanerluteng, “Una angun tuqutesqutkamek pillrunrituq wall'u itengqatkamek.”

³²Tua-i-llu Agrippa qanertuq Festus-aamun, “Una yuk angicimayartuq, elpekevkallrunrilkuni Caesar-aamun.”