Read Yupik Acts 4 Bible Online

Acts 4 - Yupik bible

Acts 4

¹Tua-i-llu yuut qalarutellragni, Agayulirtet Agayuviim-llu atanran Sadducee-aat-llu ullagagket,

²cangaklukek yugnek qalaruciagnek tuqumalriit maktellerkaatnek Jesus-aakun.

³Teguagket-llu kelucaullukek-llu unuaqullerkaanun, unukataan.

⁴Tau͡gaam amlleret qaneryaramek niitellriit ukvertut; taukut-llu angutait nallmegteggun tallimaurtut tiissitsaat.

⁵Unuaquan-llu Atanirturilriit ciulirneret-llu igatulit-llu Jerusalem-aami quyurtut.

⁶Annas-aaq tuantuq agayulirten͞guneq, Caiaphas-aaq-llu, John-aaq-llu, Alexander-llu, allat-llu cali agayulirten͞gunrem tungelqurri.

⁷Qukaqmiumariamegtekek-llu aptagket, “Camek piunarqucingqerrlutek, cam-llu atrakun mat'umek picetek?”

⁸Peter-aam-llu, Anernermek Tanqilriamek muirumiimi, qalarutai, “Elpeci, Yuut atanirturtaitni ciulirneritni-llu,

⁹ernerpak qanercetaarumakumegnuk, yuum piyuayuilnguum piyuangucia pitekluku, nau͡gg'un-llu assiricianek taum,

¹⁰tamarpeci man'a nallunrilkiciu, Israel-aam-llu yuin tamarmeng nallunrillitgu, Jesus-aam Christ-am Nazareth-aarmium atrakun ussukcautellerpeci, Agayutem-llu tuqumalrianek maktellran, tua-i elliikun una yuk cavkenani takuvcen̄i nangerngauq.

¹¹Wani-wa tauna teggalquq elpecen̄i enelilriani caunrilkellerci, kangiritkaurrluni teggalquuguq.

¹²Allakun-llu anirtuutaitukut, wani-wa-llu qiliim aciani yugni kina at'ngeksailami Anirturilriamek.”

¹³Tangrramegtekek-llu Peter John-aaq-llu alingenriluciagnek, nalluvkenaku-llu elisnganriluciak elitnaullrunriluciak-llu, irr'ikagket; elitaqagket-llu Jesus-aamun ilakellruciagnek.

¹⁴Caniagni-llu anirtullrak tauna nangengqalria tangrramegteggu, qanerviitut.

¹⁵Taumek qaillukuarvigmek anevkarraarlukek, ellmeggnek qaillukuartut,

¹⁶qanerluteng, “Qaillun ukuk piarkauceta? Wani-wa angelriamek irr'inarqelrialiullrak nallunaituq Jerusalem-aarmiuni tamaitni; asgurakviitarput-llu.

¹⁷Tau͡gaam mat'um ayunritlerkaakun yugnun, inerqurnaurput mat'um kinguani yugnun qanenqigtesqevkenakek atermek taumek.”

¹⁸Tua-i taisqen͞gamegtekek inerquragket qalartesqevkenakek watqapik elitnaurilaasqevkenakek-llu Jesus-aam atrakun.

¹⁹Tau͡gaam Peter-aankuk John-aam-llu kiugakek, “Agayutem takuani niisngaarkauyaaqellikemceci Agayutmi niisnganruluci.

²⁰Tau͡gaam wani-wa wangkuk aassaqesciigatapuk tangelpuk niitelpuk-llu.”

²¹Taukut-llu alingcirturraarlukek cali, anevkaragket. Anucimirqecetaaryung'e'rmegtekek, yugnek alingut, tamarmeng yuut nanraumariatgu Agayun tamatumek pillragnek.

²²Tauna-llu yuk yuinaak malruk cipingalutek allrakungqerran irr'inarqelriakun anirtullrak.

²³Anngamek-llu ilamegnun ullautuk qanemcilluki-llu agayulirten͞gunret ciulirneret-llu qanellratnek ellmegnun.

²⁴Taukut-llu niicamegteggu qanemcillrak, erinaseng antaat ataucikun Agayutmun, qanerluteng, “Ataneq, qiliim piliaqestiini, nunam-llu, imarpiim-llu tamaanelnguut-llu tamalkuita,

²⁵Anernerpegun Tanqilriakun, qanellruuten, David-aam ciuliamta qanrakun waten, ‘Ciin Agayumanrilnguut kitngiartat qiivluteng-llu? Ciin-llu yuut umyuangcartat atuugarkaunrilngurnek?

²⁶Nunam angayuqai taigut, atanirturilriit-llu quyurrvikaat inglukluku Ataneq Agayun Christ-aq-llu.’

²⁷Tua-i ilumun ukuni nunani Jesus-aaq inglukluku, yuun Kenciknarqelria minguumalriartan, quyurtellruut Herod-aaq Pontius-aaq-llu Pilate-aaq, ilakluki agayumanrilnguut, Israel-aam-llu yui;

²⁸tuaten pinaluku pinirpet pisquciatun picirkiucirpetun-llu ciunguluku.

²⁹Watua-llu tangerki, ilungluteng alingcirtuutait; pisteten-llu cikirki alingitmek, qaneryaran qalaruteknauraat taqaunateng.

³⁰Unateten yaggluki anirturilaqina yugnek, nallunailkutat irr'inarqelriit-llu pivkarluki yugpet Kenciknarqelriim atrakun, Jesus-aam.”

³¹Piicaumariata-llu, ena quyurrvikellrat tauna arulacimauq, tamarmeng-llu Anernermek Tanqilriamek imangut, qalarutkaat-llu Agayutem qaneryaraa, alingunateng.

³²Taukut-llu ukverumalriit yugugaat ataucimek umyuangut ilakuyulluteng-llu. Tuaten-llu kina imna qaneqsaituq piutni kiimi piksugluki, tau͡gaam tamarmeng aklullgutkut ataucimi.

³³Angelriamek pinimek nallunairiut apostle-aat Atanrem Jesus-aam unguillranek; atawaqaasqun-llu ellaitnun tut'uq.

³⁴Nurutellriartaituq-llu, wani-wa tamarmeng nunautellget enengutellget-llu tamakut tunait, akinguteteng-llu taitait,

³⁵apostle-aanun tunluki; taukut-llu cikiutekait yugnun, piilutaciat tangerrluku.

³⁶Tuaten-llu Joseph-aaq, apostle-aat acillrat Barnabas-aamek, (wani-wa kangia “Qaruyutem Yua”), Levite-at iliit. Cyprus-aarmiunguluni,

³⁷tauna nunautminek tuniuq akia-llu tailluku tunaa apostle-aanun.