Read Yupik Acts 8 Bible Online

Acts 8 - Yupik bible

Acts 8

¹Saul-aam-llu canrilkellrua Stephen-aam tuqucimallra. Tamatum-llu nalliini ukverumalriit Jerusalem-aami nangcimaut, sekavvluteng-llu piciatun Judea-mun, Samaria-mun-llu, apostle-aat kiimeng pivkenateng.

²Angutet-llu ellualriit tungmagtaat Stephen-aaq, qiatekluku-llu cakneq.

³Saul-aam tau͡gaam nangtai agayumalriit, enaitnun-llu iterluni anutelarai nangcivigmun-llu ayaulluki.

⁴Tau͡gaam sekavcimalriit tamakut ullautelartut nunanun, Agayutem qaneryaraa qalarutekluku.

⁵Philip-aam-llu ullagai Samaria-rmiut Christ-amek-llu qalarulluki.

⁶Yugugaat-llu tamarmirrluteng niicugniat qalartellrani Philip-aaq, niicamegteggu tangrramegteki-llu irr'inarqelrialiari.

⁷Wani-wa anernerrluut amllelriit antai yuitnek, qayagpagtelluki, amlleret-llu pektesciigalnguut tussitellriit-llu anirtuumaut.

⁸Angniqapigtut-llu nunat taukut.

⁹Tau͡gaam yugtangqellruuq tuani Simon-aamek at'legmek, tauna ak'a ciungani tuunrituliuguq taukuni nunani, irr'ivkarluki-llu Samaria-rmiut, qanraqluni piningqenruniluni ilamini.

¹⁰Tamarmeng-llu ciumurutaat, mik'ngermeng angeng'e'rmeng-llu, qanerluteng, “Wani-wa una angun piningqertuq Agayutem pianek ‘Pinirpagmek’ aterpagcimalriamek.”

¹¹Tua-i ciumurutaat ak'anek irr'ivkalaateng tuunriyaramikun.

¹²Tau͡gaam Philip-aam qaneryaraq assilria qalarutekngaku Agayutem angayuqauvianek, Jesus-aam-llu Christ-am atranek; ukvengameng-llu angllurcetevkartut ayuqluteng angutet arnat-llu.

¹³Tua-i Simon-aaq-llu ukveryaaquq, angllurcetevkarraarluni-llu, Philip-aaq nayularaa, nallunailkutanek-llu tangrrami caperrnarqelrialiaranek-llu irr'ilartuq.

¹⁴Apostle-aat Jerusalem-aamelnguut niicameng Samaria-rmiut ukvengniluki Agayutem qaneryaraanek, ayagcetagket Peter-aankuk, John-aaq-llu paqtesqelluki.

¹⁵Taukuk-llu tekicamek piicautakek, Anernermek Tanqilriamek pingesqelluki,

¹⁶tut'eksailaki cali, tau͡gaam angllullruluteng, Atanrem Jesus-aam atranun.

¹⁷Taumek unatmeggnek pategvik'larakek, taukut-llu Anernermek Tanqilriamek pinglartut.

¹⁸Tau͡gaam Simon-aaq tangrrami apostle-aat pategviksaraatgun Anernerem Tanqilriim cikiutngucianek, akinek cikiryugyaaqai.

¹⁹Qanerluni, “Wiinga-llu cikirtegnga piyunarqucimek mat'umek, kina imna unatemnek pategvikekumku, Anernermek Tanqilriamek pingesqelluku.”

²⁰Peter-aam kiugaa, “Akiuteten tapeqluki piunrirciquten, umyuarteqngavet Agayutem cikiutii akiliryarauyukluku!

²¹Elpet qanyunaituten, pingqerrsunaituten-llu mat'umek, ircaqun piciunrilan Agayutem takuani.

²²Taumek umyualinqigten mat'umek assiilngillerpenek, piicagaqluten-llu Agayutmun. Au͡g'aricuaraaten ircaqurpegun umyuarrlullerpenek.

²³Waniwa taringamken yuucirpet cungarninarqellranun tekituten assiilngurmun-llu qillerqumallerpenun.”

²⁴Simon-aam kiugak, “Piicautegnga Agayutmun, tamakut qanrutkeltek wangnun tut'esqevkenaki.”

²⁵Apostle-aak-llu nallunairimariamek Atanrem-llu qaneryaraa qalarutkumariamegnegu, Jerusalem-aamun utertuk Samaria-rmiut-llu nunait amlleret tumekluki Qaneryaraqegtaar qalarutekluku.

²⁶Atanrem-llu an'gilaan qanrutaa Philip-aaq, “Nangerrluten Ungalam tungiinun ayii, tumyarat aturluki Jerusalem-aamek ayaumalriit Gaza-mun.” Tamana yuilqurruuq.

²⁷Ellii-llu nangerrluni ayagtuq. Tangerrluku-llu, Ethiopian-aarmiu angun Ethiopian-aarmiut atanrata arnam Candace-aam pistii, piyunarqucirpauluni qaunqesten͞guami tukuutaini. Tauna Jerusalem-aamun tekitellruuq agayuyarturluni.

²⁸Uterrnginanermini-llu pektessuutmini aqumgaluni, naaqiuq Prophet-aam Isaiah-m igainek.

²⁹Anernerem-llu qanrutaa Philip-aaq, “Ullagluku ekvikiu.”

³⁰Philip-aam-llu aqvaqurluni ullagaa, niilluku-llu naaqillrani Isaiah-m Prophet-aam igainek. Aptaa-llu, “Naaqelten-qaa makut taringaten?”

³¹Tauna kiuguq, “Qaillun-mi taringeciqsia ayuqucirturtaunii?” Ilungluni-llu Philip-aaq unayaqaa caniminun aqumesqelluku.

³²Cuqyun-llu qaneryaranek naaqellra waten ayuquq, “Ayaucimauq qusngitun tuqucimallerkaminun, tuarpiaq-llu qusngiyagaq qanyuilnguq asmegtestekami ciuqerrani tua-i qanerciiganani.

³³Qumlikumallermini-llu qanercetaarumallerkaa elliinek au͡gaumauq, kiami-llu tua-i ayuqucingevkarciqaki kinguvri, tua-i unguvii nunamek au͡gaumauq.”

³⁴Pistem-llu kiugaa Philip-aaq qanerluni, “Qanrusnga, kitumek una prophet-aaq qalarutkia, ellminek-qaa wall'u allamek yugmek?”

³⁵Tua-i Philip-aam taikaniritaa, qaneryaraq naaqellra ayagneqluku elliinun qalarutkaa Jesus-aaq.

³⁶Ayallermegni-llu tumemegni mermun tekituk, pista-llu qanertuq, “Tangerrluku, meq wani-wa, tua-i-qaa wani-wa anglluyunaitua?”

³⁷Tua-i Philip-aaq qanertuq, “Ukvequvet ircaqurpegun tamalkirrluten, tua-i pikina.” Pistem-llu kiugaa qanerluni, “Ukvertua Jesus-aaq Christ-aq Agayutmun Qetunraqucianek.”

³⁸Elliin pektessuutni arulaircetai. Tamarmek-llu mermun tuavet atrartuk, Philip-aaq tauna-llu pista, tuani-llu angllurcetaa.

³⁹Mermek-llu tuaken tagngagnek, Agayutem Anerneran Philip-aaq ayautaa, pistem-llu tangerqengaqenriraa, ayagtuq-llu tumemikun nunaniryugluni.

⁴⁰Philip-aaq-llu ellanguq Azotus-aami uitaluni; tumkellni-llu nunat tamalkuita qalarutai Qaneryaraqegtaarmek, kiituani tekituq Caesarea-mun.