Read Yupik Romans 10 Bible Online

Romans 10 - Yupik bible

Romans 10

¹Anelgutmaa, ircaquma piyuumiutii kaigatka-llu Agayutmun, Israel-aanun piuq, anirtuumasqelluki.

²Nallunritaqa piyuumiutengqerruciat Agayutmun, tau͡gaam taringevkaumanritut.

³Nalluamegteggu elluaruciq Agayutem cikiutii, ellmeggnek-llu elluarillerkarteng pingnaqngamegteggu, Agayutem elluarucianun tunenritut ellmeggnek.

⁴Tua-i Christ-aq Alerquutet iqukaat, tamarmeng ukvengqellriit ellualriarurtesqelluki.

⁵Moses-aaq igallruuq, kina Alerquutet atullratgun elluangnaqellria yuuciqniluku tamakutgun.

⁶Tau͡gaam elluaryaraq ukverem pia qanertuq, Qaneryaqunak ircaqurpegun, “Kina-kiq qilagmun mayurniarta?” (wani-wa Christ-aq atrautnaluku).

⁷Wall'u “Kina-kiq-llu camavet atrarniarta?” (wani-wa Christ-aq nuggnaluku tuqumek).

⁸Tau͡gaam qaillun qanerta? “Qaneryaram nayuraaten, qerrlugpeni, ircaqurpeni-llu” wani-wa ukverem qaneryarartaa qalaruteklerput.

⁹Qerrlugpegun Jesus-aaq qanrutkekuvgu Atanruniluku, ircaqurpegun-llu ukvekekuvgu Agayutmun unguircetellrucia tuqumek, anirtuumaciquten.

¹⁰Tua-i yuk ircaqumikun ukvelaami ellualriarurrluni, qerrlugmikun-llu nallunairilartuq anirtuumaluni-llu.

¹¹Qaneryaraq qanertuq, “Elliinun ukvelria kasnguyugngaituq.”

¹²Tua-i ayuqngameng Jews-aarung'e'rmeng Greek-aarung'e'rmeng-llu; atauciq Ataneq tamarmeng ataneqaat, cikiutek'larai-llu tukuutni tamalkuitnun kaigavikestem̄inun.

¹³Tua-i, “Kina imna kaigalria Atanrem atranun anirtuumaciquq.”

¹⁴Qaillun-mi yuut kaigavikeciqatgu ukvervikenrilkesseng? Qaillun-mi-llu ukvervikciqatgu niiteksailkesseng? Qaillun-llu niiciiqat qaneryariurtaunateng?

¹⁵Qaillun-llu yuut qaneryariurciqat ayagcecimavkenateng? Igausngaciatun, “Quyanaqvagtat it'gait qaneryariulriit qaneryaraqegtaarmek!”

¹⁶Tau͡gaam tamarmeng Gospel-aaq niisngaksaitaat; Isaiah-m qanellruciatun, “Ataneq, kina ukverta niitellerminek wangkutnek?”

¹⁷Tuaten yuk ukvenglartuq niitellerminek, niitelartuq-llu Christ-am qaneryaraan qalarutkumallrakun.

¹⁸Tau͡gaam apnaamci, niiteksaitut-qaa? Aa-ang, niitellruut, wani-wa “Eriniit sagtuq nunam qaingani tamiini, qaneryarait-llu ellam iquanun.”

¹⁹Cali apnaamci, Israel-aat-qaa taringellrunritut? Ciumek Moses-aaq qanellruuq, “Caunrilkengarpeciuggun yugteggun ciknavkarciqamci, atanruvilegteggun-llu usviilngurteggun qenqerceciiqamci.”

²⁰Kinguakun-llu Isaiah kalivyugpek'nani qanertuq, “Yuartekenrilkem̄a nataqaatnga, nasvaglua-llu wangnek apyutestekenrilkemnun.”

²¹Tau͡gaam Israel-aat qanrutkai waten, “Erenrem taktaciatun talligka yagingaagka niicunrilngurnun inglulitellrianun-llu.”