Read Yupik Romans 11 Bible Online

Romans 11 - Yupik bible

Romans 11

¹Apnaamci: Agayutem-qaa yun'i pegtai? Qang'a! Wiinga-llu Israel-aaruunga, Abraham-aam kinguveqlua, Benjamin-aam-llu yuin ilaklua.

²Agayutem pegtenritai yun'i ciunguluku cucukellni. Nalluarci-qaa qaneryaram qanrutkellra Elijah, qaillun kaigallra Agayutmun Israel-aat inglukluki?

³“Ataneq, prophet-aat kevgaten tuqutait, navgurluki-llu ekuaviten, wii kiima ellirtua, tuqutengnaqaatnga-llu.”

⁴Tau͡gaam cauga Agayutem kiutii elliinun? “Yungqertua malrunlegnek tiissitsaanek Baal-amun ciktaaqsailngurnek.”

⁵Tuaten-llu maa-i aminakuartangqertuq naklekutekun cucukumalrianek.

⁶Tau͡gaam naklekutekun pimakuni, caliatgun pimanrituq; caliakun pimakan, naklekun naklekutngunrirciquq.

⁷Qaillun tuall'? Israel-aat yuallerteng unakellrunritaat, cucukumalriit unakaat, tau͡gaam ilait elpegiutut.

⁸Igaumaciatun, “Agayutem murilkenritmek cikillrui, iingit tangrrutesciiganateng, ciutait-llu niitesciiganateng erneq man'a engelkarrluku.”

⁹David-aaq-llu qanellruuq, “Nerevkariciat umyugaunateng negatun ayuqlirili, kapkainartun-llu, petmigtun-llu, akinaurutngurrluni-llu ellaitnun!

¹⁰Iingit takvialivkaumalit tangrrutesciigaliluteng, tunuit-llu qulugngarrlainarluteng.”

¹¹Taumek apnaamci, paallallruut-qaa iquluteng-llu? Qang'a! Tau͡gaam inerciigaluciatgun anirtuun tekitellruuq Jews-aarunrilngurnun, ciknavkarluki Israel-aat.

¹²Wani-wa inerciigaluciat tukuutngukan ellamiunun, pisciigaluciat-llu tukuutngukan Jews-aarunrilngurnun, qaillun-mi amllenrulriamek ilakliiyuciat pitaniarta?

¹³Waniwa qanertua elpecen̄un Jews-aarunrilngurnun. Agayumanrilngurnun ayagcetaungama, caliaqa misturivkaraqa.

¹⁴Jews-aarullgutenka ayuqniarcetnaluki, ilait anirturnayukluki.

¹⁵Wani-wa ayakumallrat kenegyagutngukan ellamiunun, cauciqa ciuniurumallrat? Unguirutnguciquq tau͡gaam tuqumek.

¹⁶Urtaq ciuqliq kencignarqelriarukan, tuaten-llu tamalkurmi urtaq piciquq, acilquq-llu kencignarqelriarukan, avayat-llu tuaten piciqut.

¹⁷Tau͡gaam olive-aam avayain ilait au͡gaumakata, elpet-llu, olive-aam yuilqurmiutaam avayangaariin, usgucimakuvet enaitnun mecuanek-llu pillgucirluki,

¹⁸pivaksaqunak avayanun. Pivakekuvet, neq'akiu acilqumek aulukinrilucin, tau͡gaam elpet aulukumacin acilqumek.

¹⁹Qanerciqliuten, “Avayat ilait au͡g'allruut usguliutesqellua wiinga.”

²⁰Tamana piciuguq. Au͡gaumallruut ukvenrilucirteng pitekluku, tau͡gaam elpet asvaituten ukverkun kiingan. Taumek pivaksaqunak, tau͡gaam qigcigyugluten.

²¹Wani-wa Agayutem takumcukenriluciatun avayat nutemllaat, tuaten-llu elpet takumcukngaitaaten.

²²Tangerrluku Agayutem naklegtaucia, alingnarqucia-llu; avtellrianun alingnaqluni, tau͡gaam elpet tungevnun naklegtarluni, naklekutiini Agayutem uitaurquvet; pinrilkuvet elpet-llu au͡gaumanayukluten.

²³Tuaten-llu ellait ukvenrilucirmeggnek ut'reskuneng usguliucimaciqut, tua-i Agayutem usgutenqigtellerkaat caperqenrilaku.

²⁴Wani-wa au͡gaumallrukuvet olive-aam napaanek yuilqurmiutarmek, usgucimaluten-llu, nutem ilakenrilkevnun nauceciimalriamun napamun olive-aamun, qaillun pitalriamek nutem avayallri ataam usgucimaarkaugat nakmiin tememeggnun napamun?

²⁵Umyuarpeciuggun pivaknayukluci, ilamaa, mat'umek nallunrircetqataramci nallunriumanrilngurmek. Israel-aat ilait taringesciigatevkaumaut, Jews-aarunrilnguut naamarillerkaat engelkarrluku.

²⁶Tuani Israel-aat tamarmeng anirtuumaciqut; igausngaciatun, “Anirturilria tekiciiquq Zion-aamek, elliin au͡g'arciqaa agayutaitnaq Jacob-aam yuinek.

²⁷Man'a-llu akquyutekciqaqa ellaitni, assiilnguitnek au͡g'ariskumki.”

²⁸Gospel-aakun Agayutem taukut inglukestekai, elpeci atawakarpecen̄ek; tau͡gaam cucukumallratgun kenkai ciuliarit pitekluki.

²⁹Tua-i Agayutem cikiqengellni kelgillni-llu pinricen̄arngailaku.

³⁰Niisnganrilngerpeci Agayutem elpecen̄ek takumcukiciatun, ellait niisnganriluciat pitekluku.

³¹Tuaten-llu ellait maa-i niisngaksaitut, takumcukumallerpeciuggun, ellait-llu takumcukumasqelluki.

³²Wani-wa Agayutem ayuqluki ilakliiyutai niisnganrilngurtun, tamalkuita takumcuknaluki.

³³Atam et'uqapigtacia Agayutem elisngacian nallunrilucian-llu! Qanercetaaryarai yuarciiganateng, tumyarai-llu ayuqucingesciiganateng!

³⁴“Kia Atanrem umyugaa nallunritellruagu? Wall'u kina ayuqucirturtekellruagu?

³⁵Kia-llu ciumek cikirtau, akiliumaarkauluni?”

³⁶Wani-wa elliinek, elliikun-llu, elliinun-llu cat tamarmeng piugut. Ellii nanraumali akwarpak! Amen.