Read Yupik Romans 4 Bible Online

Romans 4 - Yupik bible

Romans 4

¹Qaillun tuall' qanerciqseta Abraham-aamek ciuliamten̄ek kemegtaq aturluku?

²Tua-i Abraham-aaq caliamikun ellualriarurtellrukuni, nanrararkangqerrsartuq, tau͡gaam Agayutem ciuqerrani pivkenani.

³Qaillun-mi qaneryaraq qanerta? “Abraham-aam ukveqaa Agayun, tamana-llu pitekluku elliinun ellualriaruuq.”

⁴Wani-wa calilria akingelartuq, cikiutekevkenaki, tau͡gaam nunuliutekluki.

⁵Tau͡gaam kina caliarilnge'rmi, ukveqkuniu-llu agayutailnguut ellualriarurtestiit, ukvemikun ellualriarurtuq.

⁶Tuaten-llu David-aam atawaqernia yuk, Agayutem ellualriarurcetellra, caliarikun pivkenaku:

⁷“Atawaqertut picurlautmeggnek au͡g'aricimalriit, assiilnguit-llu patumaluteng;

⁸atawaqertuq yuk, assiilngua Atanrem elliinun tucetenrilkii.”

⁹Nuugiumalriit-qaa nallaitgun mat'um atawaqaasqutem tusvikai, wall'u nuugiumanrilnguut-llu? Ellualriarunilararput Abraham-aaq ukvera pitekluku.

¹⁰Qaillun-mi ellualriarurcimaa? Nuugiumavailegmi-qaa wall'u nuugiumariluni? Nuugiumarillermini pivkenani, tau͡gaam nuugiumavailegmi.

¹¹Nuugiumayaraq akurturaa elluarucimi nallunailkutii takarnarqutekluku-llu ukvemikun pikellni nuugiumavailegmi. Ellii ciuliarusqelluku tamalkuitnun ukvelrianun nuugiumanrilnge'rmeng ellualriarurtellrianun,

¹²Cali-llu nuugiumalrianun tuaten ciuliarurrluni, nuugiumallrat nalliikun pitkevkenaku, tau͡gaam cali maliggluku cikiutii ukverem ciuliamta Abraham-aam pikellra nuugiumavailegmi.

¹³Akqun Abraham-aamun kinguvrinun-llu akqumalria, nuna tamalkuan kinguvanertaqesqelluku, alerquutetgun taillrunrituq tau͡gaam ukverem elluaruciakun.

¹⁴Tua-i alerquutet ciumurutestait paitangqerrarkaukata, ukveq caunrituq, akqun-llu catnguvkenani.

¹⁵Wani-wa alerquutet iqungqertut eq'ukutmek, tau͡gaam alerquucetailngurmi assiilngurtaituq.

¹⁶Taumek ukvermun tusngauq, akqutii naklekutekun piusqelluku kinguvrinun-llu tamalkuitnun nallunaitesqelluku, Alerquutet ciumurucestait nallaitgun pivkenaki, tau͡gaam imkut-llu Abraham-aatun ukvelriit, tamamta ciuliaqngamteggu,

¹⁷igausngaciatun. “Atanruvillgutkelrianun amllernun ciuliarurcetamken,” ciuqerrani Agayutem ukvekek'ngaan, tuqumalriit maktestiita piurcimanrilnguut-llu piurtestiita.

¹⁸Ukvemikun neryuniurtuq neryuniurnailengraan, atanruvillgutkelrianun amllernun ciuliarurtarkauciminek qanrucimallrucimitun, “Tuaten piugarkaugut kinguveten.”

¹⁹Ukvemikun piniarutenrituq temni umyuaqeng'e'rmiu, unguvallerkailnguq yuinarnek tallimanek allrakungami, Sarah-llu qingayuilnguq umyuaqeng'e'rmiu.

²⁰Ukvenrilucim nalirrugcetenritaa Agayutem akqutiinek, tau͡gaam ukvemikun asvairiuq Agayun ucurnarivkarluku,

²¹nalirrukevkenaku Agayutem piyugngacia akqutminek.

²²Tamana pitekluku “elluarucia elliinun elkarcimauq ukverakun.”

²³Tau͡gaam man'a qaneryaraq, “Elliinun elkarcimauq,” ellii kiingan pitkevkenaku igausngauq, tau͡gaam wangkuta-llu pitekluta.

²⁴Wangkutnun-llu elkarcimaciquq ukvekekumteggu Atanrem Jesus-aam unguirtestii tuqumek,

²⁵tauna tuqucimalria assiilnguput pitekluki, makcecimaluni-llu elluarillerkarput pitekluku.