Read Yupik Romans 8 Bible Online

Romans 8 - Yupik bible

Romans 8

¹Taumek watua pinarqelriartaituq kinkunun imkunun Jesus Christ-amelngurnun (kemgem piyullrakun pektenrilngurnun, tau͡gaam Anernerkun).

²Wani-wa alerquutiin Anernerem, unguvam pian angitellruanga alerquutainek assiilnguum tuqum-llu.

³Alerquutet pisciigalkiit, kemegkun pinialiami, Agayutem nakmiin Qetunrani taivkaraa assiilngiumalriacetun, assiilnguq pitekluku, pinarqevkarluku-llu assiilnguq kemegmi.

⁴Alerquutem assilriim pisqumallra wangkutni qaqitesqelluku, kemgem piyullrakun pektenrilngurni, tau͡gaam Anernerem piyullrakun.

⁵Wani-wa kemegkun yuulriit kemegtaat umyuaqelarait, tau͡gaam Anernerkun yuulriit Anernellaat umyuaqelarait.

⁶Kemegtaam-wa cumigutellra tuquuguq, tau͡gaam Anernellaam cumigutellra uitanqegcitnguuq unguvauluni-llu.

⁷Tuaten kemegtaam cumigutellra inglukutnguuq Agayutmun; Agayutem pisqutiinun maligtaqutenrituq, tua-i pingailami.

⁸Kemegkun-llu yuulriit ilukegcivkarciigataat Agayun.

⁹Tau͡gaam Agayutem Anernera ilumuuluni elpecen̄elkan kemegtaunrituci, Anernellauguci. Yuk Christ-am Anerneranek piilkan, elliin yuk'enritaa.

¹⁰Tau͡gaam Christ-aq elpecen̄elkan, temsi tuqumangraan assiilnguq pitekluku, anernerci unguvauq elluaryaraq pitekluku.

¹¹Jesus-aam unguirtestiin Agayutem Anernera elpecen̄elkan, unguirtestiin-llu temsi tuquarkaq cali unguvavkarciqaa Anernemikun elpecen̄elngurkun.

¹²Taumek anelgutmaa, pinarqutengqertukut, kemegmun pivkenata, kemgem piyullrakun piarkauvkenata.

¹³Tua-i kemgem piyullrakun yuukuvci, tuquciquci, tau͡gaam Anernerkun kemegtaam caliari tuquskuvciki unguvaciquci.

¹⁴Wani-wa tamarmeng Agayutem Anernerakun ciuliqagcimalriit Agayutem yukai.

¹⁵Tua-i ciuniullrunrituci teguaruyaram yuucianek civuuranqigtellerkarpecen̄un, tau͡gaam irniarurcaram yuucianek ciuniullruuci kaigalaucimcetun, “Abba! Aata!”

¹⁶Anerneq ellminek nallunairiuq anernemten̄un irniarucimten̄ek Agayutmun.

¹⁷Irniarukumta-llu, paitarkalguukut, Agayutmek paitarkarluta Christ-aq ilakluku, nangteqellgutkekumteggu tuaten ilakluku cali ucurnarivkaumaarkauluta.

¹⁸Umyuartequa mat'um nunam nangteqnai pitassiarucunaitut ucurnaanun Agayutem, alairarkamun wangkutnun.

¹⁹Piurcimalria tamarmi utaqalgirtuq nerinikqapiggluku Agayutem irniarin alaillerkaat.

²⁰Piurcimalria tuquarkauluni elkarcimauq, ellmi piyullermikun pivkenani tau͡gaam elkartestiin pisquciatun neryuniurutengqertelluku;

²¹tua-i piurcimalria tuaten angiciiquq tuqum qillerqumallranek Agayutem-llu irniarin angicimallratnun ucurnarqelriamun ilaulluteng.

²²Nallunritarput tamarmi piurcimalriim yuuniallra teggiurcilriatun man'a engelkarrluku.

²³Piurcimalria-llu kiimi pivkenani, tau͡gaam wangkuta-llu, avalingqellriani naugiqarraallrinek Anernerem, yuuniarmiukut utaqallemten̄i irniarurtellerkamten̄ek, tememta-wa ut'rucimallerkaatnek.

²⁴Mat'umi neryuniurutmi anirtuumaukut. Wani-wa alailnguum neryuniurutkellra neryuniurutngunrituq. Kia neryuniurutekciqau tangellni?

²⁵Tau͡gaam neryuniurutkekumteggu tangenrilkevvut, utaqaurciqerput qacuiqsaunata.

²⁶Tuaten-llu Anernerem piniatellemten̄ek ikayuumaakut, elluarrluku piicallerkarput nalluamteggu, tau͡gaam Anernerem tungaunani kaigataakut umyuamikun uqamaunani qanrutkesciigalngurmek.

²⁷Elliin-llu yuvriumastiita yuut ircaqruita, nallunritaa Anernerem umyugaa, tua-i Anernerem kaigacaki ellualriit Agayutem pisquciatun.

²⁸Nallunritarput tamaitni Agayutem calilaucia assilrianek kenkestem̄inun, kelgumalrianun pillerkiullermitun.

²⁹Ciunguluku nallunrilken̄i, ciunguluku-llu elkartai Qetunramitun ayuqucingqerresqelluki amaqliusqelluku-llu tauna anelgutkerugalriani.

³⁰Ciunguluku-llu elkartellni kelgai; kelellni-llu elluarivkarai; elluarivkallni-llu ucurnarivkarai.

³¹Qaillun tua-llu qanerciqseta mat'umun? Agayun ilikestekekumteggu, kia inglukciqakut?

³²Elliin nakmiin Qetunrani qunukevkenaku cikiutekngaku wangkuta tamamta pitekluta, elliikun-qaa cali canek tamaitnek cikirngaitaakut?

³³Kina picetaaruciyunarqa Agayutem cucukek'ngainek? Agayun kiimi ellualriarurcilria.

³⁴Kina pinarqelrianun picirkiristen͞gua? Christ-aunrituq-qaa tuqulleq, wani-wa imna unguilleq, maa-i-llu Agayutem tallirpiani uitalria kaigalluta.

³⁵Kia avvuciiqakut Christ-am kenkiinek? Arenqiallugutem-qaa, wall'u nanikuayaram, wall'u nangtaunam, wall'u piitnam, wall'u nuuqitem, wall'u aarnarqelriim, wall'u saskulluarqucaram?

³⁶Igausngaciatun, “Elpet pitekluten erenrem taktaciatun tuqucimaukut, ayuqukut qusngitun tuqucimaarkatun.”

³⁷Qang'a, tamakut-wa pingusngaitaitkut, kenkestemta ikayuuciatun.

³⁸Wani-wa wii nalirrukenritaqa, tuqumun wall'u unguvamun mat'umun, wall'u an'gilanun, wall'u atanrulrianun, wall'u pinirpaulrianun, wall'u canun maanelngurnun, wall'u canun piarkanun,

³⁹wall'u canun quyilrianun, wall'u canun aciqvanelngurnun, wall'u canun allanun piurcimalrianun, avvutarkaunrilucirput Agayutem kenkiinek Christ-ami Jesus-aami Atanemten̄i uitalriamek.