Read Yupik Romans 9 Bible Online

Romans 9 - Yupik bible

Romans 9

¹Piciulriamek qanertua Christ-akun, iqluvkenii; umyuaqegtaarama nallunairaanga Anernerkun Tanqilriakun,

²angtuamek angniilucimnek cakviurrlainaucimnek-llu ircaqumkun,

³anelgutenka pitekluki, nakmiin ilanka Jews-aarullgutenka aniqlaamallrat, Christ-amek-llu ayakumallrat, wangnun tut'esqumayaaqluku.

⁴Israel-aaruata, ellaita-llu pikngatgu irniarurcaraq, ucurnarquciq, akquyutet-llu, Alerquutet, agayuyaraq, akqutet-llu;

⁵ellaita-llu ilakait ciuliat, Christ-aq-llu kemegkun yuullgutkelriit ilakluku. Agayun, cam tamarmi Atanra, nanraumali akwarpak. Amen.

⁶Tau͡gaam umyuarteqenritelta Agayutem qaneryaraa tukniacukluku. Wani-wa Israel-aamek kinguvang'e'rmeng tamarmirrluteng Israel-aunritut.

⁷Kinguveqengraateng-llu Abraham-aam tamarmirrluki irniaqenritai; tau͡gaam “Isaac tumekluku kinguverkaten elkarcimaarkaugut.”

⁸Wani-wa kemegkun yuurtellriit Agayutem irniaqenritai, tau͡gaam akqutkun yuurtellriit elkarcimaut kinguverkauluteng.

⁹Waniwaungan akqutem qanellra, “Allamiku mat'um nalliini tainqigciiqua, Sarah-llu qetunrangciquq.”

¹⁰Una kiimi pivkenani, tau͡gaam Rebecca-llu qingallermini (malrignek) angutekun ataucikun Isaac-aakun.

¹¹(Anvailgagnek, camek-llu assilriamek wall'u assiilngurmek aturpailgagnek, Agayutem picirkiutii cucukiciakun ciumuutesqelluku, caliat pitkevkenaki, tau͡gaam elliin kelgicia pitekluku.)

¹²Aanii qanrucimauq, “Amaqliim kevgiurciqaa kinguqlini.”

¹³Igausngaciatun, “Jacob-aaq kenkaqa, tau͡gaam Esau eq'ukaqa.”

¹⁴Camek tua-llu qanerciqseta? Agayun-qaa elluanrilngurmek piuq? Watqapik! Agayutem tuaten pivkanrilliu!

¹⁵Nauwa Moses-aamun qanellruuq, “Takumcukeka takumcukciqaqa, naklekeka-llu naklekciqaqa.”

¹⁶Taumek yuum piyullranun wall'u pingnaqellranun atanrituq, tau͡gaam Agayutem takumcukutiinun.

¹⁷Tua-i qaneryaram qanrucaku Pharaoh, “Nangercimauten man'a pitekluku piniqa nasvaumasqelluku elpegun, atqa nunam qaingani tamiini qanrutkumaarkauluku.”

¹⁸Taumek piyugaqami yuk takumcuk'laraa, piyugaqami-llu yuum ircaqrua tegg'ivkalaraa.

¹⁹Qanerciqsaaquten wangnun, “Ciin pinarqutkamek cali nataqut'larta? Kia-llu narurciiqau pisqutii?”

²⁰Usuuq, yuunge'rpet cauyuksit? Agayun-qaa kiumrayugngaan? Piliaqumalria-qaa piliaqestem̄inun qanerciquq waten, “Ciin tuaten ayuqlua taqsia?”

²¹Qikuliurtem-qaa umyugiutesciigataa qiku, ilii caliaqellerkaanek caqumun tangnirqellriamun, ilii-llu caarrliviuluku?

²²Tau͡gaam Agayutem, eq'uqerten̄i nasvagyugngang'e'rmiu, nallunrircecugngang'e'rmiu-llu piyunarqucini, ilalcilriatun nerinisngialliqutekenritai eq'uqertem caqumakai piunrirarkamun taqumalriit.

²³Nallunaitesqelluku assiucini angtatailnguq, takumcukutem caquini imiusngalriit, ciunguluku uptellni ucurnarillerkaatnun.

²⁴Wangkuungramta-llu, kelellrini, Jews-aarrlainaat pivkenaki, Jews-aarunrilnguut-llu cali.

²⁵Qanellruciatun Hosea-m kalikaini, “Yuk'enritellrenka ‘Yumnek’ tuqlurciqanka, kenkenritelqa-llu tuqlurciqaqa kenkek'ngamnek.

²⁶Nani-llu qanrutkumallrung'e'rmeng, ‘Yuk'enritamci,’ tuani Agayutem unguvalriim yuinek aprumaarkaugut.”

²⁷Isaiah-m-llu qayagatkai Israel-aarmiut: “Israel-aam yui imarpiim qau͡gyaitun amllertang'e'rmeng, aminakuarraat nallmegteggun anirtuumaciqut;

²⁸wani-wa Atanrem anucimirqecetaarun nunamun tuc'eciiqngaku, mulngakevkenani patagmek.”

²⁹Isaiah-m-llu qanrutkellruciatun ciunguluku, “Quyungqarugalriit Atanrata kinguverkamten̄ek pillrunrilkakut, Sodom-aatun ayuqsartukut, Gomorrha-tun-llu piunriumaluta.”

³⁰Qaillun tua-llu qanerciqseta? Jews-aarunrilnguut-qaa, elluaryaraq pingnaqenrilngermegteggu, unakaat, wani-wa elluaryaraq ukverkun;

³¹tau͡gken Israel-aat, alerquutetgun elluaryaraq pingnaq'ngermegteggu, alerquutetgun unakesciigataat.

³²Ciin? Tua-i ukverkun pingnaqenrilamegteggu, caliaratgun tau͡gaam alerquutet. Teggalquq paallautngutuli paallagvikngamegteggu,

³³igausngaciatun, “Tangerrluku, Zion-aami teggalqumek elkarciunga yuut paallautekaatnek, qiurmek-llu iqutekaatnek; elliinun-llu ukvelria kiaresngiatellerkaminun tekiusngaituq.”