Read Yupik 1 Corinthians 1 Bible Online

1 Corinthians 1 - Yupik bible

1 Corinthians 1

¹Wii, Paul-aaq, Agayutem pisquciatun kelgumalriami Christ Jesus-aamun apostle-aaruarkaulua, ilavut-llu Sosthenes.

²Agayutem agayuvianun Corinthia-melngurmun, Christ Jesus-aakun kenciknarivkaumalrianun, kelgumalrianun ellualrianun, ilakluki tamalkuita Atanrem Jesus Christ-am atran apaastai, Atanrata, wangkuta-llu Atanemta,

³Agayutem Atamta Atanrem-llu Jesus Christ-am naklekutiin uitanqegcitiin-llu nayurlici.

⁴Agayutmun quyarrlainalartua elpecen̄ek, naklekutii pitekluku cikiutekumalria elpecen̄un Christ Jesus-aakun.

⁵Tamaitgun cikiumiivci qanermek elisngamek-llu.

⁶Christ-amek nallunairillrucimcetun akunlevcen̄i.

⁷Taumek cikiutet tamalkuita anernellaat avaliqaci utaqalgillerpecen̄i Atanrem Jesus Christ-am alaillerkaanek.

⁸Elliin nayumiqaciqaaci iquklitlerkamun, Jesus Christ-am Atanemta ernerkaani pinarqutaunaci.

⁹Piciuguq Agayun, elliikun kelgumauci ilakuyutiinun Qetunraan, Jesus Christ-am Atanemta.

¹⁰Qarutaaramci, anelgutmaa, Atanrem Jesus Christ-am atrakun, umyuallgutkesqelluci ayuqenricaraq-llu piusqevkenaku akunlevcen̄i, tau͡gaam umyuarpeciuggun atauciurrluci umyuangcallgutekluci-llu.

¹¹Niicecatnga Chloe-am yuin elpecen̄ek qanemyuugautelarniluci, ilamaa.

¹²Wani-wa qanlaavci pitaarluci, “Paul-aam pikaanga,” wall'u, “Apollos-aam pikaanga,” wall'u, “Cephas-aam pikaanga,” wall'u, “Christ-am pikaanga.”

¹³Christ-aq-qaa avgumauq? Paul-aaq-qaa ussukcausngallruuq elpeci pitekluci? Wall'u-qaa Paul-aam atrakun anglluumallruuci?

¹⁴Quyaunga angllurcecinrilama ilavcen̄ek, tau͡gaam Crispus Gaius-aaq-llu.

¹⁵Qanernayukluku ilasi atemkun anglluumaniluni.

¹⁶Stephen-aam-llu ilai angllurcetellruanka. Taukut avatiitni neq'ak'ngaitua angllurcecillrucimnek allamek.

¹⁷Christ-am ayagcetellrunrilanga angllurcecisqellua tau͡gaam qalarutkesqelluku Gospel-aaq, puqillemkun umyuartullemkun-llu pivkenii, Christ-am kelistaa tuknialinayukluku.

¹⁸Wani-wa kelistam qalarutkellra tamaumalrianun ellmikuuguq. Wangkutnun tau͡gaam anirtuumalrianun Agayutem piniutekaa.

¹⁹Igausngiin, “Piunrirciqaqa umyuartuciat umyuartulriit, puqiuciat-llu puqilriit piciurcessngaitaqa.”

²⁰Nanta umyuartulria? Nanta igatuli? Nantat-llu naigtaarilriit mat'um nalliini? Agayutem-qaa caunrilkenritaa mat'um nunam umyuartunra?

²¹Nunam yuin umyuartullermegteggun, Agayun nalluatgu, elliin Agayutem umyuartulriim anirturyugai ukvelriit qalaruteklemteggun nunami caunrilkumalriakun.

²²Wani-wa Jews-aat nallunailkutanek tangerrsulartut, Greek-aat-llu umyuartuyaraq arcaqakluku.

²³Wangkuta tau͡gaam qalarutkarput Christ-aq ussukcausngalleq, Jews-aanun paallautekaulria Jews-aarunrilngurnun-llu caunrilnguq,

²⁴tau͡gaam kelgumalrianun, Jews-aanun Greek-aanun-llu, qalarutkarput Christ-aq, elliikun-llu Agayutem piniutii umyuartucia-llu.

²⁵Tua-i Agayutem pia, yugni caunrilkumalria umyuartunruuq yugni, Agayutem-llu pinialucia, pininruuq yugni.

²⁶Neq'akici elpecen̄ek, ilamaa, kelgumalriani, amllerni umyuartullrunrituci nunamiutarteggun, amllerni-llu piningqellrunrituci, amllerni-llu picalqukumallrunrituci.

²⁷Tau͡gaam Agayutem cucukellrui nunam caunrilkengai, kiaresngialirluki umyuartuyukellriit, Agayutem-llu cucukellrui nunam piniallri, kiaresngialirluki piniryukellriit.

²⁸Agayutem-llu cucukellrui pivakenrilnguut caunrilkumalriit-llu nunami, caunrilengraata-llu cat piulriit, piunrirnaluki.

²⁹Yuk pivakesqevkenaku Agayutem ciuqerrani.

³⁰Ellii unguvakiutestekarci Christ Jesus-aakun, elliikun Agayutem umyuartumek cikiraakut, elluarucimek-llu, qigcignaritmek-llu, aviutmek-llu.

³¹Taumek, igausngaciatun, “Kina imna nanralria, nanraqili Atanermek.”