Read Yupik 1 Corinthians 10 Bible Online

1 Corinthians 10 - Yupik bible

1 Corinthians 10

¹Nallusqumanritamci, ilamaa, ciuliamten̄ek, amirlumun qulliliumallruciatnek Imarpigkun-llu qerallruciatnek.

²Moses-aamun-llu anglluuciatnek, amirlukun imarpigkun-llu.

³Pakemkumiutarmek-llu nerlauciatnek,

⁴pakemkumiutarmek-llu melauciatnek. Melaameng pakemkumiutarmek teggalqumek nayurtem̄eggnek, wani-wa Christ-amek.

⁵Amlleret tau͡gaam Agayutem ilukegcitkenritai, iqulluki yuilqumi.

⁶Makut wani-wa wangkutnun cuqyutnguut, aglumasqevkenata assiilngurnek ellaicetun.

⁷Agayutngualiksaunaci ellaicetun, igausngaciatun, “Tuani yuut aqumut nerluteng merluteng-llu, nangerrluteng-llu akusrarrluteng.”

⁸Akusrarutekinritnaurtukut ellaicetun, ernermi-llu ataucimi piunrirluteng tiissitsaat yuinaq pingayunek cipluki.

⁹Ilaita pilauciicetun naspaanritnaurput Ataneq, ciissirpagtun-llu piunriumaluteng.

¹⁰Qanemyuugaqsaunata-llu ellaicetun, piunriumaluteng-llu Piunriristekun.

¹¹Makut maa-i ellaitnun tut'ellruut tangrrutngusqelluki, tau͡gaam igaucimaut wangkutnun ayuqucirtuutekesqelluki, pillerkami nangneqlirmi yuulriani.

¹²Taumek kina imna umyuarteqkuni nangerngayukluni, murilkelli iquyuartuq.

¹³Naspaatem tekiteksaitaaci yuum atuqsailkiin. Agayun piciuguq, elliin naspaavkarngaitaaci arturarkarpecen̄ek, tau͡gaam naspaamallerpecen̄i qimagvigkirciqaaci, piniliumaluci.

¹⁴Taumek kenkekmaa, agayutnguat caumanriciki.

¹⁵Qalarutamci umyualegcetun, cuqciki qanellrenka.

¹⁶Kenciknarqelria saskam imaa atawaqaasqellerput, mer'aqamteggu Christ-am-qaa augan ilakenritaa? Kelipaq-llu-qaa itumtellerput Christ-am temiin ilakenritaa?

¹⁷Kelipaq atauciungan, wangkuta amllengramta atauciq temkarput, tamamta kelipaq atauciq nerlaamteggu.

¹⁸Umyuaqiciki Israel-aat piciryarait, Agayutmun cikiutekumalrianek nerlalriit, ekuavigkun-qaa ilakuyutenritut?

¹⁹Camek tuall' qanercia? Neqkat-qaa agayutnguanun cikiutekumalriit cauyukluki, agayutnguat-llu cauyukluki?

²⁰Qang'a! Tau͡gaam agayumanrilnguut cikiuteteng Agayutmun pivkenaki tuunrangayagnun tau͡gaam cikiutek'larait. Ilagautesqumanritamci tuunrangayagnun.

²¹Atunem merciigatuci Atanrem saskaanek tuunrangayiit-llu saskaatnek, atunem-llu neresciigatuci Atanrem estuuluanek, tuunrangayiit-llu estuuluatnek.

²²Cangayugcetaarciqerput-qaa Ataneq ciknallerkaanun? Pininruukut-qaa elliini?

²³Cat tamarmeng inerquutngunricaaqut wangnun, tau͡gaam tamarmirrluteng atawaunritut. Cat tamarmeng inerquutngunricaaqut, tau͡gaam tamarmirrluteng asvairitngunritut.

²⁴Yuk ellminek arcaqakenrilli, tau͡gaam allat arcaqakliki.

²⁵Tuneniarvigni kemget tuneniaqumalriit nerlarciki, apqaurutkevkenaki umyuaqegtaar pitekluku.

²⁶Tua-i, “Nuna Atanrem pikngaku, tamatumelnguut-llu tamalkuita.”

²⁷Ukverumanrilnguum kelkaten neryartuusqelluten, maligeskuvgu-llu, taiyuciicetun nerkina, apqaurutkevkenaki umyuaqegtaar pitekluku.

²⁸Tau͡gaam yuum qanruskaten, “Man'a cikiutekumallruuq agayutnguanun,” neryaqunaku, nalqigutesten pitekluku, umyuaqegtaar-llu pitekluku,

²⁹elpenek pivkenak, tau͡gaam elliin umyuaqegtaarii pitekluku. Wiinga-qaa atu'urkaqa yuum allam umyuaqegtaariikun cuqingaciquq?

³⁰Quyatekraarluku nerkuma, ciin cangakumasia quyatekelqa Agayutmun pitekluku?

³¹Taumek, nerrlerpeciuggun, mell'erpeciuggun-llu, callerpeciuggun-llu, tamaitgun Agayun ucurnarivkarciu.

³²Canganarqutaunaci pici Jews-aani, Jews-aarunrilngurni-llu, Agayutem-llu agayuviani.

³³Wiinga-llu callemkun tamaitgun ilukegcivkangnaqngamki tamalkuita, wangnek arcaqakevkenii, tau͡gaam amlleret pitekluki, anirtuumasqelluki.