Read Yupik 1 Corinthians 11 Bible Online

1 Corinthians 11 - Yupik bible

1 Corinthians 11

¹Maligtaquci wangnun, maligtaquyucimtun Christ-amun.

²Nanraramci umyuaqelaavcia tamaitgun, atulaavciki-llu piciryarat atulaasqucimtun.

³Tau͡gaam nallunrilkiciu man'a, Christ-am ciuqliucia yugnun tamaitnun, angutem-llu ciuqliucia nuliaminun, Agayutem-llu ciuqliucia Christ-amun.

⁴Angutem nacartuumaluni piicakuni, qaneryariurluni-llu qamiquni qigcikenritaa.

⁵Tau͡gaam arnam qamiquni patumavkenaku piicakuni qaneryariurluni-llu, qamiquni qigcikenritaa, ayuqngan qamiquni asmegcimalriatun.

⁶Tua-i arnam qamiquni capsunrilkuniu asmegeskili; tau͡gaam arnamun kasngunarqekan asmegingallerkani, pelatuugtuumakili.

⁷Angutem qamiquni patumanarqenritaa, ellii Agayutem tarenraqngaku ucurnarqutekluku-llu; tau͡gaam arnaq angutem ucurnarqutkaa.

⁸Tua-i arnamek tegumaluni angun pilimallrunrituq, arnaq tau͡gaam angutmek tegumallruuq.

⁹Tuaten-llu-wa angun pilimanrituq arnaq pitekluku, arnaq tau͡gaam pilimaluni angun pitekluku.

¹⁰Taumek arnam qamiquni patumanarqaa an'gilat pitekluki.

¹¹Ilangcivkenaku, Atanermi arnaq angutmek aipaicunaituq angun-llu arnamek.

¹²Arnam pilimallruciatun angutmek, tuaten angun maa-i yuurtelartuq arnamek. Tamarmeng-llu Agayutmek kingunengqertut.

¹³Cuqci elpecen̄ek, elluartuq-qaa arnaq Agayutmun piicakuni qamiquni patuunaku?

¹⁴Agayutem-qaa taqellrin ayuqucirtunritaiceci angun nuyarpaukuni kasngukarkauciitnek,

¹⁵tau͡gaam arnaq nuyarpaukuni ucurnarqutkarkauciitnek? Nuyangqerrami qamiqumi patutekaanek.

¹⁶Au͡gkut yuum qanemyuugautekekaki, wangkuta allakun picirkaitukut, Agayutem-llu tuaten agayuviini.

¹⁷Ukutgun tau͡gaam qanrutkellerkamkun nanranritamci, quyurtaqavci atawakarpecen̄ek piksailavci tau͡gaam atawaunrilngurmek.

¹⁸Wani-wa, ciuqliuluku qanruteksugaqa niitelqa, agayuvigmun quyurtaqavci allakaukut'larniluci ilaci-llu; tua-i piciuyugnarquq tamana.

¹⁹Ilumun inglulitellriartangqerrngalan, elluarrluteng pilriit akunlevcen̄i nallunaitesqelluki.

²⁰Quyurtaqavci, Atanrem nerevkaritiinek nereksaituci.

²¹Nauwa ner'aqavci, tamarpeci atanqutevkenaci nerlaavci, ilait kaigluteng, ilait-llu taangiqluteng.

²²Qaillun! Enaituci-qaa nervigkarpecen̄ek merluci-llu? Wall'u-qaa Agayutem agayuvia caunrilkarci kiaresngiatelluki-llu piilnguut? Qaillun qanerciqsia elpecen̄un? Nanrarciqamci-qaa mat'umek? Nanrarciigatamci!

²³Wani-wa Atanermek akurtulqa elpecen̄un-llu alerquutekellruaqa. Atanrem Jesus-aam unugmi taumi tunumatkamini kelipaq tegua.

²⁴Quyatekraarluku-llu, itumtaa, qanerluni-llu, “Wani-wa temka, elpeci pitekluci asmumalria, tegulluci nerici, tuaten pilaqici umyuaqlua.”

²⁵Tuaten cali, saskaq tegua atakutaumariameng, qanerluni, “Una saskam imaa nutarauguq, akquyun aumkun piciurngalria. Waten pilaqici, mer'aqavci umyuaqlua.”

²⁶Tua-i kelipaq tamana ner'aqavciu, saskamek-llu tamaaken mer'aqavci, Atanrem tuqullra qanrutkelararci tekitenqigtellerkaanun.

²⁷Taumek kina imna umyugailkarrluni kelipaq tamana nerkuniu, saskamek-llu tamaaken meq'uni, pinarqeciquq caunrilkillermikun Atanrem temiinek auganek-llu.

²⁸Yuk ellminek yuvrirraarli, nutaan nerkili kelipamek merluni-llu saskamek.

²⁹Wani-wa yuk nerkuni meq'uni-llu temii umyuaqevkenaku, ellminek qanercetaarutkaminek nerciquq merluni-llu.

³⁰Tamana pitekluku ilaci amlleret piniatut, apquciarluteng-llu, amlleret-llu elpegiulluteng tuqumalriatun.

³¹Tau͡gaam piciuluta wangkutnek cuqingakumta cuqcimangaitukut.

³²Tau͡gaam Atanrem cuqtaqakut, ellangcaumalartukut picirkiumasqevkenata nuna ilakluku.

³³Taumek, ilamaa, neryarturaqavci, atanqut'larci atunem.

³⁴Ilasi kaikuni enemini nererraarli, picurlallerkarpecen̄un quyurtenritnaurtuci. Cat allat kitugciiqanka tekiskumci.