Read Yupik 1 Corinthians 13 Bible Online

1 Corinthians 13 - Yupik bible

1 Corinthians 13

¹Qalarucinge'rma yuum wall'u an'gilam alungutiikun, tau͡gken kenkinrilkuma, catun kallagtellriatun ayuqciqua wall'u qasiarcetaatun.

²Cali-llu qalaruciyugngang'e'rma, nallunarqelrianek-llu taringumange'rma nallutaileng'e'rma-llu, ukvertung'e'rma-llu ingrim nugtartellerkaa caperqevkenaku, tau͡gken kenkinrilkuma, caunritua.

³Piutenka-llu tamalkuita tunengramki arrsaulriit neqkaitnun, temka-llu ekuavkangramku tuqutaulua, tau͡gken kenkinrilkuma catekngaitanka tamakut.

⁴Kenka ilalciuguq naklegtarluni-llu. Kenka ciknayuituq ellminek-llu nanrarpek'nani;

⁵ellminek pivakngaituq mulngaitevkenani-llu. Kenka ciumuanrituq; qenqercuituq umyuarrliquciyuunani-llu;

⁶assiilnguq nunanikenritaa, tau͡gken piciulria nunanikaa.

⁷Kenka tamaitni ilalciuguq, ukveqai tamalkuita, neryuniurutkai tamalkuita, pektayiinani tamalkuitni.

⁸Kenka nangengaituq. Tau͡gken qalarucineq, nangciquq alungutetgun qallacaraq, arulairciquq, elisnganeq-llu, pellugciquq.

⁹Elisngacirput tamalkuunrilami, qaneryariullerput-llu tamalkuuvkenani;

¹⁰tau͡gaam qaqimalria tekiskan, qaqimanrilnguq pellugciquq.

¹¹Mikelnguullemni, mikelngurtun qallatelallruunga, mikelngurtun-llu umyuangqerrlua, mikelngurtun-llu umyugiuraqlua; tau͡gaam taqmigcama, pegtanka mikelngiteqsarat.

¹²Maa-i tanglartukut tuarpiaq tarenriurutkun mecikutesciiganata, tuani tau͡gken tungaunata tangvauciiqukut. Maa-i carrarmek nallunrirtua, tuani tau͡gken tamalkuan taringeciqaqa Agayutem nallunriluciatun wiinga.

¹³Ukut pingayun wani-wa: ukveq, neryuniurun, kenka-llu, piugarkaugut, kenka tau͡gaam angenquqaat.