Read Yupik 1 Corinthians 3 Bible Online

1 Corinthians 3 - Yupik bible

1 Corinthians 3

¹Tau͡gaam, ilamaa, wii tuqlurciigatamci Anernellaulriatun, tau͡gaam kemegtauluci, mikelngurcetun Christ-ami.

²Milegmek tau͡gaam nerevkaramci, neqpianek pivkenaci; maa-i-llu cali pinariksaituci,

³tua-i kemegtaungavci cali. Wani-wa ciknataagucavci qanaataagulluci-llu, kemegtaunrituci-qaa, nutemllaq-llu yuum ayuqucia aturluku?

⁴Ilasi qanqan, “Paul-aam pikaanga,” alla-llu, “Apollos-aam pikaanga,” tuatnallerpeciuggun-qaa nutemllaunrituci?

⁵Kituuga Apollos? Paul-aaq-llu kituuga? Kevgauguk Atanrem apertuuciatun, elkegnegun ukvengesqelluci.

⁶Wiinga nauceciillruunga, Apollos-llu miirilartuq, Agayutem tau͡gaam naugivkalarai.

⁷Taumek nauceciirilria catngunrituq, merqilria-llu, tau͡gaam Agayun kiimi, nauvkartiit.

⁸Nauceciirilria merqilria-llu pitatekuk, tamarmek-llu ayuqlutek akiliutengqerciquk caliamegnegun.

⁹Calillgutkelriaruamta Agayutmun; Agayutem naucetaarvikaaci, eneliaqaaci-llu.

¹⁰Naklekutekun cikiumatacimtun Agayutmek, munalriatun enelistetun, elkarciunga inguqamek, allam-llu enelivikaa, yuk tamarmi murilkelli qaillun ayuqelriamek enelivikellerkaanek.

¹¹Wani-wa allamek yuk inguqirisciigatuq inguqerriumarilriim avatiini, Jesus Christ-am.

¹²Wani-wa kina inguqiumalriamun enelikan suulutaamek, wall'u akimek, wall'u teggalquqegtaarmek, wall'u muragmek, wall'u canegnek, wall'u acikuanek.

¹³Tamarmi yuum caliara manimaciquq; Erenrem taum nallunairciqngaku, kenerkun alairumaarkaungan, kenrem-llu yuvrirciqaa yuum tamarmi caliara.

¹⁴Inguqiumalriamun yuum eneliara piunrinrilkan, ellii nunuliumaarkauguq.

¹⁵Kia-llu caliara kenrem ekuakaku, cagmariciquq, ellii tau͡gaam anirtuumaarkauguq, tuarpiaq kenerkun.

¹⁶Nalluarci-qaa Agayutmun agayuvikucirci, Agayutem-llu Anernera elpecen̄i uitacia?

¹⁷Agayutem agayuvianek menuurcilria, Agayutem piunrirciqaa. Agayutem agayuvia kencignaqngan, elpeci-llu taunguuci agayuvii.

¹⁸Yuk iqlunrilli ellminek. Ilasi umyuartuyukekuni mat'umi ellami, ellminek usviilkessaguskili, umyuarturinaurtuq.

¹⁹Wani-wa nunam mat'um umyuartuyaraa Agayutmi caunrituq. Igausngiin, “Usvituyukellriit napcet'larai.”

²⁰Tuamta-llu, “Agayutem nallunritai usvitulriit umyugait, piciunriluciat.”

²¹Taumek kina yugnek ucuqinrilli. Cat tamalkuita pikngavciki,

²²Paul-aarungraan, wall'u Apollos, wall'u Cephas, wall'u nuna, wall'u unguva, wall'u tuqu, wall'u maanelnguut, wall'u tekitarkat, tamalkuita pikaci;

²³Christ-am-llu pikaaci, Agayutem-llu pikaa Christ-aq.