Read Yupik 1 Corinthians 4 Bible Online

1 Corinthians 4 - Yupik bible

1 Corinthians 4

¹Waten yuum umyuartequskilikut, Christ-am kevgaitun tarikestiitun-llu Agayutem iirumalriartainek.

²Wani-wa tarikesta piciuluni piarkauguq.

³Tau͡gaam, elpecen̄un cuqcimallerkaqa qaillukuarten̄un-llu, wangni caunrituq. Wangnek tuaten cuqtesciigatua.

⁴Tua-i pinarqutka nalluamku, nallungramku tau͡gaam pinarqutaitenricaaqua. Ataneq cuqcistekaqa.

⁵Taumek picirkiriyaqunaci pinarivailgan, Ataneq tekipailgan, elliin tan'germi iirumalriit tanqigciiqai; yuut-llu ircaqruita umyuangutait maniciqai. Tuani nutaan yuk tamarmi Agayutmek elluakumaarkauguq.

⁶Makut maa-i, anelgutmaa, wangnun ellianka Apollos-aamun-llu, elpeci pitekluci, wangkugnegun nallunriisqelluci yuullerkarpecen̄ek qaneryaraq aturluku, nalirci ellminek pivakesqevkenaku ilami tungiitnun.

⁷Tua-i kia allaurcetaten ilavnek? Camek avalingqercit ciuniunrilkevnek? Ciuniullrukuvgu, ciin ucuryaguteksiu cikiutngunrilngurtun?

⁸Maa-i-llu miurumauci! Maa-i tukuurtuci, ilakevkenata atanrurtuci, Ilumun atanrusqumayaaqamci, ilakluta atanruyalriakut.

⁹Wii umyuarteqlemni Agayutem kingumek elkartaakut apostle-aarulriani tangrrutngusqelluta tuqutarkatun; tua-i piciliutngurcamta nunamun, an'gilanun yugnun-llu.

¹⁰Wangkuta usviilnguugukut Christ-aq pitekluku, tau͡gaam elpeci Christ-ami umyuartuuci. Wangkuta piniatukut, elpeci tau͡gaam pinirluci. Elpeci takarnarquci, wangkuta tau͡gaam takarnaunata.

¹¹Man'a engelkarrluku kailartukut meqsugluta-llu, aturarrliqukut, calluumaluta, nakmiin-llu enaunata,

¹²cakviulartukut, unatemteggun caliurluta. Caunrilkumaaqamta, atawaqaasqilartukut, nangcimaaqamta, ilalcilartukut;

¹³iqluurutkumaaqamta, kenegyagucingnaq'lartukut; ellam caarrluatun maa-i ayuqliriukut, keligautallertun-llu iqalriatun.

¹⁴Iganritamci makunek kasnguyuusqelluci, tau͡gaam ayuqucirtuanaluci irniamtun kenkumalriacetun.

¹⁵Wani-wa amlleqapigtengraata ayuqucirturceci Christ-akun, amllernek atangqenrituci. Ataksagucavcia Christ-ami Jesus-aami gospel-aakun.

¹⁶Taumek eguaquramci, maligeskicia.

¹⁷Taumek Timothy elpecen̄un ayagcetaqa, irniaqa kenkek'ngaqa, piciulria-llu Atanermi, neq'angevkaasqelluci ayuqucirtuutemnek Christ-akun elitnaullrucimtun, tamiini agayuvigni tamaitni.

¹⁸Ilaita qacungakaatnga, tekisngaicuklua elpecen̄un.

¹⁹Tau͡gaam ullagciqamci tamaa, Atanrem pisqumakanga, nutaan nallunrirciqanka qacungayulriit, qanellritgun pivkenaki, tau͡gaam caliaratgun.

²⁰Tua-i Agayutem Angayuqauvia qanllerkun pinrilan, tau͡gaam pinikun.

²¹Qaillun pisqumaceci? ullaglamci-qaa kaugtuutalgirlua, wall'u kenkakun pillaganrilngurkun?