Read Yupik 1 Corinthians 6 Bible Online

1 Corinthians 6 - Yupik bible

1 Corinthians 6

¹Ilasi pitengqerquni ilaminun, ullautekarkaugaa-qaa cuqcisten̄un agayumanrilngurnun, agayumalrianun pivkenaku?

²Nalluarci-qaa nunam cuqcimallerkaa ukverumalrianun? Nuna cuqcimaarkaukan elpeciuggun, caussiyaanrilngurnek-qaa cuqcisciigatuci?

³Nalluarci-qaa an'gilanek cuqciarkaucirput? Taumek arcaqerluki, unguvam mat'um pii piyugngaaput.

⁴Tua-i-llu qanercetaarutkangqerquvet unguvam mat'um piinek, ciin ullautelarceciki agayuviim pikegtaunrillrinun?

⁵Qanrutkaqa man'a kiaresngiatelluci. Yugtaituq-qaa akunlevcen̄i umyuartulriamek cuqciyugngalriamek ilakuyutellriani?

⁶Tau͡gaam yuk anelgutminek picetaarucilartuq, ukverumanrilngurnun.

⁷Apqaurvigmi picetaarucilallerci ilavcen̄ek cirliqutekarci. Ilalcirluci ciin pinriceci? Teguivkarluci-llu?

⁸Elpeci tau͡gaam ilalkilartuci, teguiyugluci-llu ilavcen̄ek.

⁹Nalluarci-qaa elluanrilnguum paitarkangqenrilucia Agayutem Angayuqauvianek? Alarcaqunaci; akusrartellriit, agayutngualilriit-llu, acuniatulit-llu, angutngullgutmeggnek-llu akusrarutekilriit,

¹⁰teglengalriit-llu, aglumayulriit-llu, taangiqtulit-llu, caunrilkilriit-llu, uayaariyulriit-llu, Agayutem Angayuqauvia piksagusngaitaat.

¹¹Ilaci-llu tuaten ayuqellruut. Tau͡gaam eruumauci kenciknarivkaumauci, Atanrem Jesus Christ-am atrakun ellualriarurtuci, Agayutemta-llu Anernerakun.

¹²“Cat tamarmeng inerquutngunritut wangni,” tau͡gaam tamarmirrluteng atawaunritut. “Cat tamarmeng inerquutngunritut wangni,” tau͡gaam tamakut ataniumangaitaatnga.

¹³“Neqkaq piuguq aqsaqumun, aqsaquq-llu neqkamun atuuluni,” tau͡gaam Agayutem piunrirciqak atunem. Temvut atuusqumanrituq akusrarutmun, tau͡gaam Agayutmun, Agayun-llu tememten̄un.

¹⁴Agayutem-llu makcetellrua Ataneq, wangkuta-llu makceciiqaakut pinimikun.

¹⁵Nalluarci-qaa temsi ilakucianek Christ-amun? Taumek-qaa Christ-am ilii teguciqaqa akissunun-llu ilaulluku? Watqapik!

¹⁶Nalluarci-qaa kina imna akissumun ellminek ilautellria kemellguteksaguyucia? Igausngaciatun, “Taukuk atauciurtarkauguk kemegkun.”

¹⁷Tau͡gaam Atanermun ilausngakuni Anernerkun atauciurtuk.

¹⁸Ulurciu acunianeq. Cat allat assiilngiryarat yuum atullri temem elatiintut; tau͡gaam acuniatuli nakmiin tememinun assiilngirtuq.

¹⁹Nalluarci-qaa temsi Anernermun Tanqilriamun, Agayutem cikiutiinun, enekucia? Elpecen̄ek pikenrituci.

²⁰Kipucimauci akituluci. Taumek temevciuggun ucurnarivkarciu Agayun, anernerpeciuggun-llu, Agayutem pikngaki.