Read Yupik 1 Corinthians 7 Bible Online

1 Corinthians 7 - Yupik bible

1 Corinthians 7

¹Apyuteklerci piluku igakun. Atawauyartuq angutem arnaq agtuqsailkuniu.

²Tau͡gaam, negurallerkaa akusrarutekiyaram pitekluku, angun tamarmi nakmiin nuliangqerrsunarquq, arnaq-llu nakmiin uingqerrluni.

³Angun nuliaminun maligtaqutnarquq, arnaq-llu uiminun.

⁴Tua-i nulirrulriim ataniumanrilaku nakmiin temni, uingan tau͡gaam; tuaten-llu uingan nakmiin temni ataniumanritaa, nulirran tau͡gaam.

⁵Asmuurutevkenatek atunem, tau͡gaam umyuallguteklutek uitakitek, piicallerkarpetek cumigutlerkaakun; kinguani ataam quyurtarkaulutek, tuunrangayagmun naspaanayuklutek kemgem piyullrakun.

⁶Alerquutmek pinritamci, tau͡gaam pisqumayaaqluci qanrutamci.

⁷Yuut tamalkuita wangtun ayuqesqumayaaqanka. Tau͡gaam yuk tamarmi allakarmi cikiutengqertuq Agayutmek, una uumek, ingna-llu allamek.

⁸Aipangeksailngurnun, aipainernun-llu qanertua, atawauyartuq ellaitnun kiimeta'arqata wangtun.

⁹Tau͡gaam kemegkun uitangnaqesciigalkuneng, kassuullit. Atawaunruciqngan kassuuskuni umyuam aglumallrakun nangteqevkenani.

¹⁰Kassuusngalriit-llu alerquranka, wangnek pivkenii, Agayutem tau͡gaam, nuliarulriim uini avvutenrilliu.

¹¹Avvuteng'e'rmi-llu, allamek uingenrilli, wall'u ataam kenegyagulliu uini; angutem-llu tuaten nuliani avvutenrilliu.

¹²Tau͡gaam allat qanrutanka, Atanrem qanelqenrilengraaku, anelgutvut nuliangqerqan ukverumanrilngurmek, tauna-llu uitayukan, avtesqevkenaku.

¹³Arnaq-llu uingqerquni ukverumanrilngurmek, tauna-llu nayuucukan, avtesqevkenaku.

¹⁴Wani-wa ukverumanrilnguq uingulria nuliamikun kencignarivkaumauq, ukverumanrilnguq-llu nulirrulria uimikun kencignarivkaumaluni. Tuaten pinrilkan, irniaci menuuyartut, tau͡gaam maa-i menuitut.

¹⁵Tau͡gaam, ukverumanrilnguq aipaq avcukan, tuaten pili; watnacilriani ilavut angun wall'u arnaq petuumanrituq. Tua-i Agayutem kelgakut nepaitnamun.

¹⁶Nulirrulriami, qaillun nallunriciu anirtullerkaa uivet? Uingulriami, qaillun nallunriciu anirtullerkaa nulirpet?

¹⁷Tau͡gaam tamarmi yuk yuukili Atanrem elkaruciatun, Agayutem-llu kelellruciatun. Maa-i picirkiuteka tamalkuitni agayuvigni.

¹⁸Kelgumallermini nuugiumallrukuni, nuugiumallni ciminrilliu. Kelgumallermini-llu nuugiumallrunrilkuni, nuugircetenrilli.

¹⁹Wani-wa nuugiryaraq nuugiumanricaraq-llu catngunrituq, tau͡gaam Agayutem alerquutain atullrat.

²⁰Yuk tamarmi uitanarquq kelgumacirmitun kelgumallermini.

²¹Teguarullruuten-qaa kelgumallerpeni? Ilangcinrilgu. Tau͡gaam angicimallerkan unaksugngakuvgu, ciuniurru.

²²Wani-wa teguarung'e'rmi Atanermek kelgumalria, Atanermi teguarunrirtuq. Tuaten-llu teguarunrilnguq kelgumakuni, Christ-amun pisten͞gurtuq.

²³Kipucimauci akituluci, yugnun pisten͞gurcaqunaci.

²⁴Taumek ilamaa, yuk tamarmi kelgumallermini, uitakili Agayutmi.

²⁵Tua-llu aipangeksailnguut pitekluki, alerquutaitua Agayutmek, tau͡gaam umyuaqa anteqatarqa, tua-i Atanrem takumcukutiikun qanelqa ukvernaqngan.

²⁶Nanikuallerkaq ukna pitekluku, atawauciquq yuk kiimetaurquni ayuqucimitun.

²⁷Nulirtuumakuvet, kitak avtengnaqsaqunaku. Nulirtuumanrilkuvet, kitak yuanrilu nulirkarpenek.

²⁸Tau͡gaam kassuuskuvet, assiilngirngaituten, neviarcar-llu kassuuteng'e'rmi assiilngirngaituq. Tau͡gaam aipaqutellriit arenqaillugutengqerciqut kemegkun, tamatumek aviucuumiryaaqamci.

²⁹Tau͡gaam mat'umek qanertua, ilamaa, pillerkaq ikgelian: wak'nirnek, nulirtuumalriit nulirrilngurcetun ayuqlit,

³⁰umyuiqellriit-llu, umyuiqenrilngurcetun ayuqluteng, nunaniryulriit-llu, nunaniryunrilngurcetun ayuqluteng, kiputellriit-llu, piilngurcetun ayuqluteng,

³¹nunam-llu mat'um piin aturtaita, arcaqakenrillitki. Tua-i nunam ayuqucia pellugciqngan.

³²Umyuarrlugcaraasqumanritamci. Nulirrilnguum piyuumilarai Atanrem caliari, qaillun Atanrem ilukegcivkallerkaa.

³³Tau͡gaam nulirtuumalriim piyuumiutek'larai nunam pii, qaillun nuliami ilukegcivkallerkaanek.

³⁴Ayuqenrituk-llu uilek arnaq wall'u neviarcar, neviarcaraam aipangeksailnguum arcaqakelaraa Agayutem caliara tememikun anernermikun-llu elluallerkaminek; tau͡gaam uilgem arcaqakelarai nunamiutaat, qaillun uimi ilukegcivkallerkaanek.

³⁵Makunek qalartua elpeci pitekluci. Pisciigalutekarpecen̄ek pivkenii, tau͡gaam Ataneq elpecen̄un cumigutesqelluku malrupegtevkenaci.

³⁶Yuk umyuarteqkuni elluarrluni pinricukluni nulirkautmi tungiinun, aglumallra tuknikan, qaillun-llu piviilkuni, umyuani aturliu, assiilngirngaituq, kassuuskilik.

³⁷Tau͡gaam umyuamikun asvailkuni qaillun piviitenrilkuni, tau͡gaam kemgem piyullra negtaaryugngaluku, umyuamikun-llu elkareskuniu nulirkautekqainarluku, atawauciquq.

³⁸Taumek nulirkautminek nulirtulria elluarrluni piuq; nulirtunrilkuni-llu assinruciquq.

³⁹Arnaq petuumauq uiminun unguvaan taktaciatun. Uini tuqukan, umyuani aturluku uingarkauguq piyullminek, Atanerkun tau͡gaam.

⁴⁰Tau͡gaam wii umyuarteqlemni atawaunruciquq uingenrilkuni. Umyuartequa Agayutem Anernerakun tuaten qallacuklua.