Read Yupik 1 Corinthians 8 Bible Online

1 Corinthians 8 - Yupik bible

1 Corinthians 8

¹Agayutnguanun elliilallrat neqkanek pitekluku nallunritukut “elisngamek tamamta avalingqertukut.” “Elisnga” pivakelartuq, tau͡gaam kenka asvairilartuq.

²Kina nallunricukluni umyuarteqkuni, nallunriqsaitai nallunrirarkani.

³Tau͡gken yuum kenkekuniu Agayun, elliin nallunritaa.

⁴Taumek, agayutnguanun ellimalriit nerrlerkaat pitekluku, nallunritukut agayutnguam piunrilucianek, agayucetailucianek-llu Agayutem ataucim avatiini.

⁵Taumek niitelaryaaqukut “agayutnek” aprumalrianek qilagmi wall'u nunami, amllerrsaaqngata “agayutet” “atanrulriit-llu,”

⁶tau͡gaam wangkutni Agayun atauciuguq, Aata, cat tamarmeng kingunrat, elliinun-llu yuugukut; Ataneq-llu atauciq, Jesus Christ-aq, elliikun cat tamarmeng piulriit, wangkuta-llu elliikun yuugukut.

⁷Tau͡gaam, ilaita tamana nalluat. Tau͡gken, ukanirpak agayutnguat piukngamegteki, nerlarait tamakut neqkat ilumun agayutnguanun cikiuteksukluki, umyuaqegtaaraat-llu asvaitenrilami, menuurtuq.

⁸Neqkam pikanirngaitaakut Agayutmun. Picurlautekngaitarput nerenrilkumta, pikaniutekngaunaku-llu nerengramta.

⁹Tau͡gaam mulngakici umyugiullerpeciuggun ukverkilnguut qaillun paallagcetnayukluki.

¹⁰Yuum tangerquniten “nallunritellriami,” elpet nervigmi agayutnguam eniini, umyuaqegtaarii pinialkan, unayaqellriatun maligtaqutevkarciqlian, agayutnguamun cikiutngulria nerkuvgu.

¹¹Tuaten “elisngavkun” tauna ukvemikun asvaitenrilnguq navguumauq, ilasi Christ-am tuqutekellra.

¹²Tuaten ilavcen̄un assiilngirluci, umyuaqegtaarait-llu piniatellriit kilirluki, Christ-amun assiilngirtuci.

¹³Taumek, nerrlemkun paallagcetarkaukumku ilaka, kemegmek nerngaitua, anelgutka paallagcetnayukluku.