Read Yupik 1 Corinthians 9 Bible Online

1 Corinthians 9 - Yupik bible

1 Corinthians 9

¹Umyugiurciigatua-qaa? Apostle-aarunritua-qaa? Tangeqsaitaqa-qaa Jesus Atanerput? Caliaqellrunritamci-qaa Atanermi?

²Allanun apostle-aarunrilnger'ma, elpecen̄un tau͡gaam piugua; tua-i elpeci nallunairutekngaci apostle-aarucima Atanerkun.

³Maa-inguuq kiuteka yuvrirtemnun.

⁴Umyugiurciigatukut-qaa neqkamten̄ek merkamten̄ek-llu?

⁵Umyugiurciigatukut-qaa nuliamten̄ek, wall'u nayagamten̄ek malingqellerkarput, allacetun-llu apostle-aacetun, Atanrem-llu kinguqliitun, Cephas-aatun-llu?

⁶Wall'u-qaa kiimegnuk Barnabas-aaq-llu calinricunaitukuk yuungnaqutekamegnek?

⁷Kina anguyagta ellminek akiliuciiqa? Kina naucetaarvililria nerngaita atsainek? Kina-llu katngagnek aulukilria tamaaken milegmek aturngaita?

⁸Yuum-qaa waten qanlauciatun qanertua? Wall'u-qaa alerquutni-llu tuaten qanrumauq?

⁹Igausngiin Moses-aam Alerquutaini: “Sugg'iliciryaqunaku kuluvak mukaarkanek qeltairilria tutmarluki.” Kuluviit-qaa tau͡gaam Agayutem umyuaqai?

¹⁰Wangkuta-qaa pitekluta tuaten qanenrituq? Wangkuta pitekluta tuaten igausngauq, nunamek itumcilria, mukaarkanek-llu qeltairilria neryuniurnarquq atu'urkameggnek tamaaken naullernek.

¹¹Anernellarnek nauceciillrukumta akunlevcen̄i, neryuniurngaitukut-qaa nunamiutarnek atu'urkamten̄ek elpecen̄ek?

¹²Allat tuaten elpecen̄i pivkalaata, wangkuta-qaa nutaan tuaten pinarqaakut? Ilangcivkenaku, man'a piyunarqutvut atuqsaitarput. Tau͡gaam nangtequangramta Christ-am Gospel-aara piviirngaitarput.

¹³Nalluarci-qaa agayuvigmi kevgiulriit neqkanglauciat agayuvigmek, ekuavigmi-llu kevgiulriit neqkanglauciat Agayutmun cikiutekumalrianek?

¹⁴Tuaten-llu, Atanrem alerquucillratun gospel-aam qalarutkestai gospel-aakun cali yuutekangarkauniluki.

¹⁵Wii tau͡gaam tamakut piarkaqsallrenka atuqsaitanka, maa-i-llu iganritamci tuaten unangyuumirlua. Ucuryagutemnek teguimaarkaukuma, wii tuqullerkaqa cucuksarqa.

¹⁶Tua-i gospel-aaq qalarutkengramku, tamana ucuryagutekenritaqa, caliarkaqngamku. Aa-ang, nakleng wiinga, qalarutkenrilkumku gospel-aaq!

¹⁷Wani-wa wangnek umyuaqa aturluku calikuma, nunuliutekangqertua; tau͡gaam umyuaqa aturpek'naku tuaten pikuma, ellimerrumaciqa aturaqa.

¹⁸Cauga tuall' nunuliuteka? Uunguuq: Gospel-aaq qalarutkekumku, akiinaku qalaruteklaku, atucurlanritlerkaakun piyugngalqa gospel-aakun.

¹⁹Yugni tamaitni teguarunrilnge'rma, wangnek pisciutua tamalkuitnun, amllernek unangyuumirlua.

²⁰Jews-aanun Jews-aatun ayuqliriunga, tamaaggun unaknaluki; Alerquutem qulliliumakainun, wiinga-llu tuaten Alerquutem qulliliumakiitun ayuqliriunga, tamakut unaknaluki.

²¹Alerquutailngurnun, wiinga-llu Alerquutailngurtun ayuqliriunga, Agayutem tungiinun alerquutaitevkenii, Christ-am Alerquutain qulliliumalua, unaknaluki Alerquutailnguut.

²²Ukverkilngurnun, wii-llu ukverkilngurtun ayuqliriunga, tamakut unaknaluki. Yugnun tamaitnun wii-llu ellaicetun ayuqliriunga, ellait unaksuumiryaaqluki.

²³Gospel-aaq pitekluku tuaten pilartua, atawaqautainun pillguciutnalua.

²⁴Nalluarci-qaa aqvautellriani tamarmirrluteng pilrautelauciat, ataucim-llu tau͡gaam kiimi akurtulaucia akiliutmek? Tuaten aqvauci, unaknaurarci.

²⁵Tamarmeng pinirtaalriit tamaitgun pitalqeggluteng yuulartut. Unangllerkarteng nasqerrutmek piunerkilengraan tuaten pilartut, wangkuta tau͡gken piunriyuilngurmek.

²⁶Aqvautenritua picimtun, callu'ugqama-llu tengluunka cailkamun tut'eksaitut.

²⁷Tau͡gaam temka pinircala'arqa ataniumaluku-llu, allat ayuqucirturraarluki wangnek katagnayuklua.