Read Yupik 2 Corinthians 1 Bible Online

2 Corinthians 1 - Yupik bible

2 Corinthians 1

¹Wii, Paul-aaq, Christ Jesus-aam apostle-aarani Agayutem pisqumallrakun, Timothy-mek ilalua ilamten̄ek, Agayutem agayuvianun Corinthia-melngurmun, tamalkuitnun-llu agayumalrianun Achaia-melngurnun:

²Naklekun piuli elpecen̄i uitanqegcin-llu Agayutmek Atamten̄ek, Atanermek-llu Jesus Christ-amek.

³Nanraumali Agayun Atanrem Jesus Christ-am Atii, takumcutalria Aata, Agayun-llu caceturcilria!

⁴Elliin caceturtaakut arenqiallugutemten̄i tamalkuitni, tuaten wangkuta-llu caceturciyugngasqelluta arenqiallugingalrianek, qaruyun aturluku Agayutmek qaruyutkellerput.

⁵Amllermek nangteqellgutekngamteggu Christ-aq, tuaten-llu Christ-akun angelria qaruyun aturarput.

⁶Arenqiallugingakumta, qarutaagutkauguq elpecen̄un anirtuutekauluni-llu; tuaten-llu qarucimakumta elpeci qarutaagutkarci, aturarkarci ilalcirluci nangteqellgutkekuvcikut.

⁷Neryuniurutvut elpecen̄un pektaanrituq; nallunritaqa nangteqellgutkekuvcikut qarucimallgutkarkauciput.

⁸Nalluyurcisqumanritamci, anelgutemni, nangtequteklemten̄ek Asia-mi; anagulluta tememteggun navgumallruamta atuyunailngurmek, unguvallerkarput tuaten caperqellruyaaqluku.

⁹Umyuarteqsaaqellruukut tuqullerkarput tekicukluku. Tamaaggun nasvicimaukut wangkutnek cacetuqutekesqevkenata, Agayun tau͡gaam tuqumalriit makcestiit.

¹⁰Elliin aviutaakut tuquyallemten̄ek, elliin-llu aviuciiqaakut, cacetuqutekarput-llu mat'um kinguani cali aviucimallerkamten̄ek.

¹¹Ikayuqicikut piicallerpeciuggun, amlleret quyateknauraat ikayuumacirput, piicalriit amlleret kiumallratgun.

¹²Quyatekaqa man'a, umyuaqegtaaramta nallunairutii canganarqutaunata piciuluta-llu egilrucimten̄ek nunamiut akuliitni, elpeci-llu tungevcen̄un arcaqerluta, nunam umyuartunrakun pivkenata tau͡gaam Agayutem naklekutiikun.

¹³Wani-wa naaqsunailngurnek taringesciigalkevcen̄ek-llu iganritamci; taringeluaqaasqumayaaqngamci,

¹⁴elliikun taringumayaaqngavci, quyatekesqelluta wangkuta-llu quyatekciqngamceci, Atanrem Jesus-aam Ernerkaani.

¹⁵Tamana nallunrilamku, ullagyullruyaaqamci ciumek, angenranek angniutengqerresqelluci.

¹⁶Macedonia-mun ayakuma nunasviksullruyaaqamci, Macedonia-mek-llu ut'reskuma cali tumeksugluci, elpecen̄un qaniisqellua Judea-mun ayakuma.

¹⁷Nalirrugglua-qaa tuaten pinguallruunga? Nunamiungulriatun-qaa picirkirilartua, piarkauniaqlua, pingaitniaqlua-llu tuaten?

¹⁸Agayutem piciutaciatun, qanellrenka elpecen̄un nalirrugutngunritut, angraqlua, qangaaraqlua tuaten.

¹⁹Wani-wa Agayutem Qetunraa, Jesus Christ-aq, akunlevcen̄i qalaruteklerput, Sylvanus, Timothy, wiinga-llu, nalirrugutngunrituq, wall'u “Aa-ang,” wall'u “Qang'a;” tau͡gaam elliin qanellra “Angeryararrlainauguq.”

²⁰Elliini Agayutem akqutai tamarmeng “Angrumaut.” Taumek-llu elliikun Amen-aalartukut Agayutem ucurnarillerkaanun.

²¹Wani-wa elkarcesteput elpeci-llu Christ-akun Agayutnguuq, caliarkitaakut-llu;

²²takarnarqutminek-llu nallunailkuciraakut piklakuarutmek, Anerneminek-llu ircaqurput ellivikluku nallunairistekesqelluku.

²³Tau͡gaam Agayun niitestekluku qanrutamci, takumcukngamci nunuryuumiinaci ullaksaitamci Corinth-amun.

²⁴Ukverpecen̄un atanrussaagngailamta, calillgutekngamceci-llu angniutekarpecen̄ek, ukverpeciuggun pektayiilavci.