Read Yupik 2 Corinthians 10 Bible Online

2 Corinthians 10 - Yupik bible

2 Corinthians 10

¹Wii, Paul-aami, wangnek qarutaaramci, ellmikutuullrakun pillaganritellrakun-llu Christ-am, wii ellmikutuulalriami ciuqerpecen̄i, tau͡gaam uluryara'aqsaunii elpecen̄un, nayunritaqamci.

²Qanrutamci nayullemni uluryara'aqsaitelqa aturyuumiinaku elpecen̄un; aturarkauyaaqaqa ilaitnun umyuartequtestemnun nunamiutarkun pekcuklua.

³Nunamelengramta nunamiutarkun anguyanritukut.

⁴Tua-i saskuput anguyautessuuteput nunamiutaunritut, tau͡gaam piniutengqertut pakemkumiutarmek, navguriyugngaluteng asvailkutanek.

⁵Piunrilaraput ingluliurutet tamaita-llu nagirautet Agayutem elisngiinun, umyuat-llu tamalkuita cirlakumaanka Christ-amun niisngavkarluki.

⁶Niisnganritneq tamalkuan anucimirqecetaaryukaarluku, elpeci niisngallerci tamalkuureskan.

⁷Tangvalararci yuk tangellrakun, ukvengqerquni yuk ellminek Christ-amun yuksukluni, neq'akqerliu man'a, Christ-amun ellii pikuciatun, tuaten-llu wangkuta pikucimten̄ek.

⁸Anaguqu'urlua ucuryagutekengramku piyunarqucirput, Atanrem taitellra naullerkarpecen̄un piunrillerkarpecen̄un pivkenani, kiaresngialutekngaitaqa.

⁹Alingcetaarnganaci pinritua kalikakun.

¹⁰Qanrata, “Paul-aam-gguq igautai tusnganqaanarqut tukniluteng-llu, tau͡gaam temii tangllermikun pinianani, qalartellra-llu kemyunaunani.”

¹¹Taringlitgu man'a, cataunii kalikakun qanllemtun tuaten cali piciqua ciuqerpecen̄i.

¹²Ilautengnaqenritua ellaitnun ellmeggnek pivakelrianun, wall'u pitassiarutevkenii wangnek ellaicetun. Tau͡gaam cuqtaarutaqameng pitassiarutaqameng-llu ellmeggnek atunem taringumanritut, cacirteng nalluatgu.

¹³Tau͡gaam wangkuta, anagarulluta nanrarngaitukut, tau͡gaam engeliumacimcetun Agayutmek elpeci ngelekluci.

¹⁴Tua-i kiturarusnganritukut wangkutnek, nurtellriatun pivkenaci; ciumek wangkuta tekiutellruamceci Christ-am Gospel-aaranek.

¹⁵Engelput kiturluku ucuryagcinritua allat caliaratgun; tau͡gaam neryuniurtua ukvengiinallerci maliggluku calivigput-llu akunlevcen̄i iqturisqumaluku.

¹⁶Avatevcen̄i cali Gospel-aaq qalaruteknaluku ucuryagutekevkenaku, allat nunaitni caliaqumarilleq.

¹⁷“Ucuryagutekilriim, ucuryagutekliu Ataneq.”

¹⁸Wani-wa yuk ellminek nanralria ciuniurumangaituq, Atanrem tau͡gaam nanraqii.