Read Yupik 2 Corinthians 11 Bible Online

2 Corinthians 11 - Yupik bible

2 Corinthians 11

¹Cangaksaqunacia umyugaiteqange'rma. Ilumun pillguciqaqercia.

²Pakemkumiutarmek ciknakutamci, tua-i pikautekliucamci Christ-amun tunenaluci nulirkautetun menuilngurtun kiingan uikautiinun.

³Tau͡gaam aaqamci ciissirpiim iqlullruciatun Eva usvituyartellermikun, elpeci-llu umyuarci avvnayukluku piciulriamek menuilngurmek-llu, Christ-am kenkellranek.

⁴Tua-i yuum tekiskaci allamek anirturtem̄ek qalarulluci qalarutekeksailkemnek, anernermek-llu allamek akurtuquvci akurtuqsailkevcen̄ek, allamek-llu gospel-aamek ciuniuquvci ciuniuqsailkevcen̄ek, quyateksukaaralararci.

⁵Umyuartequa mikellrunricuklua ukuni apostle-aani ellmeggnek angkellriani.

⁶Qalartellemkun puqinrilnge'rma, elisngaka nuringanrituq, cat tamaitgun taringnaqlua, akunlevcen̄i maniitellruamci mat'umek.

⁷Picurlagtua-qaa wangnek caunrilkellemkun, elpeci naluumasqelluci; Agayutem gospel-aara qalarutekngamku akiinaku elpecen̄un?

⁸Allat agayuviit uayaapigainalaranka, ciuniurillemkun aulukutaitnek kevgiullerkarci pitekluku.

⁹Elpecen̄etlemni-llu nuqlit'nge'rma yuk nenguluugtenritaqa, ilama Macedonia-mek tekitellriit piilutemnek aulukngatnga. Taumek nenguluugtenritamci imumi, maa-i-llu pingaunaci.

¹⁰Christ piciutaciatun wangni, ucuryaguteka man'a nepairumangaituq Achaia-m nunaini.

¹¹Ca pitekluku? Kenkenrilamci-qaa? Agayutem nallunritaanga, kenkamci.

¹²Ayuqucilqa cakanirpek'naku piurciqua, piunrilli'irnaluku qanlallrat imkut ellmeggnek ucuryaggluteng caliamegteggun wiinga pitateknilua.

¹³Taukut apostle-aaruaruut piciuvkenateng, iqlungalriit calistet; Christ-amun apostle-aarunguarluteng.

¹⁴Alangaanarqenritut-llu, tuaten tuunrangayak-llu an'gilaunguarcecillruan tanqilriarunguarluni.

¹⁵Taumek tangnerranarqenrituq pistai-llu ellmeggnek kamanaircaqata elluamun kevgaunguarluteng. Ciunerkangqertut caliameng ayuqiitnek.

¹⁶Pulengllua qanertua, yuk umyuarteqenrilli usviicuklua; tau͡gaam usviilkengerpecia, ciuniurcia usviilngurtun, tuaten wiinga-llu ucuryagukarangqerrniartua ellaicetun.

¹⁷(Qanrutkelqa man'a qanrutkenritaqa Atanerkun, tau͡gaam usviilngurtun nalirrugnerunii ucuryagucimkun.

¹⁸Amllelriit nunamiutaat ucuryagutekngatki, wiinga-llu tuaten piciqua.)

¹⁹Usviilnguut tuatequalaraci, usvingqelliniavci elpeci.

²⁰Tua-i cangalliuqsailavci yuum teguarurcetaqaci, negiraqaci, teguigaqaci, wall'u ellminek pivakekuni, wall'u kegginarpeciuggun qacareskaci.

²¹Wii usviilngurtun qanqatartua, ca yuum ucuryagutekellra, wii-llu ucuryaguteksugngaaqa tamana.

²²Hebrews-aaruut-qaa? Wiinga-llu-wa. Israel-aaruut-qaa? Wiinga-llu-wa? Abraham-aam-qaa kinguveqai? Wiinga-llu-wa.

²³Christ-am-qaa kevgaqai? Wiinga pinruunga, usviirutellriatun qanertua, angenrulriamek caliarlua, amllenrulriamek-llu itengqaaqlua, kaugtuarumaaqlua naaquciilngurnek, pulengtaq-llu tuqu mallegtaqluku.

²⁴Tallimarqunek piqertularaatnga Jews-aat, qiuqnernek yuinaam aipaa naatenritqerluku.

²⁵Pingayurqunek-llu kaugtualaraatnga kaugtuutarteggun: ataucirqumek-llu teggalqutgun miluqullruatnga. Pingayurqunek sun'akun qalugyallruunga; unugpak ernerpak-llu imarpigmi mermetellruunga.

²⁶Pulengtaq tarrirtaqlua, merkun aarnarqelria aturaqluku, tuqutarayulitgun aarnarqelria aturluku, alingniurlua-llu nakmiin yumnek, Agayumanrilngurnek-llu alingniuraqlua, nunarpagni aarnarqelria aturaqluku, yuilqumi-llu aarnarqelria aturaqluku, imarpigmi-llu, ukverumangualriani-llu aarnarqelria atula'rqa.

²⁷Makugtelartua nangtequagaqlua-llu, unuut amlleret aturluki qavaqsaunii, kaigaqlua meqsuglua-llu, pulengtaq neqkaitaqlua, nenglliuraqlua, aturaituraqlua-llu.

²⁸Tamakut-llu avatiitni, erenret tamaitni umyuamnun ek'lartuq agayuviit peng'gartellrat.

²⁹Kina cirlaukan, wiinga-llu-qaa pinialngaitua? Kina-llu picurlagcecimakan, wiinga-llu-qaa yurnayugngaitua?

³⁰Ucuryaguciarkaukuma, pinialutenka ucuryagutekciqanka.

³¹Agayutem Atanrem Jesus-aam Atiin, akwarpak nanraumalriim nallunritaanga iqlunrilucimnek.

³²Damascus-aami, Atanerruam Aretas, atanrullermini murilkaa nunarpak Damascus, tegunalua.

³³Tau͡gaam egalerkun nunat qacarneratgun atrartaatnga kalngagmun eklua, tuaten qimagcetaatnga unatainek.