Read Yupik 2 Corinthians 12 Bible Online

2 Corinthians 12 - Yupik bible

2 Corinthians 12

¹Ucuryaguciqatartua, catnguarkaunrilengraan, egmiuciiqaqa nasvicimalqa, nallunairutai-llu Atanrem.

²Nallunrilkengangqertua yugmek Christ-amelngurmek, maa-i allrakut akimiarunritaraurtellriit, ayaucimallermek qiliit pingayuatnun (Aipaagni temtuumarmi wall'u temni unilluku, nalluaqa, Agayutem kiimi nallunritaa).

³Nallunritaqa-llu Paradise-amun mayuucimacia (Aipaagni temtuumarmi wall'u temni unilluku, nalluaqa, Agayutem kiimi nallunritaa),

⁴qaillun-llu mayuucimallra Paradise-amun, niitelluki-llu qanrutkumayuilnguut, yuum qanrutkesciigatai.

⁵Tauna yuk ucuryagutekciqaqa, tau͡gaam wangnek ucuryagutenritua, pinialutemnek tau͡gaam.

⁶Ucuryaguciiyuming'e'rma, usviilngaitua, piciulriamek qanerciqngama. Tau͡gaam tuaten pingaitua, yuk umyuarteqnayukluku quyinrurrlua ayuquciqa anaggluku, tangelqa niitelqa-llu pitekluku.

⁷Quyinrurtellerkaqa-llu pitekluku nasvicimallemkun amllernek, temka cukilanamek elliivikumallruuq, Satan-aamek taicimaluni, aviraniurtellua, anagullua ucuryagutesqevkenii.

⁸Ataneq kaigavikellruaqa pingayurqunek mat'umek, antevkaasqelluku wangnek.

⁹Tau͡gaam kiugaanga, “Naklekuteka elpenun pitalqegtuq, tua-i artuqailuciqa qaqisngiin yuum cirlaullrakun.” Taumek pikanirlua nanrautekciqanka pinialutenka, Christ-am pinianun naliumasqellua.

¹⁰Taumek Christ-aq pitekluku, cangayunritua pinialutemnek, cangacarcetemnek, nangtequatemnek, nangcimallemnek, pinerrlugutemnek-llu. Wangnek cirlaugaqama, pinirimalaama.

¹¹Usviilngurtun qalartelliniunga, tua-i elpeci pisqucirpecetun. Anagyaaqutkumanaqsaaqua elpecen̄i. Caunrilnge'rma cangallrunritua apostle-aarpecen̄i quyinrulriani.

¹²Apostle-aam piciulriim nallunailkutai caliaqumallruut akunlevcen̄etlemni qemitaakevkenaci, nallunailkutatgun iillanarqelriatgun-llu, caliatgun-llu angelriatgun.

¹³Allani agayuvigni nau͡gg'un nurenruluci caliaqumallruceci? tau͡gaam-qaa nenguluugutngunritlemkun elpecen̄un? Au͡g'aricia mat'umek alarutemnek.

¹⁴Waniwa pingayirilua nunasvikqataramci, nenguluugutngungaitua-llu, tua-i akluci pingnaqenrilamki, elpeci tau͡gaam; tua-i mikelnguut auluknarqenritait angayuqateng, angayuqaita tau͡gaam irniateng.

¹⁵Elpeci tarneci pitekluki tengrulua pinka tamalkirrluki tunciqanka wangnek-llu tunlua. Allani kenkenrukumci ikgellranek-qaa kenkumaarkaugua?

¹⁶Tau͡gaam nenguluugtenrilengramci qanerciqliuci usvitunilua, unakniluci-llu usvituyartellemkun.

¹⁷Wall'u-qaa teguillrulliamci ayagcetellma iliitgun elpecen̄un.

¹⁸Ellimertullruaqa Titus ullaasqelluci, anelgutiinek malilirluku. Titus-aam-qaa teguillruaci? Anernerkun-qaa ataucikun pektenritukut, tuma-llu atauciq aturluku?

¹⁹Umyuartequralartuci-qaa wangkutnek anagyaaqut'laryukluta ciuqerpecen̄i? Tau͡gaam Agayutem takuani qalartelartukut Christ-akun, ilamaa, nauluaqautekarrlainarpecen̄ek.

²⁰Civuuriima ullakumci umyuaqa nall'artevkenaku tekitnayukluci, umyuarci-llu nall'artenritnayukluku wangnun; uluryakaqa qanemyuugautellriartangqerrnayukluku ciknakutellrianek-llu, qenqerrutnek-llu, kiimurrsugyaramek, piciliutmek-llu, uputaariyaramek, pivaksaramek, aakulagcaramek-llu.

²¹Civuuratkaqa ataam ullakumci Agayutmun kiaresngiacetnayuklua ciuqerpecen̄i, amlleret-llu ilutequteknayukluki ciuqvaarni assiilngiumallret, maa-i-llu cali umyualinqigteksaunateng menuullermeggnek, akusrarutekillermeggnek, inerciigatlermeggnek-llu atulallermeggnek.