Read Yupik 2 Corinthians 13 Bible Online

2 Corinthians 13 - Yupik bible

2 Corinthians 13

¹Pingayirilua ullakataramci. Kituggnarqellria asguranairtengqerrarkauguq malrugnek wall'u pingayunek.

²Aarcirtullruanka ciungani assiilngillret allat-llu, maa-i-llu nayunritlemni aarcirturanka kinguqlirmi nunatellemni pillrucimtun, ataam tekiskuma takumcukngaitniluki.

³Tangerrsuavciu Christ-am qalarucia wangkun. Elpeci tungevcen̄un piniatenrituq, tau͡gaam artuqaituq elpecen̄i.

⁴Ellii cirlauluni ussukcausngallruuq, tau͡gaam Agayutem piniakun unguvauq. Wangkuta-llu elliikun cirlaugukut, tau͡gaam Agayutem piniakun unguvaciqukut tungevcen̄un.

⁵Yuvriqici elpecen̄ek, ukvengqerrutacirpecen̄ek. Naspaaci elpecen̄ek. Taringeksaitarci-qaa Jesus Christ-am elpecen̄elucia? Tua-i naspaamallerkarpecen̄i cirlakumanrilkuvci.

⁶Tau͡gaam-tuq nallunrirciu assiilngurmun cirlakenrilucirput.

⁷Tau͡gaam kaigavikaqa Agayun alartesqumavkenaci, wangkuta cirliqenrilucirput nasvagnavkenaku, tau͡gaam elpeci elluarrluci pisqelluci, cirlakumangatelangramta.

⁸Wani-wa piciuneq inglukesciigalamteggu, tau͡gaam ciumurulluku piciulria.

⁹Piniatellemten̄i cangalliunritukut elpeci asvailkuvci. Elluarillerkarci kiingan piicautekarput.

¹⁰Makunek igaramci nayuutenritlemni, ullakumci pillaganavkenaci piyunarqucimkun Atanrem taillrakun naucillerkaqa pitekluku navguillerkaqa pitkevkenaku.

¹¹Tua-ingunrituq, ilamaa, elluarrluci pici, ayuqucirtuuteka ciuniurciu, umyuallgutkici atunem, nepaitengnaqkici, nayurnauraaci kenkiyaram Agayutiin, uitanqegcitem-llu.

¹²Aryuquci atunem melugaryarakun kenciknarqelriakun.

¹³Tamarmeng agayumalriit aryuqutmek tuyuraiceci.

¹⁴Atanrem Jesus Christ-am naklekician, Agayutem-llu kenkician, Anernerem-llu Tanqilriim ilakician nayurlici tamarpeci.