Read Yupik 2 Corinthians 2 Bible Online

2 Corinthians 2 - Yupik bible

2 Corinthians 2

¹Umyuamkun taqutua umyuarci uqamaicetenqiggnavkenaku nunasngallemkun.

²Umyuarci uqamaicetellrukumku, kituuga-mi tauna wii ilukegcivkarteka, taunguuq umyuama uqamaitevkallra?

³Maa-i qanrutkelqa igamni, tekiskumci umyuaqa uqamaicetnayukluku ilukegcivkartekamnun, nalluvkenaku tamarpecen̄i angniuteka angniutekarkaucia elpecen̄un tamarpecen̄un.

⁴Igallemni nangtequtekellruamci cakviurutekluci-llu aluviliurlua-llu, umyuarci uqamaicetnavkenaku, tau͡gaam nallunriisqelluci angelriamek kenkicimnek elpecen̄ek.

⁵Kina umyuanek navguillrukuni, wangnun pissiyaanrituq, tau͡gaam elpecen̄un wall'u ilavcen̄un, tamalkurpecen̄un tucetnavkenaku.

⁶Taum tuatnallrem yugteggun amllerteggun qalaruyucini anucimirqutek'laraa.

⁷Taumek, elpeci tuiggviknarqerci au͡g'arilluku, caceturqaurluku-llu, umyuarniullermikun anagulluni cirlakumayuartuq.

⁸Taumek eguaquramci ataam kenegyagutesqelluku.

⁹Tamana pitekluku igallruamci, naspaanaluci niisngatacirkarpecen̄ek tamaitni.

¹⁰Kina au͡g'ariskuvciu, wii-llu au͡g'aritaqa. Camek au͡g'aricikuma elpeci pitekluci, tuatnaunga Christ-am ciuqerrani,

¹¹Satan-aaq pivingqercetevkenaku wangkutnun; nallunrilamteggu pingnaqellra.

¹²Troas-aamun tekitellemni qalaruteksarturluku Christ-am Gospel-aara, Atanrem amiigmek ikirutaanga.

¹³Tau͡gaam umyuaqa arulainrituq, nalaqenrilamku ilaka Titus. Taumek unilluki Macedonia-mun ayallruunga.

¹⁴Tau͡gaam Agayun quyanarquq, cirlakivkalaakut Christ-akun, nallunrillran-llu narnia wangkutgun sekavvluku tamiini.

¹⁵Wangkuta narnirqutnguamta Christ-amek Agayutmun, anirtuumalriani, anirtuumanrilngurni-llu.

¹⁶Aipaanun tuqumek imarluni aruvak, tuqumun, aipaanun-llu unguvamek imarluni, unguvamun. Kina makunek caliangqerrsugngaa?

¹⁷Wangkuta-wa, picimcetun Agayutem qaneryaraa qalarutkenritarput ellaicetun, tau͡gaam piciuluta Agayutmek ayagcecimaluta, qalartelartukut Agayutem takuani Christ-akun.