Read Yupik 2 Corinthians 3 Bible Online

2 Corinthians 3 - Yupik bible

2 Corinthians 3

¹Tua-llu nanrangqatartukut-qaa ataam? Wall'u-qaa ilaicetun apenqegcitnek kalikanek pinarqukut elpecen̄un, elpecen̄ek-llu allanun?

²Elpeci tungaunaci igaqamceci ircaqumten̄i igausngaluci, yugnun tamalkuitnun nallunriumaluci naaqumaluci-llu.

³Nasvagarci-llu Christ-amun igaqucirci caliaqumaluci wangkutgun, ingegkun pivkenaci, tau͡gaam unguvalriim Agayutem Anernerakun, teggalqunun-llu igausngavkenaci, tau͡gaam yuut ircaqruitnun.

⁴Tuaten pitalriamek Christ-amun nalirrugneriucamta Agayutem tungiinun.

⁵Wangkutnek piyugngayukevkenata, cat-llu wangkutnek pimayukevkenaki; piyugngacirput Agayutmek pian,

⁶elliin kevgiuyunarivkaakut akqutmun nutaramun, igakun pivkenata, tau͡gaam Anernerkun; tua-i igaumalria tuqucilaan, tau͡gaam Anerneq unguvamek cikiqenglartuq.

⁷Wani-wa Alerquun taicimalria tuqumek iqulek, teggalqumun igausngalria, taillrukan ucurnarqellriakun, Israel-aat-llu tangvagciiganaku Moses-aam kegginaa, qitngirnarqellra pitekluku, pellugarkaungraan,

⁸Anernerem-qaa taicimallra nutaan angenrulriamek ucurnarqutengqerrngaituq?

⁹Ucurnarqekan aniqlaatem taicimallra, ucurnarqenruciquq ellualriarurcaram taicimallra.

¹⁰Ilumun, ciuqliq ucurnarqelria maa-i ucurnarqenran tanqialivkaraa, ucurnarqutmikun.

¹¹Pellulria ucurnarqellrukan, piugarkaq ucurnarqenruciquq.

¹²Mat'umek neryuniurutengqerramta, qalartellerkamten̄ek kalivyunritukut.

¹³Moses-aatun pivkenata, kegginani capellrukii Israel-aanun tangrresqevkenaku ucurnarqucini nangelria.

¹⁴Tau͡gaam, umyugait elpegiutut; erneq man'a engelkarrluku Old Testament-aami naaqiaqameng capkutaqelallrat au͡gaumanrituq. Christ-akun tau͡gaam au͡gaumiin.

¹⁵Aa-ang, man'a engelkarrluku Moses-aam igainek naaqiaqameng umyugait capkutam capumalarai.

¹⁶Tau͡gaam yuk Atanermun tuigtaqan capkutaa au͡gaumalartuq.

¹⁷Wani-wa Ataneq Anerneruuq. Nani-llu Atanrem Anerneran uitavikellrani, yuk angicimauq.

¹⁸Tamamta-llu, kegginaput capaunaki, Atanrem ucurnarqucia akiqerluku ayuqucilinqigcimaukut elliin ayuqucianun, ucurnaanek pingiinarluta; man'a kingunengqertuq Atanermek Anernerulriamek.