Read Yupik 2 Corinthians 4 Bible Online

2 Corinthians 4 - Yupik bible

2 Corinthians 4

¹Taumek, Agayutem naklekutiikun mat'umek caliarkicimiimta, qacuinritukut.

²Pegtellruamteki kiaresngiatnarqellriit, iiqumtugyarat-llu; aturciigataput usvituyarcaraq, Agayutem-llu qaneryaraa allaurrluku qalarutkesciigataput, tau͡gaam piciulriim nasvallrakun asguranairyugtukut yuum tamarmi umyuaqegtaariinun Agayutem takuani.

³Tau͡gaam gospel-aaq qalarutkellerput capumakan, tuquarkaulrianun tau͡gaam capumauq.

⁴Ellaitni nunam mat'um agayutiin, umyugait agayumanrilnguut cikmirtai tangerciigalivkarluki Christ-am ucurnaan gospel-aaran Tanqianek, Agayutem ayuqucianek ayuqucingqellriim.

⁵Tua-i wangkutnek qalarutkenritukut, tau͡gaam Jesus Christ-aq atanruniluku, wangkuta-llu elpecen̄un kevgaucirput Jesus-aaq pitekluku.

⁶Tua-i Agayun waten qanlleq: “Tanqik tanqigili tan'germek,” elliin cali ircaqumteggun tanqigtaakut, nallunritesqelluku Agayutem ucurnarqucia Christ-am kegginaakun.

⁷Tua-i man'a piksuuminarqelria avaliqerput assigtatgun nunamiutarteggun, nasvagluku pinirpak Agayutmun pikucia, wangkutnek pivkenaku.

⁸Nanikualartukut tamalkuitni, tau͡gaam cirlakumaksaunata; uuqassugalartukut, tau͡gaam qevcimaksaunata;

⁹nangcimalartukut, tau͡gaam cakaarumaksaunata kaugtualaraitkut-llu uyunglluta, tau͡gaam piunriumaksaitukut.

¹⁰Jesus-aam tuqullra ang'aquralararput tememteggun, tua-i unguvii-llu Jesus-aam alaitesqelluku tememten̄i.

¹¹Unguvallemten̄i-llu tunumarrlainartukut tuqullerkamten̄un Jesus-aaq pitekluku, Jesus-aam unguvii alaitesqelluku kememten̄i tuquarkaulriami.

¹²Taumek tuqu calilartuq wangkutni, tau͡gken unguva elpecen̄i caliluni.

¹³Ukvellgutkarput-llu qanlleq waten, “Ukvellruunga, taumek qalartellrianga.” Taumek wangkuta-llu ukvellrucimcetun, qalartukut.

¹⁴Nalluvkenaku Atanrem Jesus-aam makcecestii, wangkuta-llu makceciiqaakut Jesus-aaq ilakluku, ciuqaminun-llu ullaulluta elpeci malikluci.

¹⁵Tua-i elpeci pitekluci makut tuaten piut, naklekutem amllerriinallra yugnun quyatngusqelluku Agayutem ucurnarillerkaanun.

¹⁶Taumek qac'uqertenritukut, qaimteggun cirlaurtengramta ircaqurput nutarcimalartuq erenret tamaita.

¹⁷Tua-i mat'um carrarmi nangtequcimta upyutaakut iquklicuilngurmek angniqapigutekamten̄ek ayuqailngurmek.

¹⁸Tangvanrilamteki tangrruulriit, tau͡gaam tangrruunrilnguut; tangrruulriit nang'arkaungata, tau͡gken tangrruunrilnguut nangengaunateng.