Read Yupik 2 Corinthians 5 Bible Online

2 Corinthians 5 - Yupik bible

2 Corinthians 5

¹Wani-wa nallunritukut una nunamiutaq uqisvigput piunriumakan, enekangqertukut Agayutmek, unatetgun piliaqumanrilngurmek, nangyuilngurmek qilagmi.

²Maani kanevvlugtelaryaaqukut, acuumiryaaqluku uitavigkarput qilagmiutaq,

³aturiumakumta, matamta nataqumanritniartukut.

⁴Maanelnginanemten̄i uqisvimten̄i, kanevvlugtelartukut nerinilluta; matangqallerkamten̄ek pivkenata, tau͡gaam qallircimallerkamten̄ek, man'a tuquyulria unguvamun cirlakumasqelluku.

⁵Mat'umek upyutestevvut Agayutnguuq, Anerneminek-llu cikiraakut nallunairistekesqelluku.

⁶Taumek cacetulartukut; nalluvkenaku man'a, temvut uitavikellemten̄i, Ataneq nayunritarput.

⁷(Tua-i ukverkun egilercamta, tangllerkun pivkenata.)

⁸Cacetuukut, qanertua, tememten̄ek avvluta Atanermi uitallerkarput cucukenruarput.

⁹Taumek tememten̄i uitangramta wall'u catailengramta, ellii ilukegcivkaryuumiraput.

¹⁰Wani-wa tamamta ullauciiqngamta ciuqerranun Atanrem qanercetaarvianun, nunuliumaarkauluta assilriamek, wall'u assiilngurmek, kina imna caliaqellermikun tememini.

¹¹Taumek, nalluvkenaku alingnarqucia Atanrem, yuut aarcirturaput: tau͡gaam ayuqucirput manimauq Agayutmun, elpeci-llu umyuaqegtaarpeciuggun nallunricaaqerci.

¹²Wangkutnek nanranritukut elpecen̄un, tau͡gaam elpecen̄un ilukegcitkesqelluta, kiuyunarisqelluki ellmeggnek nanraryulriit yuum tangellrakun, ircaqumegteggun pivkenateng.

¹³Usviirutellrukumta qanruciicetun, Agayun pitekluku tuaten piukut; ellangqerqumta-llu elpeci pitekluci tuaten piukut.

¹⁴Wani-wa Christ-am kenkiin arulataakut, nalirrugneriucecimiimta atauciq tuqullrucianek tamalkuitnun; taumek tamamta tuqumaukut.

¹⁵Tuqullruuq-llu tamalkuitnun, unguvalriit ellaitnek yuusqevkenaki, elliinun tau͡gaam tuqutekestiitnun, makcecimaluni-llu.

¹⁶Wak'nirnek, yuk cuqtenritarput tangellrakun, mat'um ciungani Christ-aq cuqtellrungramteggu tangellrakun, tuaten pinanrirarput.

¹⁷Taumek, yuk Christ-amelkuni, nutaraurtuq, ak'allaat pellugtut, tangerrluku, cat tamarmeng nutaraurtut.

¹⁸Man'a tamarmi Agayutmek piuq, Christ-akun kenegyagutestemten̄ek ellminun, elliin-llu caliarkitaakut kenegyagucaramek.

¹⁹Wani-wa, Agayutem Christ-akun nunamiut kenegyagucamiki ellminun, picurlallrit ellaitnun ellivkenaki, wangkuta-llu avaqlilirluta kenegyagucaram qaneryarartaanek.

²⁰Taumek cingilguukut Christ-amun, Agayutem quurituastekluta. Christ-am pisqutii aturluku unayaqamci, kenegyaguci Agayutmun.

²¹Assiilnguum nallustii, wangkuta pitekluta assiilnguurcetaa, elliikun cali wangkuta ellualriarurtesqelluta Agayutmun.