Read Yupik 2 Corinthians 7 Bible Online

2 Corinthians 7 - Yupik bible

2 Corinthians 7

¹Taumek makunek akqumiimta, kenkumalriani, menuircalta wangkutnek tamaitnek tememta menuurrnarqutainek anernemta-llu, qigcignarillerkarput-llu tamalkuurrluku qigcikellrakun Agayutem.

²Ciuniurcikut ircaqurpeciuggun, yuk umyugaan navguutekaanek piksaitarput, aknirutekaanek-llu piksaitarput, uayaqsaunaku-llu canek.

³Makunek qanenritua piunrilkuurluci, ciunguluku qanrutellruamci ircaqumten̄i uitaniluci, tuqullgutkarkauluci, unguvallgutkarkauluci-llu.

⁴Nalirrukenritamci; ucuryagutekamci; qarutaarutmek imiumaunga. Nanikuallrungramta maa-i angnirpagtukut.

⁵Macedonia-mun-llu tekitellemten̄i, temput uitanqegcinritut, tau͡gaam callemten̄i tamaitni nangtequallruukut, qaimteggun callualuta, ilumteggun-llu alingniurluta.

⁶Tau͡gaam Agayutem, kanangllugtellrianek qarucilriim, qarutellruakut Titus-aam tekitellrakun.

⁷Tekitellermikun-llu kiimi pivkenani, tau͡gaam cali qaruyutkellermikun elpecen̄i, qanrucanga nerinikucimnek, peng'garucimnek-llu, ilikucimnek-llu elpecen̄un, tamatum angnircetaanga cali.

⁸Umyuarniurcetengramci-llu kalikautemkun, umyuarniurutkenritaqa umyuarniurutkellruyaaqengramku, taringamci iluteqevkaucirci kalikamun taumun carrarmi, ak'anun pivkenaci.

⁹Tau͡gaam maa-i quyaunga, iluteqlerci pitkevkenaku, tau͡gaam umyuarniurcecamci umyualinqigtellerkarpecen̄un; umyuarniurcecimiivci Agayutkun, taumek camek cagmarivkanritamci.

¹⁰Pakemkumiutaam iluteqnam umyualinqigcet'laraa yuk anirtuumallerkaanun, umyuarniurucetaunani-llu, tau͡gaam nunamiutaq iluteqnaq tuqumek iqungqertuq.

¹¹Tangerrluku tengruvkaucirci iluteqlerpeciuggun pakemkumiutarkun, qanerniaryuumiitellerci-llu, qenqertellerci-llu, aaryutellerci-llu, piyuumiitellerci-llu, tengrullerci-llu, akinauriyullerci-llu! Tamaitgun pinarqutailucirci nasvagarci.

¹²Taumek igallrungramci, tauna pistii pitkevkenaku, pik'ngaa-llu pitkevkenaku, tau͡gaam wangnek ilungucirci elpecen̄un manimasqelluku Agayutem ciuqerrani.

¹³Taumek qarucimaukut. Qarucimallemta-llu avatiini, angenranek quyatengqertukut Titus-aam angniutiinek, umyugaa caceturian elpeciuggun.

¹⁴Nanrallrukumci elliinun, kiaresngialutkamnek pinritua; tau͡gaam elpecen̄un qanellrenka tamalkuita piciuruciicetun, tuaten-llu Titus-aamun nanrallerci piciurtuq.

¹⁵Elliin-llu ilukegcitkaaci ciuniuravcen̄i, niisngayugluci, qigcikluku tavutekluku-llu.

¹⁶Angnirtua, nalirrukenrilamci tamaitgun!