Read Yupik 2 Corinthians 9 Bible Online

2 Corinthians 9 - Yupik bible

2 Corinthians 9

¹Igarnarqenricaaqamci elliiteci agayumalrianun pitekluki.

²Upingallerci nallunrilamku, tamatumek nanrautek'laamci Macedonia-rmiunun, qanraqlua Achaia upinganiluku allragnirnek; tengrullerpeci-llu cucuyagtai tamaklaita.

³Tau͡gaam ilanka ayagcetanka, nanrauteklerput elpecen̄ek piciunritesqumavkenaku, upinganiartuci qanellrucimtun.

⁴Macedonia-rmiunek malilirlua tekiskumci upingavkenaci, kiaresngiaciiqngama, nalirrukenrilucirpecen̄ek; elpeci-llu tayima qaillun piyarceci?

⁵Taumek ukut ilaput cing'anka ciumkun ayaasqelluki elpecen̄un, elliitet akqutkelci uptesqelluki ciunguluku, upingasqelluki qunuyulriatun pivkenaci tau͡gaam tengrulriatun.

⁶Wani-wa; ikgelngurnek nauceciilria ikgelngurnek quyurciciquq, amllernek-llu nauceciilria amllernek quyurciciquq.

⁷Yuk tamarmi, cikiqengkili piyuumiutni aturluku, qunuyugpek'nani picetaarpek'nani-llu, Agayutem kenekngaku tengruluni cikiqengelria.

⁸Agayutem-llu auluksugngaaci atawaqautnek nuryunrilngurteggun, cat tamaitgun nuuqicugcetevkenaci elliitekangqerrluci-llu nurnailngurnek tamalkuitnun caliaqegtaarnun.

⁹Igausngaciatun, “Cikiutni aruqutkellrui tamiinun, cikillrui kusgurnarqellriit, naklekilaucia nangengaituq.”

¹⁰Naucetaarkanek cikirturilria nauceciiyurtem̄un, kelipamek-llu neqkaanek, elpeci-llu naucetaarkarpecen̄ek cikirciqaaci naugivkarluci, elluarucirpeci-llu atsai ulevkarluki.

¹¹Tamaitgun tukuurciiquci kusgurtallerkarpecen̄un, wangkutgun Agayun quyavikarkaurrluku.

¹²Wani-wa makut elliitet cikiutekellrat agayumalriit piilutaitnun kiingan atuunrituq, tau͡gaam cali egmirluni amllelriatgun Agayutem nanrautekaanun.

¹³Mat'um caliarpeci nasvagaa ayuqucirci, yuut-llu nanrarciqaat Agayun niisngallerpeciuggun, piksagulluku Christ-am gospel-aara, cikiutevciuggun-llu 'lingranarqellriatgun ellaitnun allanun-llu.

¹⁴Nerinikaiceci-llu piicautaqluci-llu, angelria Agayutem takumcukutii pitekluku elpecen̄i.

¹⁵Quyanarquq Agayutem cikiutii apaamasciigalnguq!