Read Yupik Galatians 1 Bible Online

Galatians 1 - Yupik bible

Galatians 1

¹Wii, Paul-aaq, apostle-aarulua, yugnek pivkenii cingumavkenii-llu, tau͡gaam Jesus Christ-akun, Agayutkun-llu Aatakun, maktestiikun tuqumek.

²Anelgutemnek ilalua, agayuvignun Galatia-melngurnun.

³Agayutem Atamta, Atanemta-llu Jesus Christ-am nakleklici uitanqegcivkarluci-llu.

⁴Ellminek cikiutekellrem assiilnguput pitekluki anirturnaluta nunamek mat'umek caarrluulriamek, Agayutem Atamta pisqutii aturluku.

⁵Ellii ucurnarivkaumali akwarpak akwanun! Amen.

⁶Alangaartua elpecen̄ek tuigteqanqeggucirpecen̄ek, unakestellerpecen̄ek naklekutiinun Christ-am, allamun qaneryaramun.

⁷Tua-i allaunricaaquq, tau͡gaam aakulagtestengqertuci Christ-am qaneryarain iqlutun qanrutkestainek.

⁸Tau͡gaam wangkuungramta wall'u an'gilaunger'mi pakmaken kingunelguluni qallaskan allamek qaneryaramek, qanrutkellemta elpecen̄un avatiini, tauna aniqlaamakili.

⁹Qanellrucimtun ciungani pulengllua qanertua: Kina yuk qallaskan qaneryaramek elpecen̄un, alerqullerpeci avatiini, tauna aniqlaamakili.

¹⁰Ilukegcitkevkangnaqua-qaa yugnun wall'u Agayutmun? Yuut ilukegcivkangnaqkumki Christ-amun kevgaungaitua.

¹¹Qanrutenqegcaramci, ilamaa, qaneryaraq qanrutkelqa yugnek kingunengqenrituq.

¹²Yugnek akurtullrunritaqa, yugnek-llu ayuqucirtuumallruvkenii, tau͡gaam Jesus Christ-am nasvallrakun.

¹³Tua-i niitellruarci Jews-aat ukveruciatni ayuqucilqa, anagullua inglukilqa Agayutem agayuvianek, navgualuku-llu.

¹⁴Jews-aat-llu ukveruciatgun anagtellruanka pitatemni nunalgutemni, cumigutenrullrat, ciuliamta picirkangutaita pitekluku.

¹⁵Tau͡gaam Agayutem allakartellma yuurqaanemnek kelegtem̄a-llu naklekutmikun,

¹⁶nallunairesqelluku Qetunrani wangnun agayumanrilngurnun-llu qalarutkesqen͞gaku, kina yuk ellangcarvikenritaqa,

¹⁷mayullruvkenii-llu Jerusalem-aamun apostle-aanun ciuqlimnun, tau͡gaam ayallruunga Arabia-mun, ataam-llu uterrlua Damascus-aamun.

¹⁸Allrakut-llu pingayun kinguatni Jerusalem-aamun mayullruunga Peter-aaq tangerrsarturluku, uitavikluku-llu ernerni akimiarni.

¹⁹Tau͡gaam allat apostle-aat tangellrunritanka, James-aaq tau͡gaam Atanrem anelgutii.

²⁰Makunek igaramci piciulrianek, Agayutem nallunritaanga, iqlunritua.

²¹Tamatum kinguani taillruunga Syria-mun Cilicia-mun-llu.

²²Judea-mi-llu agayuviit Christian-aat nallullruatnga.

²³Tau͡gaam niitellruluteng waten, “Nangtestellemta mat'um ciungani maa-i qalarutkaa ukverumaciq inglukellni.”

²⁴Ucurnarivkaraat-llu Agayun wii piteklua.