Read Yupik Galatians 2 Bible Online

Galatians 2 - Yupik bible

Galatians 2

¹Tua-i-llu allrakut akimiarunritaraan kinguatni Jerusalem-aamun mayunqigtua, Barnabas-aaq-llu, Titus-aaq-llu cali malikluku.

²Nasvicimalqa aturluku mayullruunga, qanemcikluku-llu qaneryaraq qalarutkelqa Jews-aarunrilngurnun, ciulirneret nallaitgun qanemcilluki, pitsaqevkenaku calilqa quyakenritnayukluku.

³Tuaten-llu malika Titus Greek-aarungraan nuugircetaallrunritaat.

⁴Tau͡gaam ilausngualriit, umyuallguciutenrilnger'meng aassaqluteng iluvallruut yuvrirnaluku angicimallerput Christ Jesus-aakun, teguarurrnaluta ataam.

⁵Tau͡gaam maligtaqunritaput sass'aq atauciungraan, qaneryaraqegtaaraam piciucia elpecen̄i uitasqelluku.

⁶Ciulirneritnek-llu camek unangellrunritua, ciulirneruyaaqellilriit, caunge'rmeng wangni ayuquq; Agayutem yuum taungucia cateksuitaa.

⁷Tau͡gaam taum avatiini, elpekellruat qaneryaraqegtaar Jews-aarunrilngurnun wangnun tunumacia, tuaten Jews-aat qaneryaraqegtaaraat Peter-aamun tunumaciatun.

⁸(Uptestellran Peter-aam Jews-aanun, wiinga-llu uptellruanga Jews-aarunrilngurnun).

⁹Agayuviim teggutain, James, Cephas, John-aam-llu elpekngamegteggu naklekun wangnun tunumalria, unacitaitkuk Barnabas-aaq-llu, ayaasqellunuk Agayumanrilngurnun, ellait-llu Jews-aanun ayagyugluteng.

¹⁰Tau͡gaam piitkuk arrsaulriit neq'akumasqelluki, wiinga-llu tuaten piarkaulua umyuangqertua.

¹¹Tau͡gaam Peter-aaq Antioch-amun tekican, takuanun yit'allruaqa, tua-i pinaqngan.

¹²James-aam kevgai tekipailgata Jews-aarunrilnguut nerellgutkellrui, tau͡gaam tekicata ilalinrirai alikluki nuugiryaram ciumurutestai.

¹³Allat-llu Jews-aat elliitun avtellruut; tuaten-llu Barnabas tapqucaaqluku malrugnek umyuangqellermeggnun.

¹⁴Tau͡gaam elpekngamki qaneryaraqegtaaraam maligtaqunrilucia Peter-aaq qanrutaqa taukut ciuqerratni, “Elpet, Jews-aaruluten, Jews-aarunrilnguut piciryaraatnek atuquvet Jews-aacetun pivkenak, ciin Jews-aarunrilnguut Jews-aacetun ayuqesqumasiki?”

¹⁵Wangkuta Jews-aaruyaaqukut nauvimteggun, Jews-aarunrilnguut assiilngilriartaqevkenata.

¹⁶Nalluvkenaku-llu yuk Alerquutet maligtaqungnaqellratgun ellualriarurtenrilucia, tau͡gaam Jesus Christ-aq ukvekellrakun, wangkuungramta-llu ukvekarput Jesus Christ-aq, ellualriarurrnaluta ukveqellrakun Christ-aq, Alerquutet atullratgun pivkenata; tua-i Alerquutet atullratgun yuk ellualriarurrngailan.

¹⁷Tau͡gaam, ellualriarurtengnaqlemten̄i Christ-akun, wangkuta-llu assiilngurtucirput nallunriumakuni, taumek-qaa Christ-aq assiilnguum kevgaqaa? Watqapik!

¹⁸Tua-i piunrillemnek ataam piurcikuma, wangnek assiilngilriaruciqua.

¹⁹Tua-i Alerquutetgun, Alerquutet tungiitnun tuqullruunga, Agayutmun unguvanalua.

²⁰Christ-aq ussukcausngallgutkaqa, ilangcivkenaku unguvaunga; wii pivkenii, Christ-aq tau͡gaam unguvauq wangni, watua-llu kemegtuumallemni, unguvaka unguvakaqa ukverlua Agayutem Qetunraanun, kenkestemnun, ellminek-llu cikiutekluni wii piteklua.

²¹Caunrilkenritaqa Agayutem naklekutii. Elluariyaraq Alerquutetgun pikan, Christ-aq elliinginaq tuqullruyartuq.