Read Yupik Galatians 3 Bible Online

Galatians 3 - Yupik bible

Galatians 3

¹Galatian-aani, umyugailngurni! Kia alarcetaci, Jesus Christ-aq ussukcausngalleq manimallrungraan ciuqerpecen̄i?

²Mat'umek apetnaamci: akurtullruarci-qaa Anerneq Alerquutet caliaqellratgun, wall'u ukverem qallautekumallrakun?

³Umyugaituci-qaa? Anernerkun ayagnillruyaaquci, maa-i-qaa tau͡gken natlugneriucimaluci kemegkun?

⁴Elliinginaq-qaa nangcimallruuci, ellmikuullinikan?

⁵Taumek ellii cikirtellerci Anernermek, irr'inarqelrialilleq-llu elpecen̄i, tuatnallruuq-qaa Alerquutet caliaqesqellratgun, wall'u qaneryaraqegtaaraam ukvekellrakun?

⁶Tuaten Abraham-aatun, “Elluarucingevkaumalriatun, Agayun ukveqngamiu.”

⁷Taumek nallunriciu ukverucingqellriit Abraham-aamun irniaquciat.

⁸Qaneryaram-llu, tangrruarluku Jews-aarunrilnguut Agayutmun ellualriarurcetarkauciat, ciunguluku qaneryaraqegtaar qalarutkellrua Abraham-aamun qanerluni, “Elpegun tamarmeng nunat yuit atawaqercecimaarkaugut.”

⁹Taumek, ukverumalriit atawaqercecimaut Abraham-aaq ukvertulria ilakluku.

¹⁰Wani-wa Alerquutet caliaqesqellratnek pingqengnaqellriit tamalkuita aniqlaatem qullilirai, igausngiin, “Aniqlaamauq kina imna kalikani Alerquutellegni tamalkuan igausngalriamek ciumurucinrilnguq, aturpek'naku-llu.”

¹¹Waniwa nallunaituq, Alerquutetgun Agayutmi ellualriarurtellriartailucia, wani-wa, “Ukverkun ellualria unguvaciquq.”

¹²Tau͡gaam Alerquutet ukveq pinritaat, “Tau͡gaam yuum atuquniki yuutekciqai.”

¹³Christ-am akiliutellruakut, Alerquutet aniqlaatiitnek au͡g'arluta, wangkuta pitekluta aniqlaagaullruami, igausngiin, “Aniqlaamauq kina imna napalriami agalria.”

¹⁴Abraham-aam atawaqaasqumallra Jews-aarunrilngurnun tut'esqelluku Jesus Christ-akun, wangkutnun akurtuusqelluku akqutngulleq Anerneq ukverkun.

¹⁵Ilamaa, yuut pilauciicetun picirkiun sign-aumarikuni yuum qigcikenrilngaitaa ilangaunaku-llu.

¹⁶Makut akqutet Abraham-aamun kinguvranun-llu taqumaut. Agayun qanellrunrituq, “Kinguverpenun amllerrluki,” tau͡gaam atauciuluku, “Kinguverpenun wani-wa Christ-amun.”

¹⁷Tua-i qanertua, akquyun, Agayutem Christ-akun akqutkellra Alerquutet qigcignairutesciigataat, akqutii-llu piunrirciiganaku, allrakut yuinaat yuinaat qulmek cipluki (430) kinguatni, atuunrirciiganaku-llu.

¹⁸Tua-i kinguvanertarkaq Alerquutetgun pimakuni akqutngunrirtuq. Tau͡gaam Agayutem cikiutekellrua Abraham-aamun akqutkun.

¹⁹Ciin tua-llu Alerquutet piugat? Tua-i ellimaut assiilnguut pitekluki, alairarkaq tekitnatkaanun akqumalriamun, taicimaluni-llu akunleqliulriakun an'gilanek ikayungqerrluni.

²⁰Akunleqliulria ataucimun akunleqliunrituq, tau͡gaam Agayun atauciuguq.

²¹Tua-llu-qaa Alerquutet Agayutem akqutai inglukait? Qang'a! Alerquucetangqerqan unguvamek cikiqengyugngalriamek, ilumun elluaryaraq Alerquutetgun piallruuq.

²²Tau͡gaam qaneryaram yuut assiilngilriarunii tamalkuita; ukveqellran Jesus Christ-am akqutii cikiutngusqelluku ukvelrianun.

²³Tau͡gaam ukveq pivailgan, Alerquutet tegumiaqaitkut, caqumaluta ukverem alairnatkaanun.

²⁴Taumek Alerquutet ayuqucirturtekellruaput Christ-amun ullaulluta, ukvemteggun ellualriarurtesqelluta.

²⁵Tau͡gaam ukvengumariluta ayuqucirturtem̄ek pinarqenriraakut.

²⁶Wani-wa Agayutem irniaqaaci tamarpeci ukveqellrakun Christ Jesus-aam.

²⁷Tua-i tamarpeci Christ-amun anglluumalriani at'ellruarci Christ-aq.

²⁸Naliit piunrunritut Jews-aat Greek-aat-llu, teguarung'e'rmeng teguarunrilnge'rmeng, angutngung'e'rmeng arnaunger'meng-llu; tua-i tamarpeci atauciungavci Christ Jesus-aami.

²⁹Christ-am-llu pikekaci Abraham-aam kinguveqaaci, kinguvanertarkangqerrluci-llu akqun aturluku.