Read Yupik Galatians 4 Bible Online

Galatians 4 - Yupik bible

Galatians 4

¹Mat'umek qanrutamci kinguvanerkalek, mikelnguullermini pistem̄i cangallrunrituq, tamalkuita pik'ngermiki.

²Tau͡gaam aulukestengqerrluni ataniumasterluni-llu atami pillerkiuraa engelkarrluku.

³Tuaten-llu-wa wangkuta, mikelnguullemten̄i, teguarullruukut nunam mat'um piinun.

⁴Tau͡gaam pillerkaq tekican, Agayutem Qetunrani atrarcetaa, arnakun yuurrluni, Alerquutem aciakun,

⁵ataam tegunaluki Alerquutem qulliliumakai, akurtuusqelluku irniarurcaraq.

⁶Irniaruavci-llu, Agayutem ayagcetellrua Qetunrami Anernera ircaqurpecen̄un, kaigaluni: “Abba, Aata.”

⁷Taumek irniarurtuten, pisten͞gunrirluten. Irniarurcavet-llu kinguvanertarkanguten Agayutmek Christ-akun.

⁸Tau͡gaam, Agayun nallullerpecen̄i, agayutngunrilnguut kevgiullruaci.

⁹Tau͡gaam maa-i Agayun nallunriumariavciu, wall'u Agayutem nallunriumariaci, ciin ataam tuigceci nutemllarnun, pinialngurnun, caunrilngurnun-llu? Ciin teguarunqigcuumirceci?

¹⁰Murilkelaraci erenret, iralut-llu, agayunerpiit-llu, allrakut-llu.

¹¹Aaqamci elliinginaq caliaqellruyukluci.

¹²Ilamaa, qarutaaramci, wangtun ayuqesqelluci, wiinga-llu elpecicetun ayuqngama, iqlutun ayuquteksaitarpecia.

¹³Nallunritarci apquciqa pitekluku qallateqarraalqa qaneryaraqegtaarmek elpecen̄un.

¹⁴Arenqialliquteka-llu kememkun caunrilkutkenritarci qessakutkevkenaku-llu, tau͡gaam ciuniurlua Agayutem an'gilaatun pitarrlua, wall'u Christ Jesus-aatun.

¹⁵Nauwa tayima angniuteklerci? Nallunritamci piyunarqekan iici ikugluki wangnun cikiuteksallruaci.

¹⁶Tua-i-llu-qaa inglukesteksagutarpecia piciulriamek qanelqa pitekluku.

¹⁷Pinqegciutelaraiceci piciunrilngurnek umyuangqerrluteng, avcecugaiceci maligtaqusqelluteng.

¹⁸Atawauyartuq cumiguskaceci piciulriakun, nayurrlainanrilengramci.

¹⁹Irniamaa, teggiurcilriatun cakviurutkenqigtamci, Christ piurrnatkaanun elpecen̄i.

²⁰Ilagaryuumiryaaqamci watua erininqigutnaluci, tua-i ayuquciilamci.

²¹Qanrucia, Alerquutet ciumurucugtaitni: Alerquutet-qaa niiteksaitaci?

²²Igausngiin Abraham-aaq malrugnek qetunrangqellruuq, aipaa teguakun, aipaa-llu teguarunrilngurkun.

²³Tauna teguam yua kemgem pisquciatun yuurtellruuq, tau͡gaam teguarunrilngurkun yuurtelleq akqun aturluku pillruuq.

²⁴Tamana ayuqestassiigutnguuq: wani-wa akquyutek malruk. Aipaa Sinai-amek kingunengqertuq, Hagar-atun teguanek kinguverkiurarkauluni.

²⁵Tua-i tauna Ingriq Sinai-aq, Hagar-aaruuq Arabia-mi uitiimi, ayuqluku Jerusalem-aaq, nunamiutaq yugtuumarmi-llu teguaruluni.

²⁶Tau͡gaam Jerusalem-aaq pakemkumiutaq teguarunrituq, tamamta-llu aanakarput.

²⁷Tua-i igausngiin, “Nunaniryua, qingayuilngurmi! Irniyuilngurmi-llu! Qayagpii teggiurciyuilngurmi. Tua-i uilgaq yul'inruan uilegmi.”

²⁸Tua-i-llu wangkuta Isaac-aatun akqutem yukaakut.

²⁹Tau͡gaam kemgem piyullrakun yuurtellrem nangtellruciatun Anernerem pisquciatun yuurtelleq, tuacetun cali watua ayuquq.

³⁰Tau͡gaam qaneryaraq qaillun qanerta? “Teguaq qetunraa-llu ayagceskek, tua-i teguam yuan paitangqellgutekngailaku teguarunrilnguum yua.”

³¹Taumek, ilamaa, teguam yuk'enritaakut tau͡gaam teguarunrilnguum.