Read Yupik Galatians 5 Bible Online

Galatians 5 - Yupik bible

Galatians 5

¹Taumek asvailkici angicimallemteggun Christ-akun, petugcetevkenaci ataam teguaruyaramun.

²Tangerrluku wii, Paul-aami, qanrutamci nuugiumakuvci, Christ-aq cakngaitarci.

³Tua-i qanenqigtua tamalkuitnun nuugiumalrianun Alerquutet uniurcunailuciitnek.

⁴Christ-aq-llu catngunrirtuq elpecen̄un, kinkuni imkuni Alerquutet atullratgun ellualriarurtellriani, naklekutmek avvluci.

⁵Wangkuta Anernerkun neryuniurutekngamteggu elluarillerkaq ukverkun.

⁶Tua-i Jesus Christ-ami nuugiryaraq cautngunrituq, nuugiumanrilnge'rmi-llu; tau͡gaam ukveq kenkakun calilria.

⁷Elluarrluci pillruyaaquci; kia maligtaqucetenritaci piciuyaramun?

⁸Man'a eguaquumallerci kelegtevcen̄ek pinrituq.

⁹Quulciiraquinraam urtaq tamalkuan ulevkalaraa.

¹⁰Peng'gartenritamci Atanerkun iqlutmurrnayukluci. Tau͡gaam tauna iqlutmurucingnaqellria elpecen̄ek kituunge'rmi qanercetaarumaciquq.

¹¹Tau͡gaam wiinga, anelgutmaa, nuugiryaraq ciumuruskumku, ciin cali nangcimasia? Kelistam-qaa canganarqutii tuknialiuq?

¹²Avtesqumayaaqanka uitacurlagcetaarceci.

¹³Tua-i, ilamaa, angicimaarkauluci kelgumauci; tau͡gaam angicimacirci umyugiurutkenriciu kemgem aglumatainun, tau͡gaam kenkakun atunem kevgiurulluci.

¹⁴Tua-i Alerquutet tamarmeng ataucimurcimaut qaneryarakun ataucikun mat'ukun, “Ilan kenkarkaugan elpetun pitarrluku.”

¹⁵Tau͡gaam atunem kelluyuskuvci caunrilkulluci-llu mulngakici piunriucuartuci.

¹⁶Taumek qanrutamci, Anernerkun 'gilerci, kemgem aglumallra atunritnaurarci.

¹⁷Tua-i kemgem Anerneq inglukaa, Anernerem-llu kemek inglukluku; atunem ukuk inglukutuk, taumek umyuarci aturciigatarci.

¹⁸Tau͡gaam Anerneq maligtaqukuvciu Alerquutet ataniumangaitaiceci.

¹⁹Wani-wa kemgem caliari nallunaitut, makut: akusrarutekiyaraq, acunianeq, caarrliqsaraq, aglumakiyaraq,

²⁰agayutngualiyaraq, tuunriyaraq, uumikiyaraq, ayuqenricaraq, ellminek pivaksaraq, qenercaraq, callugyaraq, caunrilkiyaraq atanernek, maligtaqutenricaraq,

²¹ciknayaraq, tuquciyaraq, taangiqsaraq, akusrarcaraq, allat-llu tuaten ayuqelriit. Taumek ciunguluku aarcirturamci, qanrutellrucimtun mat'um ciungani, makunek atulriit Agayutem Angayuqauvia piksagusngaitaat.

²²Tau͡gaam Anernerem naugillri waniwaugut: kenka, angniq, uitanqegcineq, ilalciuneq, pinqegcineq, assineq, ukveq,

²³ellmikutuuneq, pitalqeneq; makut tungiitnun inerquucetaituq.

²⁴Christ-amun-llu ilautellriit kemegteng ussukcautellruat, piyullra, aglumayullra-llu tapeqlukek.

²⁵Anernerkun unguvakumta, Anernerkun-llu 'gilerrnarqaakut.

²⁶Ucurnangnaqenritelta, cangayugcetaarutevkenata, ciknataagutevkenata-llu.