Read Yupik Galatians 6 Bible Online

Galatians 6 - Yupik bible

Galatians 6

¹Ilamaa, ilasi picurlakan, elpeci Anernerkun yuulriani, tauna kitugciu ellmikutuuluci; elpecen̄ek murilkelluci, picetaarutmun piminayukluten.

²Atunem ikayurtaagulluci, Christ-am alerquutii aturluku.

³Tua-i yuk caunrilnguq, ellminek cauyukekuni, alarciiquq.

⁴Tau͡gaam yuum tamarmi caliani yuvrirliu, tuaten ellminek ucuqnaurtuq allaliurpek'nani.

⁵Yuum-wa tamarmi atmagarkani qugciqngaku.

⁶Qaneryaramek elitnaurumalriim, elitnaurten̄i cikilarliu assilrianek atu'urkainek.

⁷Alarcaqunaci, Agayun iqluurumangaituq, camek yuk nauceciikuni, ayuqiinek quyurciciquq.

⁸Wani-wa kememinun nauceciilria kememinek quyurciciquq piunrirarkanek; tau͡gaam Anernermun nauceciilria Anernermek unangeciquq unguvamek nangyuilngurmek.

⁹Mernuutenrillaut-llu elluarrluta pillerput; tua-i piinanemten̄i quyurciciqngamta, taqsuqenrilkumta.

¹⁰Taumek, pivingqerrutacimcetun, assilrianek pilta yugnun tamalkuitnun, arcaqerluki ukvellgutemten̄un.

¹¹Tangerrluku amllernek igaramci unatemkun.

¹²Nuugiryaramun eguaqurtevci yuum kemga ucuquteksugaat, nangtaunritengnaqluteng Christ-am kelistaa pitekluku.

¹³Tua-i ellaitngung'e'rmeng nuugiumalriit Alerquutet atuqsaitelarait. Tau͡gaam nuugiisqumaiceci ucuqumanaluteng elpecen̄i.

¹⁴Tau͡gaam wiinga camek ucuqingaitua Atanemta tau͡gaam Jesus Christ-am kelistaanek. Tuaggun ellarpak ussukcausngauq wangnun, wiinga-llu ellarpagmun.

¹⁵Tua-i Christ Jesus-aami nuugiumayaraq nuugiumanricaraq-llu cautngunrituq, tau͡gaam ayuqucilinqigcaraq.

¹⁶Kinkut-llu imkut yuulriit ayuqucirtuun man'a aturluku, uitanqegcitem naklekutem-llu tusvikliki, Agayutem-llu yui Israel-aat piciulriit.

¹⁷Taumek mat'um kinguani, yuum cangayugcetaanrillia, qelengllangqerrama qaimkun ataneqa Jesus-aaq pitekluku.

¹⁸Ilamaa, Atanrem Jesus Christ-am naklekutiin nayurlici. Amen.