Read Yupik Ephesians 1 Bible Online

Ephesians 1 - Yupik bible

Ephesians 1

¹Wii, Paul-aaq, Jesus Christ-am apostle-aara, Agayutem cucukek'ngaa, agayumalrianun Ephesus-aamelngurnun pektayiilngurnun Jesus Christ-ami.

²Agayutem Atamta, Atanemta-llu Jesus Christ-am nakleklici uitanqegcivkarluci-llu.

³Nanraumali Agayun, Atii Atanemta Jesus Christ-am, cikiakut atawaqautnek anernellarnek pakemkumiutarnek Christ-akun.

⁴Elliikun-llu cucukellruakut ellarpak tusnganengvailgan, ellualriarusqelluta canganarqutaunata-llu ciuqerrani kenkakun;

⁵nakmikumaurallruluta, Jesus Christ-akun yukliucugluta piyullni aturluku.

⁶Nanrautekaanek naklekutmi ucurnarqucian, tuaggun akurtuyunarivkaraakut Kenkek'ngamikun.

⁷Elliin augakun akiliucimaukut, assiilnguut au͡gautekaatnek, naklekutii angqapigtellria aturluku.

⁸Tuaggun umyuartucimikun amllermek cikiakut,

⁹nallunrirtelluta pisqutminek nallukemten̄ek, piyullni picirkiullni aturluku.

¹⁰Pillerkiuramini Christ-akun ataucimun quyurrnaluki cat tamalkuita pakmanelnguut nunam-llu qainganelnguut.

¹¹Kinguvanertarkangellruluta cali elliikun, nakmikumaurallruluta pisquciatun cam tamarmi arulatestiin.

¹²Wangkuta Christ-amek cacetuqutekiqerraallerni, elkarcimaukut cucukumaluta-llu yuucimteggun nanrarnaluku ucurnarqucia.

¹³Elliikun-llu, Qaneryaraq piciulria niitellruarci, anirtuumacirpeci Gospel-aara; elliikun-llu cali ukvengumariluci, Anernermek Tanqilriamek akqutmek nallunailkuciumauci.

¹⁴Tauna kinguvanertarkamten̄un akqutnguuq piksagutarkamta akilicimallranun, ucurnarqucian nanrautekaanun.

¹⁵Taumek, Atanermun Jesus-aamun ukverucirci agayumalrianek-llu kenkillerci niicamku,

¹⁶quyatekerrlainaramci, piicalallemkun-llu kaigataqluci.

¹⁷Atanrem Jesus Christ-am Agayutiinun Aatamun ucurnarqelriamun, cikiisqelluci elisngamek, taringevkaasqelluci-llu elliinek.

¹⁸Ircaqurci-llu tanqigisqelluku nallunritesqelluku neryuniurutii kelgumacimta, ucurnarqeqapiguciat-llu paiciutain agayumalriatgun,

¹⁹artuqailuciatun-llu pinian tungemten̄un ukvelrianun, tauna pinia caliarikun nallunaituq,

²⁰Christ-amek makcecillermikun tuqumek, aqumevkarluku-llu pakmani tallirpilirnemi tungiinun.

²¹Quyinrurterpagluku atanrulrianun tamalkuitnun, pinilegnun-llu, angayuqauvingqellrianun-llu, atanernek-llu aterpagcimalrianun, ellarpagmi maani kiimi pivkenani, tau͡gaam tekitarkanun-llu.

²²Cat-llu tamalkuita it'gain aciatnun elkartellruluki, tamaitgun-llu Atanrurtelluku agayuvigmun.

²³Temekngaku muirumaluni, cat tamarmeng imiumastiitnek.