Read Yupik Ephesians 3 Bible Online

Ephesians 3 - Yupik bible

Ephesians 3

¹Taumek wii, Paul-aaq, Christ Jesus-aam kelucaucimalriartaqaanga elpeci pitekluci Jews-aarunrilngurni.

²Niitellruarci Agayutem naklekutiin aulukicia, wangnun tunumalria elpeci pitekluci.

³Nasvallermikun wangnun nallunrirtelluku taringesciigalkevvut. Man'a ak'a igautekellruyaaqaqa,

⁴tuaggun naaqikuvci taringesqelluku nallunriluciqa taringumanritellranek Christ-am.

⁵Tamana mat'um ciungani yugnun nallunrircecimanrilnguq, watua nasvaumacirmitun apostle-aaminun ellualrianun prophet-aanun-llu Anernerkun.

⁶Jews-aarunrilnguut pikangqellgutkarkauluki temengqellgutekluki-llu. Akqutai-llu Christ-akun pikarkauluki qaneryarakun Gospel-aakun.

⁷Tamatumek caliarkicimaunga, naklekutiinek Agayutem cikiumatacimtun, elliin piniakun artuqailngurkun.

⁸Wangnun, agayumalriit cakegtaunrillratnun, naklekun man'a cikiutekumauq Jews-aarunrilngurnun qalarutkesqelluki Christ-am tukuutai naaquciilnguut.

⁹Yuut-llu taringevkaasqelluki taringesciigalkiitnek iirumalriamek, ellam piurteqarraallranek ayagluni Agayutmi piurcillermi canek tamalkuitnek Jesus Christ-akun;

¹⁰Agayutem nallunrilucia amlleqapigtellria agayuvigkun nallunritesqelluku atanrulrianun pinilegnun-llu qilagmi;

¹¹akwanek picirkillermikun Christ Jesus-aami Atanemten̄i.

¹²Elliikun civuuravkenata ullaucunarqukut ancurturpek'nata elliin ukveqellrakun.

¹³Taumek piicagtua, elpeci pitekluci nangtequtenka taqsuqutekesqevkenaki, ucurnarqutkarkaungavciki.

¹⁴Tamana pitekluku ciisqumigtua Aatiinun, Atanemta Jesus Christ-am,

¹⁵qilagmi nunami-llu ilakellriit atengqerrutiita, ciuqerrani.

¹⁶Pinimek cikiisqelluci ucurnarqeqapiguciatun, Anernerkun pinirisqelluci yuucirpeciuggun ilumuulriakun,

¹⁷Christ-aq ukverkun ircaqurpecen̄i nengqerresqelluku, elpeci-llu acilqurluci inguqangqerrluci-llu kenekmek,

¹⁸ellualriit tamalkuita ilakluki, elpeci ayuqucingyunaqnaurtuci elurtutacianek taktacianek-llu, et'utacianek quyigtacianek-llu.

¹⁹Christ-am-llu kenkii nallunritesqelluku, elitmek cikiqengelria; imangqeqapigtesqelluci Agayutem tamalkuucianek.

²⁰Imna-llu piicauteput umyuaput-llu tamalkuita anagvagluki amllenrulriamek piyunarqelria, pinini wangkutni cakaniutngulria cuqluku,

²¹tauna ucurnarili ilakelriani, Christ Jesus-aametellriani watua maa-i, akwarpak akwanun! Amen.