Read Yupik Ephesians 4 Bible Online

Ephesians 4 - Yupik bible

Ephesians 4

¹Taumek wiinga, Ataneq pitekluku kelucaucimalriami, qanrutenqegcaramci elluarrluci piyuasqelluci kelgumacirpecetun.

²Tamaitgun mikellruyugluci, ellmikutuuluci-llu, ilalciuluci-llu ilaliurulluci kenkutellriacetun.

³Anernerkun-llu atauciucirci ciumuutengnaqenqegcarciu uitanqegcitkun ataucimun picirkiumalriacetun.

⁴Temtangqertuq ataucimek, Anerneq-llu atauciq, kelgumacirpeciuggun ataucimek neryuniurutengqerrluci.

⁵Ataneq atauciq, ukveq atauciq, anglluryaraq atauciq,

⁶Agayun atauciq tamarmeng Atiit, quyinrulriaruluni tamiini, tamiinlluni, tamarpecen̄i-llu uitaluni.

⁷Tau͡gaam naklekun tamalkuitnun cikiutekumauq cikiumatacimcetun Christ-amek.

⁸Taumek qanertuq, “Mayuami teguaruyaraq cirlakluku ciuliqagtai, cikiqengluni-llu cikiutnek yugnun.”

⁹Caluni mayullrua? Tua-i ciumek atrallruami camavet nunam aciqsinranun.

¹⁰Atralleq taunguuq mayulleq cali qiliit quyinratnun, cat tamalkuita qaqitnaluki.

¹¹Elliin-llu nakmikai, ilait apostle-aarusqelluki, ilait-llu prophet-aarusqelluki, ilait-llu qaneryariurten͞gusqelluki, ilait-llu qaunqesten͞gusqelluki, elitnauristen͞gusqelluki-llu.

¹²Ukvelriit elluarillerkaatnun, kevgiuryaram-llu caliaqellerkaanun, Christ-am-llu temii naulluku.

¹³Ukvemteggun atauciurcesqelluta, Agayutem-llu Qetunraa nallunriisqelluku, taqmigingallerkamten̄un, Christ-am-llu yugtutacia pitateksagutellerkaanun.

¹⁴Mikelngurtun ayuqenriisqelluta, caqtaarpek'nata ukvemteggun-llu pillinqigtaarpek'nata, alarcetaangnaqengraitkut, usvituluteng-llu iqlutmurutengnaqengraitkut iqlumun unakengnaqluta.

¹⁵Tau͡gaam, piciulriamek kenkakun qanraqluta, cat tamaitgun taqmiggngiinarluta elliinun qamiqurrulriamun.

¹⁶Elliikun tema tamarmi elluarrluni taqumauq, ilakliiyusngaluteng-llu temem aklui, tamarmeng aklui elluarrluteng calikuneng calillratgun pingiinartuq kenkakun-llu ellminek naulluni.

¹⁷Taumek watua mat'umek qanertua, nalqigcilua-llu Atanerkun, pektenriisqelluci agayumanrilngurcetun, pektelalriacetun umyuamegteggun piunrilngurnek pingnaqelriacetun.

¹⁸Taukut usvimegteggun tan'gercetut, avvluteng-llu yuucimek Agayutem pianek, ilumegteggun nalluameng, ircaqumegteggun-llu teggngameng.

¹⁹Taukut elpekek'ngairulluteng ellmeggnek tunellruut kasngunarqelriamun, tamanek menuurrnarqelrialiurnaluteng ayaritaucimegcetun.

²⁰Tau͡gaam elpeci tuaten Christ-amek elitnauqsaituci.

²¹Wani-wa ellii niitellrukuvciu elliinelluci-llu ayuqucirtuumallrukuvci, piciuyaraq Christ-amelnguq cuqluku.

²²Yuk ak'allaq imumi yuuciqlerci pegciu tauna ellminek piunrirarkaq aglumayarakun iqluurutngulriakun.

²³Tau͡gaam nutaraurrluci anernerpeciuggun umyuartequtevciuggun-llu,

²⁴all'uku-llu nutaraq, Agayun ayuqelciluku piurcimalria elluarrluku kenciknariluku-llu piciulriakun.

²⁵Taumek, iqlunrirluci, tamarpeci piciulriamek qallaci yuulgutevcen̄un, ilakellgutekngamta.

²⁶Qenerteng'e'rpeci assiilnginrici, akerta tevircetenriciu qenerrnginanerpecen̄i.

²⁷Tuunrangayak-llu pingnaqlerkangqercetenriciu.

²⁸Teglengalria teglenrirli, tau͡gaam calili unatmikun assilriamek piluni, piilngurnun ikayuatekangqerrnaurtuq tuaten.

²⁹Qanerrluutnek qanerpeciuggun anciksaunaci, tau͡gaam assilrianek ikayuutnguarkanek, niitestaita atawaqautekniarait.

³⁰Iluteqevkanriciu-llu Agayutem Anernera Tanqilria, elliikun nallunailkuciumiivci anirtuumallerkarpecen̄un.

³¹Pegciki pagglungqerrsaraq, caaqercaraq, qenercaraq, qatpagayaraq, umyuarrliquciyaraq-llu.

³²Tau͡gaam elluarrluci ilaliurulluci naklegtarluci, atunem-llu au͡g'aritaagulluci, tuaten Agayutem, Christ-aq pitekluku, au͡g'aricillruciatun elpecen̄ek.