Read Yupik Ephesians 5 Bible Online

Ephesians 5 - Yupik bible

Ephesians 5

¹Taumek Agayun maligtaquciu irniacetun keneknarqelriacetun.

²Piyuaci kenkiluci, nauwa cali Christ-am kenkellrukiikut ellminek-llu cikiutekluni wangkuta pitekluta, cikiutetun tuqutarkatun tunluni Agayutmun naryuuminarqelriatun.

³Tau͡gaam acunianeq, caarrlirnarqelriit, ciknayaraq-llu aprumaarkaunritut elpecen̄i, kenciknarqelriit tuaten piciryararkangqerrata.

⁴Kasngunarqelriit-llu, picimitun-llu qallacaraq, aripagtaangssagyaraq-llu, tamakut aturarkaunrilnguut, tau͡gaam quyaluci pici.

⁵Wani-wa man'a nallunritarci, kina imna acuniatuli, wall'u yurrluulria, wall'u ciknatuli, tua-i wani-wa agayutngualilria, paitarkailan Christ-am Agayutem-llu Angayuqauviani.

⁶Qaneryaranek piunrilngurnek kitumun iqluurcetenrici, waniwa tuaten ayuqelriit pitekluki Agayutem eq'uqertii tut'elartuq niisnganrilngurnun.

⁷Tamana pitekluku taukunun ilautenrici.

⁸Wani-wa elpeci imumi tan'germiungullruyaaquci, tau͡gaam watua tanqigmiunguuci Atanerkun. Tanqiim irniaritun piyuaci.

⁹(Tua-i Tanqiim naugillri uitiita assilriani tamaitni ellualriani-llu piciulriani-llu.)

¹⁰Agayutmun akurtuyunarqelria elitengnaqiciu.

¹¹Ilagauteksaunaci tan'gerem caliarinun, inerquulluki tau͡gaam.

¹²Tua-i yuut nalluatni aturyulallrat kasngunaqngan qanruteklerkaat-llu.

¹³Tau͡gaam cat tamarmeng inerquusngalriit tanqigimaaqameng nallunailartut, tanqik nallunairilriaruami.

¹⁴Taumek ellii qanertuq, “Tupii, qavalriami, makluten-llu tuqumalrianek, Christ-am-llu tanqigmek cikirciqaaten.”

¹⁵Taumek ellakluci piyuaci, usviilngurtun pivkenaci, usvitulriatun tau͡gaam.

¹⁶Caurailngarpek'naci makuni ernerni, assiilnguq paivngiin.

¹⁷Taumek usviitevkenaci, Agayutem pisqutii tau͡gaam taringumaluku.

¹⁸Wine-amek-llu taangiqeksaunaci, akusrarcaraungan, tau͡gaam Anernermek imiumaluci.

¹⁹Atunem qalaruquraraqluci qaneryaratgun, yuarutetgun-llu aturaqluci, ircaqurpeciuggun-llu quyaluci Atanermun.

²⁰Cat tamalkuita quyatekerrlainarluki Agayutmun Aatamun, atrakun Atanemta Jesus Christ-am.

²¹Maligtaquuraulluci atunem Agayun qigcikluku.

²²Nulirrulriani, uivcen̄un maligtaquurauci Atanermun pilaucimcetun.

²³Tua-i uingulria nuliaminun ciuqliungan, tuaten Christ-aq Agayuvigmun ciuqliuciatun. Ellii-llu tememun anirturten͞guluni.

²⁴Taumek agayuvik Christ-amun maligtaqutelauciatun, tuaten-llu nulirrit pikilit uimeggnun tamaitgun.

²⁵Uingulriani, nuliaci kenkiciki tuaten Christ-am agayuvigmek kenkiciatun, pitekluku-llu ellminek cikiutekluni.

²⁶Kenciknarivkarnaluku, caarrluirnaluku-llu mermek anglluumaciatun qaneryaraq pitekluku,

²⁷ucurnarqelriamek agayuvigmek akurturnaluni iqailngurmek imegglugnerrluunani canganarqutaunani-llu, tau͡gaam tanqiusqelluku apquciinaku-llu.

²⁸Tuaten angutet nuliateng keneknarqait tememegcetun pitarrluki. Nuliaminek kenkilria ellminek kenkuq.

²⁹Tua-i yuum kemni uumikeksailaku, tau͡gaam nerevkaraqluku qaunqelluku-llu, Atanrem agayuvigmek pilauciatun;

³⁰tua-i temiin ilakngakut, kemgan enrin-llu.

³¹Man'a pitekluku angutem atani aanani-llu unitarkaugak, nuliani-llu atavikluku, elkek-llu kemegkun ataucimurciiquk.

³²Man'a ayuqestassiigutnguuq nallunarqelriamun Christ-amek agayuvigmek-llu.

³³Tua-i tamarpeci nuliaci kenkiciki elpecicetun pitarrluki, nulirrulriani-llu uiteng takaqekilitki.