Read Yupik Ephesians 6 Bible Online

Ephesians 6 - Yupik bible

Ephesians 6

¹Mikelngurni, angayuqaci niisngaciki, tuaten pinaqngaci.

²“Aatan Aanan-llu takaqikek,” alerquun man'a akqutmek iqungqertuq:

³“Atawauciqngan elpeni, unguvamanaurtuten-llu nunami.”

⁴Elpeci-llu, ataulriani, irniaci qinucetaaqsaunaki qenngellerkaatnun, tau͡gaam anglicarluki ayuqucirturluki-llu Atanrem pisquciatun.

⁵Pisten͞gulriani, niisngaciki ataneci nunamiungulriit, qigcikluki alinguryuarluci, malrupegtevkenaci, Christ-amun kevgiulaucirpecetun.

⁶Tangvallratni kiimi pivkenaci, yugnun nanrarcetaalriacetun, tau͡gaam Christ-am kevgaicetun, Agayutem pisqutainek atulriacetun ircaqurpeciuggun tamalkirrluci.

⁷Tengruluci kevgiurluci Atanermun pilriacetun, yugnun pivkenaci.

⁸Nalluvkenaku man'a, yuk assilriamek calikan ayuqiinek Atanermek akurturarkaucianek teguarung'e'rmi teguarunrilnge'rmi-llu.

⁹Elpeci-llu atanrulriani, tuaten pimikici ellaitnun, nununrilkurrluki-llu; atauciq qilagmelnguq Ataneqngavciu, ellii-llu yuum taungucianek catkiyuunani.

¹⁰Nutaan-llu, anelgutmaa, asvaici Atanerkun elliin-llu caprilnguum piniakun.

¹¹Askiciu Agayutem aknircailkutii tamalkuan, pektayiinaci nangernganaurtuci tuunrangayiim 'lillgiangraaci.

¹²Wani-wa kemlegmun aulegmun-llu callunritukut, tau͡gaam pinilegpaulrianun, atanruvilegnun-llu, tan'gerem-llu atanrinun, tangrrumanrilngurnun-llu, pagaani ellami assiilnguum nautestainun ingluliurutukut.

¹³Taumek Agayutem aknircailkutii tamalkuan askiciu, cirlakevkanritnaurtuci ernermi callullratni, calluumariluki-llu iqumanritnaurtuci.

¹⁴Taumek nangerngaci, naquggluci piciunermek qukarpeciuggun, elluaq-llu qat'gailitaqluku;

¹⁵sap'akirluci-llu qaneryaramek uitanqegcitem pianek.

¹⁶Tamakut-llu arcaqanrat, ukveq tegumiaqiciu capkutaqluku, tuaggun nipnauraci tuunrangayiim pitegcautai kenret.

¹⁷Qamiqurruiryailkun-llu askiciu anirtuutngulria, tegumiaqluku-llu saskukarci Anernerem kapsuutii, wani-wa Agayutem qaneryaraa.

¹⁸Piicagglainarluci, kaigaciluci-llu Anernerkun, tamana pitekluku tarikici taqsuarirluci, piicaulluki-llu tamalkuita ukvelriit.

¹⁹Wiinga-llu qanerkamnek cikiumasqellua, uluryara'arpek'nii nallunrirtesqelluki qaneryaram nallunarqelriari.

²⁰Tamana pitekluku cingilgulua kalivnerciumaunga. Piicauskicia uluryara'arpek'nii qanrucirkanka qanrutkesqelluki.

²¹Tau͡gaam nallunriisqelluci ayuqucimnek caliamnek-llu, kenkumalriim ilamta piciulriim Tychicus-aam, Agayutem pistiin, nallunrirceciiqaaci tamalkuitnek.

²²Tamana-llu pitekluku ayagcetaqa elpecen̄un nallunriisqelluci ayuqucimnek caceturqauresqelluci-llu.

²³Uitanqegcitmek kenekmek-llu ukvertulriamek tuyuramci, anelgutemtaa, Agayutmek Atamten̄ek kingunelegmek, Atanemten̄ek-llu Jesus Christ-amek.

²⁴Naklekutem nayurliki tamalkuita piciuluteng kenkestai Atanemta Jesus Christ-am. Amen.